Isaiah 8

Tibetian NTB (བོད་འགྱུར་གསར་མ།)

← Chapter 7 Jump to: Chapter 9 →

1དེ་ཡང་དཀོན་མཆོག་ཡ་ཝཱེས་ང་ལ་འདི་སྐད་དུ། བྱང་བུ་ཆེན་པོ་ཞིག་ཁྱེར་འོངས་ནས་དེའི་སྟེང་དུ་ཐུན་མོང་གི་ཡི་གེ་བཀོལ་ཏེ་མཱ་ཧེར་ཤལ་ལཱ་ཧ་ཤཱ་པཱ་ཟི་ ཞེས་ཕྲིས་ཤིག

2དེ་ནས་ངས་བློ་དཀར་བའི་དཔང་པོ་སྟེ་མཆོད་དཔོན་ཨུ་རི་ཡཱ་དང་། ཡེ་བིར་ཀི་ཡཱའི་བུ་ཟཱ་ཀར་ཡ་གཉིས་ལ་བདག་གི་ཆེད་དུ་བདེན་དཔང་བྱེད་དུ་འཇུག་དགོས་ཞེས་གསུངས་སོ། །

3དེ་ནས་ང་རང་བུད་མེད་ལུང་སྟོན་པ་སྟེ་རང་གི་ཆུང་མར་བཅར་བ་དང་། མོ་ལ་མངལ་སྦྲུམ་ནས་བུ་ཞིག་སྐྱེས་ཤིང་། དཀོན་མཆོག་ཡ་ཝཱེས་ང་ལ། བུ་ཡི་མིང་ལ་མཱ་ཧེར་ཤལ་ལཱ་ཧ་ཤཱ་པཱ་ཟི་ཞེས་ཐོགས་ཤིག

4ཅི་ལ་ཞེ་ན། བུ་ཆུང་གིས་ངའི་ཕ་ལགས། ངའི་མ་ལགས་ཞེས་འབོད་ཤེས་པའི་སྔོན་ལ། དཱ་མེ་སེག་གི་རྒྱུ་ནོར་དང་སཱ་མར་ཡའི་བཅོམ་ནོར་རྣམས་ཨ་སུར་རྒྱལ་པོའི་དྲུང་ནས་འཁྱེར་བར་འགྱུར་རོ་ཞེས་གསུངས་སོ། །

5ཡང་དཀོན་མཆོག་ཡ་ཝཱེས་ང་ལ་འདི་སྐད་དུ།

6མི་འདི་དག་གིས་ཤི་ལོ་ཨག་གི་དལ་འབབ་ཆུ་བོ་དོར་ནས། རེ་ཙིན་དང་རེ་མལ་ཡཱའི་བུ་ལ་དགའ་བར་གྱུར།

7དེ་བས་ལྟོས་དང་། གཙོ་བོས་ཟབ་ཅིང་རྒྱས་པའི་གཙང་པོ་མང་པོ་སྟེ་ཨ་སུར་རྒྱལ་པོའི་གཟི་དཔལ་ཐམས་ཅད་དེ་དག་གི་སྟེང་ལ་འདྲེན་ཞིང་། ཆུ་དེ་ཡར་རྒྱས་ནས་ཆུ་རྐའི་གོང་ལ་བཞུར་ཞིང་། ཆུ་འགྲམ་བརྒྱུད་ནས་བཞུར་འགྲོ།

8ཆུ་རྒྱས་ཤིང་རྡོལ་ནས་ཡ་ཧུ་དཱའི་དཀྱིལ་གཤག་ཅིང་དེའི་སྐེ་མཚམས་བར་དུ་རྒྱག་ངེས། ཀྱེ་ཨིམ་མཱ་ནུ་ཨེལ། དེའི་གཤོག་པ་རྣམས་ཕྱི་ལ་བརྐྱངས་ཏེ་ཁྱོད་ཀྱི་ཡུལ་ཁམས་རྒྱ་ཆེན་པོ་ཁེངས་པར་འགྱུར་རོ། །

9ཀྱེ་མི་རྣམས། ངན་སྤྱོད་སྤེལ་དང་ཁྱོད་ཅག་སིལ་བུར་འཐོར་འགྲོ། རྒྱང་རིང་གི་མི་རིགས་རྣམས་ཀྱིས་རྣ་བ་གཏོད་དང་། ཁྱོད་ཚོས་སྐ་རགས་བཅིངས་ ནའང་སིལ་བུར་འཐོར་འགྲོ། ཁྱོད་ཚོས་སྐ་རགས་བཅིངས་ནའང་སིལ་བུར་འཐོར་འགྲོ།

10ཁྱོད་ཚོས་གྲོས་མོལ་བྱས་ཀྱང་དོན་ཅི་ཡང་མི་འགྲུབ། ཁྱོད་ཚོས་གྲོས་གཞི་བཏོན་ཡང་ནུས་པ་མི་ཐོན། ཅི་ལ་ཞེ་ན། དཀོན་མཆོག་ང་ཚོ་དང་ལྷན་དུ་བཞུགས་པས་སོ། །

11དཀོན་མཆོག་ཡ་ཝཱེས་དེ་ལྟར་ཉིད་ཀྱི་མཐུ་སྟོབས་ཆེན་པོའི་ཕྱག་གིས་ང་རང་བསྐྱོར་ནས། མི་འདི་དག་ནང་ལྟར་འགྲོ་མི་རུང་བའི་བཀའ་སློབ་བསྩལ་ནས་འདི་སྐད་དུ།

12མི་འདི་རྣམས་ཀྱིས་ཇུས་ངན་དུ་འབོད་པ་རྣམས་ཁྱོད་ཚོས་ཇུས་ངན་དུ་འབོད་མི་རུང་ལ། ཁོ་ཚོ་སྐྲག་ས་དེར་ཁྱོད་སྐྲག་མི་དགོས་ལ་སྔངས་ཀྱང་མི་དགོས།

13འོན་ཀྱང་། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ནི་ཁྱོད་ཚོས་དམ་པ་རུ་བཀུར་དགོས་ཤིང་། ཁོང་ལ་ཁྱོད་རྣམས་སྐྲག་ནས་སྔངས་དགོས་པ་ཡིན།

14དེ་ནས་ཁོང་ནི་ཁྱོད་ཀྱི་གནས་མཆོག་ཏུ་འགྱུར། འོན་ཀྱང་ཡེས་ར་ཨེལ་གྱི་ཁྱིམ་རྒྱུད་གཉིས་ལ་བཀག་རྡོ་དང་ས་རུ་སྒྱེལ་བའི་ཕ་བོང་དུ་འགྱུར་བ་དང་། ཡེ་རུ་སཱ་ལེམ་གྱི་མི་རྣམས་ལ་རྙི་རྒྱ་དང་དྲ་བ་རུ་འགྱུར་ངེས་ཡིན།

15དེ་དག་ལས་མི་མང་པོ་ཁ་སྦུབ་ཏུ་ལོག་ནས་སར་འགྱེལ་ཞིང་འཐོར་བ་དང་། རྙི་ལ་ཚུད་ནས་འཛིན་པར་འགྱུར་ཞེས་གསུངས་སོ། །

16ཁྱོད་ཀྱིས་བཀའ་ཁྲིམས་ཀྱི་ཤོག་དྲིལ་བསྒྲིལ་ནས་ངའི་རྗེས་འབྲང་པའི་དཀྱིལ་དུ་བཀའ་སློབ་ལ་ཐམ་ཀ་རྒྱོབས།

17ངས་ཡ་ཀོབ་ཀྱི་ཁྱིམ་རྒྱུད་ལ་ཡིབས་པའི་དཀོན་མཆོག་ཡ་ཝཱེའི་ཞལ་རས་མཇལ་བར་སྒུག་པར་བྱ། ངས་ཁོང་ལ་རེ་ལྟོས་བཅང་བར་བྱ།

18ལྟོས་དང་། ང་རང་ཉིད་དང་དཀོན་མཆོག་ཡ་ཝཱེས་ང་ལ་གནང་བའི་བུ་ཕྲུག་རྣམས་ནི་ཡེས་ར་ཨེལ་ནས་རྟགས་དང་མཚན་མ་རུ་ལངས་ཤིང་། དེ་ནི་རི་བོ་ཛ་ཡན་དུ་བཞུགས་པའི་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ནས་བྱུང་བའོ། །

19གལ་སྲིད་དེ་དག་གིས་ཁྱོད་ལ། ལྷ་པ་དང་མོ་པ་སྟེ་ཤབ་ཤུབ་སྨྲ་མཁན་དག་ལ་བསྟེན་དགོས་ཞེས་སྨྲ་བ་ཡིན་ན། ཁྱོད་ཅག་གི་མི་རྣམས་ཀྱིས་རང་གི་དཀོན་མཆོག་ལ་བཀའ་འདྲི་ཞུ་དགོས་པ་མིན་ནམ། གསོན་པོའི་དོན་དུ་གཤིན་པོ་ལ་འདྲི་རུང་ངམ་ཞེས་ལན་འདེབས་དགོས།

20མི་རྣམས་ཀྱིས་བཀའ་ཁྲིམས་དང་བཀའ་གསུང་ཚད་གཞི་རུ་འཛིན་དགོས་པ་དང་། ཁོ་ཚོའི་སྨྲ་བརྗོད་དེ་དང་མི་མཐུན་ན། དེ་དག་གིས་སྐྱ་རེངས་མཐོང་མི་སྲིད།

21དེ་ཚོས་དཀའ་སྡུག་དང་ལྟོགས་སྐོམ་མྱོང་བཞིན་ཡུལ་དེ་བརྒྱུད་ནས་འགྲོ་ལ། ཁོ་ཚོ་ལྟོགས་པའི་ཚེ་ཁྲོས་ནས་རང་གི་རྒྱལ་པོ་དང་རང་གི་དཀོན་མཆོག་ལ་དམོད་མོ་འདེབས་ངེས།

22དེ་དག་གིས་མགོ་ཡར་བཏེགས་ནས་ནམ་མཁར་བལྟ་ཞིང་། ཡང་ཐུར་དུ་ས་གཞིར་བལྟ་བའི་ཚེ། དེ་རུ་དཀའ་སྡུག་དང་མུན་ནག སྨག་རུམ་བཅས་ཀྱི་སྡུག་བསྔལ་གྱིས་ཁེངས་ཤིང་། དེ་དག་སྨག་རུམ་སྟུག་པོའི་ཁྲོད་འདེད་པར་འགྱུར་རོ། །

← Chapter 7 Jump to: Chapter 9 →