Psalms 105 — Tibetian NTB (བོད་འགྱུར་གསར་མ།)

1ཁྱོད་ཚོས་ཡ་ཝཱེར་གཏང་རག་འབུལ་བ༌དང༌། །ཁོང་གི་མཚན་ལ་ཞུ་བ་ཕུལ་ཞིག༌དང༌། །མི་རྣམས་ཁྲོད་དུ་ཁོང་གི་འཕྲིན་ལས༌བརྗོད།།

2ཁོང་ལ་མགུར་གླུ་ལེན་བཞིན་བསྟོད་བསྔགས་ཕུལ། །ཁོང་གི་ངོ་མཚར་མཛད་པ་ཐམས་ཅད༌གླེངས།།

3ཁོང་གི་དམ་པའི་མཚན་ལ་བསྟོད་བསྔགས་བརྗོད། །ཡ་ཝཱེ་འཚོལ་མཁན་སེམས་ནང་དགའ་བར༌ཤོག།

4ཡ་ཝཱེ་ཁོང་དང་ཁོང་གི་མཐུ་སྟོབས་དང་། །ཁོང་གི་ཞལ་རས་རྒྱུན་དུ་བཙལ་བར་གྱིས།།

5ཁོང་གི་མཛད་པ་ངོ་མཚར་གྲུབ་རྟགས་དང་། །ཞལ་གྱི་ཁྲིམས་གཅོད་བཅས་རྣམས་དྲན་པར༌གྱིས།།

6ཁོང་གི་ཞབས་ཕྱི་ཨབ་ར་ཧམ་གྱི༌རྒྱུད། །ཁོང་གིས་བདམས་པའི་ཡ་ཀོབ་བུ་རྒྱུད༌ཀྱེ།།

7ཁོང་ནི་ང་ཚོའི་དཀོན་མཆོག༌ཡ་ཝཱེ་ཡིན། །ས་གཞི་ཡོངས་སུ་ཁོང་གི་ཁྲིམས་གཅོད༌ཡོད།།

8ཁོང་གི་ཞལ་ཆད་གཏན་དུ་ཐུགས་སུ༌འཇགས། །ཁོང་གི་བཀའ་རྣམས་མི་རབས་སྟོང་ལ༌གནས།།

9ཨབ་ར་ཧམ་ལ་མཛད་པའི་ཞལ་ཆད༌ཡིན། །ཨི་སཱག་ལ་ནི་བཞེས་པའི་དབུ་མནའ༌ཡིན།།

10ཁོང་གིས་ཞལ་ཆད་འདི་ནི་ཡ་ཀོབ༌ལ། །སྒྲིག་ཁྲིམས་བྱས་ནས་གཏན་ལ་ཕབ་པ༌དང༌། །ཡེས་ར་ཨེལ་ལ་གཏན་གྱི་ཞལ་ཆད༌གནང༌།།

11བདག་གིས་ཀ་ན་ཨན་གྱི་ཡུལ་དེ་ནི། །ཁྱོད་ལ་གནང་ཞིང་ཁྱོད་ཀྱི་ས་སྐལ་ཡིན།།

12དེ་དུས་ཁོ་རྣམས་མི་གྲངས་ཉུང་བ༌དང༌། །ཉུང་བར་མ་ཟད་ཡུལ་དེར་བྱེས་པ༌ཡིན།།

13དེ་རྣམས་མི་རིགས་གཅིག་ནས་གཅིག་བརྒྱུད༌ཅིང༌། །རྒྱལ་ཁམས་གཅིག་ནས་གཅིག་ལ་ཉུལ་ནས༌བསྡད།།

14དེ་ཚོར་གཉའ་གནོན་སུ་ལའང་བྱེད་མ༌གནང༌། །ཁོ་ཚོའི་ཆེད་དུ་རྒྱལ་པོར་བཀའ་བཀྱོན༌མཛད།།

15ཁོ་བོས་བྱུགས་པ་རྣམས་ལ་མི་རེག༌ཅིང༌། །ལུང་སྟོན་རྣམས་ལ་གནོད་པ་མ་བསྐྱལ་གསུངས།།

16ཁོང་གིས་ཡུལ་དེར་མུ་གེ་འབྱུང་བར་མཛད། །ཟས་ཀྱི་གཏད་སོ་མཐའ་དག་མེད་པར༌མཛད།།

17ཁོ་ཚོའི་སྔོན་ལ་མི་ཞིག་བརྫངས་པ༌སྟེ། །གཡོག་པོར་བཙོངས་པའི་ཡོ་སེབ་ཡིན་ལགས༌ཤིང༌།།

18དེ་ཡི་རྐང་པ་སྒྲོག་གིས་བསྣད་པ༌དང༌། །མཇིང་པ་ལྕགས་སྒྲོག་རྣམས་ཀྱིས་བཅིངས་པ༌འོ།།

19ཁོང་གིས་གསུངས་པའི་བཀའ་རྣམས་འགྲུབ་པའི༌བར། །ཡ་ཝཱེའི་བཀའ་ཡིས་ཁོང་ལ་ཚོད་བགམ༌མཛད།།

20རྒྱལ་པོས་གཡོག་པོ་བཏང་ནས་ཁོང་བཀྲོལ༌ཞིང༌། །མི་སྡེ་ཁག་གི་བདག་པོས་ཐར་དུ༌བཅུག།

21རྒྱལ་པོའི་ཁབ་ཀྱི་བདག་པོར་ཁོང་བཞག༌ཅིང༌། །རྒྱུ་ནོར་ཐམས་ཅད་ཁོང་གི་དབང་ལ༌བཅུག།

22རྒྱལ་པོའི་འཁོར་གཡོག་རང་དགར་འཆིང་བ༌དང༌། །རྒན་པ་རྣམས་ལ་ཤེས་རབ་བསླབ་ཏུ༌བཅུག།

23ཡེས་ར་ཨེལ་ཡང་ཨེ་ཅིབ་ཡུལ་དུ༌སླེབས། །ཧཱམ་གྱི་ཡུལ་དུ་ཡ་ཀོབ་བྱེས་པར༌ལུས།།

24ཡ་ཝཱེས་ཉིད་ཀྱི་འབངས་མི་མང་དུ༌སྤེལ། །ཁོ་རྣམས་དགྲ་ལས་ཤིན་ཏུ་དར་བར༌མཛད།།

25དགྲ་རྣམས་སེམས་ནི་འབངས་མིར་སྡང་གྱུར༌ཏེ། །ཁོང་གི་ཞབས་ཕྱིར་གཡོ་སྒྱུའི་སྦྱོར་བ༌སྤེལ།།

26ཁོང་གིས་ཉིད་ཀྱི་ཞབས་ཕྱི་མོ་ཤེ༌དང༌། །ཉིད་ཀྱིས་བདམས་པའི་ཨ་རོན་བརྫངས་ནས༌ནི།།

27དགྲ་བོའི་ཁྲོད་དུ་ངོ་མཚར་རྟགས་རྣམས༌བསྟན། །ཧཱམ་གྱི་ཡུལ་དུ་ཡ་མཚན་དོན་རྣམས༌མངོན།།

28ཁོང་གིས་སྨག་རུམ་མངགས་པས་སྨག་རུམ༌འཐིབས། །ཁོང་གི་བཀའ་ལ་ཟློག་ཐབས་ཡེ་མ༌ཡོད།།

29ཁོང་གིས་ཨེ་ཅིབ་ཆུ་རྣམས་ཁྲག་ཏུ༌བསྒྱུར། །དེ་ཚོའི་ཉ་རྣམས་སྲོག་དང་ཕྲལ་བར༌མཛད།།

30དེ་ཚོའི་ཡུལ་དང་རྒྱལ་པོའི་གཟིམ་ཆུང༌དུ། །ག་ས་གང་ལ་སྦལ་བས་གང་བར༌བྱས།།

31ཁོང་གིས་བཀའ་ཞིག་གནང་བར་སྦྲང་ནག༌སླེབས། །སྲིན་བུ་ཤིག་ཀྱང་ཁོ་ཚོའི་ཕྱོགས་བཞིར༌ཐོན།།

32ཆར་བའི་ཚབ་ཏུ་དེ་ཚོར་སེར་བ༌ཕབ། །དེ་རྣམས་ཡུལ་དུ་གནམ་ལྕགས་ཐོག་མདའ༌འཕངས།།

33ཁོང་གིས་དེ་ཚོའི་རྒུན་འབྲུམ་ཤིང་རྣམས༌དང༌། །སེ་ཡབ་ཤིང་ལ་བརྡབས་ཤིང་དེ་དག༌གི །རྒྱལ་ཁམས་ནང་གི་ལྗོན་ཤིང་རྩ་ནས༌བརླག།

34ཁྱེད་ཀྱིས་བཀའ་ཞིག་གནང་བར་གྲངས་མེད༌པའི། །ཆ་ག་འབུ་དང་སྲིན་འབུ་ཡར་ཐོན༌ཞིང༌།།

35དེ་རྣམས་ཡུལ་གྱི་སྔོ་ཚོད་སྣ་ཚོགས༌དང༌། །ཞིང་གི་ལོ་ཏོག་མ་ལུས་ཟོས་པ༌ཡིན།།

36དེ་རྣམས་ཡུལ་གྱི་སྐྱེས་འགོ་ཐམས་ཅད༌དེ། །ཁོ་རྣམས་ལུས་སྟོབས་རྒྱས་དུས་སྐྱེས་པ༌ཡི། །སྐྱེས་འགོ་མཐའ་དག་ཁོང་གིས་བསད་པ༌ཡིན།།

37ཁོང་གི་འབངས་མི་གསེར་དངུལ་དང་བཅས༌བཏོན། །ཉིད་ཀྱི་ཚོ་པ་ཁག་ལས་རྒུད་པ༌མེད།།

38ཨེ་ཅིབ་མི་རྣམས་ཁོ་ཚོར་འཇིགས་པའི༌རྐྱེན། །ཁོ་ཚོ་ཕྱི་རུ་ཐོན་དུས་དེ་རྣམས༌སྤྲོ།།

39ཁོང་གིས་སྤྲིན་ཞིག་ཁེབས་ཀྱི་ཚུལ་དུ༌བཀྲམ། །མཚན་མོར་འོད་སྣང་སྤྲོ་བར་མེ་ཡང༌བསྩལ།།

40དེ་ཚོས་ཞུ་བར་ཁོང་གིས་སྲེག་པ༌དྲངས། །ནམ་མཁའི་ཟས་ཀྱིས་དེ་རྣམས་འགྲང་བར༌མཛད།།

41ཁོང་གིས་བྲག་རྡོ་ཕྱེས་ནས་ཆུ་བརྡོལ༌ཞིང༌། །མྱ་ངམ་ཐང་དུ་གཙང་པོ་ནང་བཞིན༌བརྒྱུགས།།

42ཁོང་གིས་ཞབས་ཕྱི་ཨབ་ར་ཧམ་ལ༌ནི། །གནང་བའི་ཞལ་བཞེས་དམ་པ་དྲན་པས༌སོ།།

43ཁོང་གི་འབངས་མི་དགའ་སྤྲོའི་ངང་ནས༌བཏོན། །བདམས་པའི་མི་རྣམས་དགའ་འབོད་དང་བཅས༌ཁྲིད།།

44མི་རིགས་སོ་སོའི་ཡུལ་རྣམས་དེ་ཚོར༌གནང༌། །གཞན་གྱི་ངལ་བའི་འབྲས་བུ་དེ་ཚོར༌ཐོབ།།

45དེ་ཚོས་ཁོང་གི་ཁྲིམས་སྲོལ་བཞིན་བྱ༌ཞིང༌། །ཉིད་ཀྱི་བཀའ་ཁྲིམས་བསྲུང་བའི་ཆེད་དུ༌ཡིན། །ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌།།