John 19

Tibetian NTB (བོད་འགྱུར་གསར་མ།)

1དེ་ནས་པི་ལ་ཏུས་སྐྱབས་མགོན་ཡེ་ཤུར་རྟ་ལྕག་གིས་གཞུ་དགོས་པའི་བཀའ་གནང་བ༌དང༌།

2དམག་མི་རྣམས་ཀྱིས་ཚེར་མའི་ཅོད་པན་བསླེས་ཏེ་ཁོང་གི་དབུ་ལ་བསྐོན་ཞིང་ལུས་ལ་ཁ་དོག་རྒྱ་སྨུག་ཡིན་པའི་ན་བཟའ་ཞིག་ཀྱང་བསྐོན་ཏོ།།

3ཡང་ཁོ་རྣམས་ཁོང་གི་དྲུང་དུ་བཅར༌ཏེ། ཁོང་ལ་ན་རེ། ཡ་ཧུ་དཱ་པའི་རྒྱལ་པོ་ཁྱོད་ལ་རྟེན་འབྲེལ་ཞུའོ་ཞེས་སྨྲས་ཤིང་ཁོང་ལ་འགྲམ་ལྕག་གཞུས་སོ།།

4དེ་ནས་ཡང་པི་ལ་ཏུ་ཕྱི་རོལ་ཏུ་ཕྱིན་ཏེ་མི་རྣམས་ལ་ན༌རེ། ལྟོས༌དང༌། བདག་གིས་ཁོ་རང་ལ་ཉེས་པ་ཅི་ཡོད་པ་བཙལ་ཀྱང་མི་རྙེད༌པས། ཁྱོད་རྣམས་ཀྱིས་ཀྱང་དོན་དེ་ཤེས་པའི༌ཕྱིར། ཁྱོད་རྣམས་ཀྱི་མདུན་དུ་བདག་གིས་ཁོ་རང་ཕྱི་རུ་འཁྲིད་པ་ཡིན་ཞེས་སྨྲས་སོ།།

5དེ་ནས་སྐྱབས་མགོན་ཡེ་ཤུས་ཚེར་མའི་ཅོད་པན་དང་ཁ་དོག་རྒྱ་སྨུག་ཡིན་པའི་ན་བཟའ་གསོལ་ནས་ཕྱི་རོལ་ཏུ་ཕེབས་པ༌དང༌། པི་ལ་ཏུས་མི་རྣམས་ལ་མི་འདིར་ལྟོས་ཤིག་ཅེས་སྨྲས་སོ།།

6དེ་ནས་མཆོད་དཔོན་ཆེན་པོ་དག་དང་སྲུང་དམག་རྣམས་ཀྱིས་སྐྱབས་མགོན་ཡེ་ཤུ་མཐོང་བ་དང་སྐད་ཆེན༌པོས། ཁོ་རང་ཤིང་རྒྱ་གྲམ་གྱི་སྟེང་དུ་རྡོབས་ཤིག ཤིང་རྒྱ་གྲམ་གྱི་སྟེང་དུ་རྡོབས་ཤིག་ཅེས་སྨྲས་པ༌ན། པི་ལ་ཏུ་ན༌རེ། བདག་གིས་ཁོ་རང་ལ་ཉེས་པ་ཅི་ཡོད་པ་བཙལ་ཀྱང་མ་རྙེད༌པས། ཁྱོད་ཅག་གིས་ཁོ་རང་ཁྲིད་ནས་བརྡབ་པར་བྱའོ་ཞེས་སྨྲས༌པ་རེད།

7ཡང་ཡ་ཧུ་དཱ་པ་རྣམས་ན༌རེ། ཁོས་རང་ཉིད་ནི་དཀོན་མཆོག་གི་སྲས་ཡིན་པར་བཤད༌པས། ངེད་ཅག་གི་བཀའ་ཁྲིམས་ལྟར་ན་ཁོ་རང་གསོད་དགོས་ཞེས་སྨྲས་པ༌དང༌།

8པི་ལ་ཏུས་གཏམ་དེ་ཐོས་ནས་ལྷག་པར་འཇིགས་པ༌དང༌།

9ཡང་ཕོ་བྲང་ནང་དུ་སོང༌སྟེ་སྐྱབས་མགོན་ཡེ་ཤུ་ལ། ཁྱོད་རང་གང་ནས་ཡོང་ངམ་ཞེས་དྲིས་ནའང་སྐྱབས་མགོན་ཡེ་ཤུས་བཀའ་ལན་ཅི་ཡང་མ་གནང་ངོ༌།།

10ཡང་པི་ལ་ཏུ་ན༌རེ། ཁྱོད་ཀྱིས་ང་རང་ལ་གཏམ་མི་གླེང༌ངམ། བདག་ལ་ཁྱོད་རང་བཙོན་གྲོལ་གཏོང་བའི་དབང་ཆ་ཡོད་ལ། ཤིང་རྒྱ་གྲམ་གྱི་སྟེང་དུ་བརྡབ་པའི་དབང་ཆའང་ཡོད་པ་ཁྱོད་ཀྱིས་མི་ཤེས་སམ་ཞེས་དྲིས་པ༌ན།

11སྐྱབས་མགོན་ཡེ་ཤུས་འདི་སྐད༌དུ། གལ་ཏེ་སྟེང་ནས་གནང་བ་མིན༌ན། ཁྱོད་ལ་ངའི་ཕྱོགས་སུ་དབང་ཆ་ཅི་ཡང་མེད༌པས། ཁྱོད་དང་བསྡུར་ན་ང་རང་ཁྱོད་ལ་སྤྲོད་མཁན་དེར་སྡིག་པ་ལྷག་ཏུ་ཆེ་ཞེས་གསུངས་སོ།།

12དུས་དེ་ནས་བཟུང་པི་ལ་ཏུས་སྐྱབས་མགོན་ཡེ་ཤུ་བཙོན་ལས་གཏོང་འདོད་ཀྱང་ཡ་ཧུ་དཱ་པ་རྣམས་ཀྱིས་སྐད་ཆེན༌པོས། གལ་ཏེ་ཁྱོད་ཀྱིས་མི་འདི་བཙོན་ལས་བཏང་ན་ཁྱོད་ནི་སེ་བཟིར་གྱི་མཛའ་གྲོགས་མིན་ལ། མི་སུས་ཀྱང་རང་ཉིད་རྒྱལ་པོ་ཡིན་ཞེས་བཤད་ན་མི་དེ་སེ་བཟིར་གྱི་ངོ་རྒོལ་པ་ཡིན་ཞེས་སྐད་ཅོར་བརྒྱབ་བོ།།

13པི་ལ་ཏུས་གཏམ་དེ་ཐོས་པ་དང་སྐྱབས་མགོན་ཡེ་ཤུ་ཕྱི་རོལ་ཏུ་ཁྲིད༌དེ། རྡོ་གཅལ་ཞེས་པ་ཨིབ་རིའི་མི་རིགས་ཀྱི་སྐད་དུ་ཀ་པི་ཐཱ་ཟེར་བའི་གནས་སུ་སོང་སྟེ་རང་ཉིད་ཁྲིམས་དཔོན་གྱི་ཁྲི་ལ་བསྡད།

14ཉིན་དེ་ནི་པེ་སག་གི་དུས་ཆེན་གྱི་སྟ་གོན་ཉིན་མོའི་ཉིན་གུང་ཙམ་ ཡིན། པི་ལ་ཏུས་ཡ་ཧུ་དཱ་པ་རྣམས༌ལ། ལྟོས༌དང༌། མི་འདི་ནི་ཁྱོད་རྣམས་ཀྱི་རྒྱལ་པོ་ཡིན་ཞེས་སྨྲས་པ༌ན།

15དེ་རྣམས་ན༌རེ། ཁོ་རང་སོད༌ཅིག སོད་ཅིག ཤིང་རྒྱ་གྲམ་གྱི་སྟེང་དུ་རྡོབས་ཤིག་ཅེས་སྐད་ཅོར་བརྒྱབ་བོ།། དེ་ནས་པི་ལ་ཏུ་ན༌རེ། བདག་གིས་ཁྱོད་རྣམས་ཀྱི་རྒྱལ་པོ་ཤིང་རྒྱ་གྲམ་གྱི་སྟེང་དུ་བརྡབ་ཆོག་གམ་ཞེས་དྲིས་པ༌ན། མཆོད་དཔོན་ཆེན་པོ་རྣམས་ན༌རེ། ངེད་རྣམས་ལ་སེ་བཟིར་ལས་གཞན་རྒྱལ་པོ་གཅིག་ཀྱང་མེད་ཅེས་སྨྲས་སོ།།

16དེ་ནས་པི་ལ་ཏུས་ཀྱང་སྐྱབས་མགོན་ཡེ་ཤུ་ཤིང་རྒྱ་གྲམ་གྱི་སྟེང་དུ་བརྡབ་པའི་ཕྱིར་དམག་མི་རྣམས་ལ་སྤྲད༌དོ།།

17དེ་ནས་དམག་མི་རྣམས་ཀྱིས་སྐྱབས་མགོན་ཡེ་ཤུ་ཁྲིད་པ༌དང༌། ཁོང་གིས་ཀྱང་རང་ཉིད་ཀྱི་ཤིང་རྒྱ་གྲམ་ཁུར་ནས་ཕྱི་རོལ་ཏུ་ཕེབས༌ཤིང༌། མགོ་སྐོགས་གནས་ཞེས་པ་ཨིབ་རིའི་མི་རིགས་ཀྱི་སྐད་དོད་དུ་གོལ་གོ་ཐཱ་ཟེར་བའི་ས་ཆར་སླེབས་སོ།།

18དེར་དམག་མི་དེ་རྣམས་ཀྱིས་སྐྱབས་མགོན་ཡེ་ཤུ་དཀྱིལ་དབུས་དང་། ཁོང་གི་གཡས་གཡོན་དུ་མི་གཞན་གཉིས་ཤིང་རྒྱ་གྲམ་གྱི་སྟེང་དུ་བརྡབས༌པ་རེད།

19ཡང་པི་ལ་ཏུས་ཤིང་བྱང་ཞིག་གི་ངོས་སུ་ཡ་ཧུ་དཱ་པའི་རྒྱལ་པོ་ནཱ་ཙ་རེལ་པ་ཡེ་ཤུའོ་ཞེས་འབྲི་དགོས་པའི་བཀའ་བསྒོས་པ་དང་ཤིང་བྱང་དེའང་ཤིང་རྒྱ་གྲམ་གྱི་གོང་དུ་བརྡབས་སོ།།

20སྐྱབས་མགོན་ཡེ་ཤུ་ཤིང་རྒྱ་གྲམ་གྱི་སྟེང་དུ་བརྡབས་པའི་གནས་དེ་ནི་གྲོང་ཁྱེར་དང་བར་ཐག་ཉེ༌ཞིང༌། ཤིང་བྱང་གི་ངོས་སུ་ཨིབ་རིའི་མི་རིགས་ཀྱི་ཡི་གེ་དང་ལཱ་ཏིན་གྱི་ཡི༌གེ གྷི་རིག་པའི་ཡི་གེ་བཅས་ཡིག་རིགས་གསུམ་གྱིས་བྲིས་ཡོད༌པས། ཡ་ཧུ་དཱ་པ་མང་པོས་ཀྱང་ཡི་གེ་དེ་བཀླགས་པ་རེད།

21དེ་ནས་ཡ་ཧུ་དཱ་པའི་མཆོད་དཔོན་ཆེན་པོ་རྣམས་ཀྱིས་པི་ལ་ཏུ༌ལ། ཡ་ཧུ་དཱ་པའི་རྒྱལ་པོ་ཞེས་མི་འབྲི༌བར། ཁོས་ང་རང་ནི་ཡ་ཧུ་དཱ་པའི་རྒྱལ་པོ་ཡིན་ཞེས་སྨྲས་པ་ལྟར་འབྲི་བར་མཛོད་ཅེས་ཞུས་པ༌ལ།

22པི་ལ་ཏུ་ན༌རེ། བདག་གིས་ཇི་ལྟར་བྲིས་པ་དེ་བྲིས་ཟིན་ཞེས་སྨྲས༌སོ།།

23དེ་ནས་དམག་མི་རྣམས་ཀྱིས་སྐྱབས་མགོན་ཡེ་ཤུ་ཤིང་རྒྱ་གྲམ་གྱི་སྟེང་དུ་བརྡབས༌རྗེས། ཁོང་གི་ཕྱི་གོས་སྐལ་བཞི་རུ་བགོས་ནས་དམག་མི་རེ་རེར་ཐོབ་པ༌དང༌། ཁོང་གི་ནང་གོས་ཀྱང་བླངས་པ༌དང༌། ནང་གོས་དེ་ལ་བཙེམ་སྲུབས་ཅི་ཡང་མེད་པར་མགོ་ནས་མཇུག་བར་ཐག་བཏགས་ནས་གྲུབ་པ་ཞིག་ཡིན༌པས།

24དེ་རྣམས་ཀྱིས་ཕན་ཚུན༌ལ། ནང་གོས་འདི་དུམ་བུར་མི་གཤག་པར་རྒྱན་འཕངས་ནས་སུ་ལ་འཐོབ་པར་བལྟའོ་ཞེས་སྨྲས་སོ།། དེ་ནི་གསུང་རབ་ཀྱི་མདོ་ལས་ཇི་སྐད༌དུ། ང་ཡི་ཕྱི་གོས་ཁོ་ཚོས་བགོས་ཏེ༌ཁྱེར།། ང་ཡི་གྱོན་གོས་ཕྱིར་དུ་རྒྱན་འཕངས༌སོ།། ཞེས་གསུངས་པ་བཞིན་འགྲུབ་པའི་ཕྱིར་དེ་ལྟར་བྱུང་བ་ཡིན༌ལ།

25དམག་མི་རྣམས་ཀྱིས་ཀྱང་དེ་བཞིན་དུ་བྱས་སོ།། དེ་ཡང་སྐྱབས་མགོན་ཡེ་ཤུའི་ཤིང་རྒྱ་གྲམ་གྱི་ཉེ་འགྲམ་དུ་ཁོང་གི་ཡུམ་དང་ཨ༌ནེ། གཞན༌ཡང༌། ཀ་ལོ་ཕཱའི་ཆུང་མ་མིར་ཡམ་དང་མཱག་རྡལ་གྱི་མིར་ཡམ་བཅས་ལངས་ནས་བསྡད་ཡོད༌ཅིང༌།

26སྐྱབས་མགོན་ཡེ་ཤུས་རང་གི་ཡུམ་དང་གཅེས་པའི་ཐུགས་སྲས་གཉིས་ཀ་ཉེ་འགྲམ་དུ་ལངས་ནས་བསྡད་ཡོད་པ་གཟིགས་ཏེ་འདི་སྐད༌དུ། ཡུམ༌ལགས། ཁྱེད་ཀྱི་བུ་ལ་གཟིགས་དང་ཞེས་གསུངས༌ཤིང༌།

27ཡང་ཐུགས་སྲས་དེ་ལ་འདི་སྐད༌དུ། ཁྱོད་ཀྱི་ཡུམ་ལ་ལྟོས་དང་ཞེས་གསུངས། དུས་དེ་ནས༌བཟུང༌། ཐུགས་སྲས་དེས་སྐྱབས་མགོན་ཡེ་ཤུའི་ཡུམ་རང་ཁྱིམ་དུ་བསུས་སོ།།

28དེ་ནས་སྐྱབས་མགོན་ཡེ་ཤུས་དོན་ཐམས་ཅད་གྲུབ་ཟིན་པ་མཁྱེན༌ཏེ། གསུང་རབ་ཀྱི་མདོ་ལས་གསུངས་པ་ལྟར་འགྲུབ་པའི༌ཕྱིར། བདག་ལ་སྐོམ་པ་བྱུང་ཞེས་གསུངས་པ༌ན།

29རྒུན་ཆང་སྐྱུར་མོས་བཀང་བའི་སྣོད་ཅིག་གནས་དེར་བཞག་ཡོད་པ༌ལ། ཁོ་རྣམས་ཀྱིས་འགྱིག་སོབ་ཅིག་རྒུན་ཆང་སྐྱུར་མོར་སྦངས༌ཏེ། ཨི་སོབ་ཅེས་པའི་རྩྭ་ཤིང་གི་རྩེ་མོར་བཀལ་ནས་ཁོང་གི་ཞལ་ལ་དྲངས་སོ།།

30དེ་ནས་སྐྱབས་མགོན་ཡེ་ཤུས་རྒུན་ཆང་སྐྱུར་མོ་དེ་བཞེས་པ་དང་དོན་གྲུབ་བོ་ཞེས་གསུངས༌རྗེས། ཁོང་གི་དབུ་དུད་ཅིང་སྐུ་སྲོག་ཕུལ་ཏོ།།

31ཉིན་དེ་ནི་སྟ་གོན་གྱི་ཉིན་མོ་ཡིན་པ༌དང༌། ངལ་གསོ་བའི་ཉིན་མོ་དེ་ནི་དུས་གལ་ཆེན་ཞིག་ཡིན་པས། ཡ་ཧུ་དཱ་པ་རྣམས་ཀྱིས་ངལ་གསོ་བའི་ཉིན༌ལ་ཤིང་རྒྱ་གྲམ་གྱི་སྟེང་དུ་བེམ་པོ་ལུས་ན་མི་འོས་པར་བསམས༌ཏེ། པི་ལ་ཏུའི་དྲུང་དུ་སོང་ནས་དེ་དག་གི་རྐང་པ་བཅག་ནས་བེམ་པོ་རྣམས་འཁྱེར་དགོས་པར་ཞུས་སོ།།

32དེའི༌ཕྱིར། དམག་མི་རྣམས་ཡོང་སྟེ་སྐྱབས་མགོན་ཡེ་ཤུ་དང་ལྷན་དུ་ཤིང་རྒྱ་གྲམ་གྱི་སྟེང་དུ་བརྡབས་ཡོད་པའི་མི་གཉིས་ཀྱི་རྐང་པ་རིམ་བཞིན་བཅག

33འོན༌ཀྱང༌། དམག་མི་རྣམས་སྐྱབས་མགོན་ཡེ་ཤུའི་སྐུ་གདུང་གི་དྲུང་དུ་སླེབས་ནས་ཁོང་ཉིད་སྐུ་གཤེགས་ཟིན་པ་མཐོང་བས་རྐང་པ་མ་བཅག་གོ།

34དེ་ནས་དམག་མི་གཅིག་གིས་སྐྱབས་མགོན་ཡེ་ཤུའི་སྐུ་གདུང་གི་གཞོགས་ལ་མདུང་གིས་བསྣུན་པ་དང་འཕྲལ་དུ་ཁྲག་དང་ཆུ་བཞུར༌བ་རེད།

35ཁྱོད་རྣམས་ཀྱིས་སྐྱབས་མགོན་ཡེ་ཤུ་ལ་དད་པ་བྱེད་པའི༌ཕྱིར། དོན་དེ་མཐོང་བའི་མི་དེས་ དོན་དེར་བདེན་དཔང་བྱས་ཤིང་བདེན་དཔང་དེ་ཡང་བདེན་པ་ཡིན་པར་མ༌ཟད། ཁོས་རང་གི་བཤད་པ་དེ་ཡང་བདེན་པ་ཡིན་པ་ཤེས་སོ།།

36དོན་དེ་རྣམས་ནི་གསུང་རབ་ཀྱི་མདོ་ལས་ཁོང་གི་གདུང་རུས་གཅིག་ཀྱང་གཅོག་པར་མི་འགྱུར་ཞེས༌དང༌།

37ཡང་མདོ་གཞན་ལས་ཇི་སྐད༌དུ། དེ་རྣམས་ཀྱིས་མདུང་གིས་བསྣུན་པ་དེ་ལ་ཡར་བལྟ་བར་འགྱུར་ཞེས་གསུངས་པ་དེ་འགྲུབ་པའི་ཕྱིར་བྱུང་བ་ཡིན༌ནོ།།

38དེ་ཡང་ཨ་རི་མ་ཐཱ་ཡི་ཡོ་སེབ་ཅེས་པ་ནི་ཡ་ཧུ་དཱ་པ་རྣམས་ལ་འཇིགས༌ཏེ། གསང་བའི་ངང་སྐྱབས་མགོན་ཡེ་ཤུའི་རྗེས་འབྲང་པ་བྱས་པ་ཞིག༌ཡིན། དོན་དེ་དག་བྱུང་བའི་རྗེས༌སུ། ཁོས་སྤྱི་དཔོན་པི་ལ་ཏུ་ལ་སྐྱབས་མགོན་ཡེ་ཤུའི་སྐུ་གདུང་ལེན་པར་ཞུ་བ་ཞུས་ཤིང་པི་ལ་ཏུས་ཀྱང་ཆོག་མཆན་བཀོད༌པས། ཁོས་སྐྱབས་མགོན་ཡེ་ཤུའི་སྐུ་གདུང་མར་བླངས་ཏེ་ཁྱེར་ཏོ།།

39གཞན༌ཡང༌། ནེ་ཀོ་དེམ་ཞེས་བྱ་བ་དེ་སྔར་མཚན་མོའི་དུས་སུ་སྐྱབས་མགོན་ཡེ་ཤུར་མཇལ་དུ་ཡོང་བ་དེས་ཀྱང་བྱུགས་རྫས་གུ་གུལ་དང་ཨ་ག་རུ་རྒྱ་མ་བརྒྱ་ཙམ་ཁུར་འོངས༌ཏེ།

40ཁོ་གཉིས་ཀྱིས་ཡ་ཧུ་དཱ་པའི་དུར་འཇུག་གི་ལུགས་སྲོལ༌བཞིན། བསུང་རྫས་བྱུགས་ཡོད་པའི་སོ་རས་ཀྱིས་སྐྱབས་མགོན་ཡེ་ཤུའི་སྐུ་གདུང་ལེགས་པོར་བཏུམས་སོ།།

41སྐྱབས་མགོན་ཡེ་ཤུ་ཤིང་རྒྱ་གྲམ་གྱི་སྟེང་དུ་བརྡབས་པའི་གནས་དེར་སྐྱེད་ཚལ་ཞིག་ཡོད༌ཅིང༌། སྐྱེད་ཚལ་དེའི་ནང་དུ་བེམ་པོ་བཞག་མ་མྱོང་བའི་དུར་ཁུང་གསར་པ་ཞིག་ཀྱང་ཡོད།

42ཉིན་དེ་ནི་ཡ་ཧུ་དཱ་པའི་སྟ་གོན་གྱི་ཉིན་མོ་ཡིན་པ་དང་དུར་ཁུང་དེ་དང་བར་ཐག་ཉེ༌བས། ཁོ་གཉིས་ཀྱིས་སྐྱབས་མགོན་ཡེ་ཤུའི་སྐུ་གདུང་དུར་ཁུང་དེའི་ནང་དུ་སྦས༌སོ།།

← Chapter 18 Jump to: Chapter 20 →