2 Corinthians 12

Bodo NTBPL20 (ସଃର୍ଗାର୍‌ ବାଟ୍‌ ନଃଉଁଆ ନିଅମ୍‌)

← Chapter 11 Jump to: Chapter 13 →

1ଜଦି ହେଁ ଗଃର୍ବ୍‌ କଃର୍ତାର୍‌ ନିକ ନାୟ୍‌, ଅୟ୍‌ଲେକ୍‌ ହେଁ ମକ୍‌ ଗଃର୍ବ୍‌ କଃରୁକେ ହଃଳୁଲି, ମୁୟ୍‌ଁ ମାପ୍ରୁର୍‌ ଦଃର୍ସନ୍‌ ଆର୍‌ ଜାଣାୟ୍‌ଲା କଃତା କୟ୍‌ଦ୍‌ ।

2ମୁୟ୍‌ଁ କ୍ରିସ୍ଟର୍‌ ଗଟେକ୍‌ ଲକ୍‌କେ ଜାଣିଆଚି, ସେ ଚଃଉଦ ବର୍ସ୍‌ ହୁର୍ବେ ତିନି ଲଃମରାର୍‌ ସଃର୍ଗ୍‌ ହଃତେକ୍‌ ନିଆ ଅୟ୍‌ଲା, ସେ ଗଃଗାଳେ ରିଲା କି ଗଃଗାଳାର୍‌ ହଃଦାୟ୍‌ ରିଲା, ମୁୟ୍‌ଁ ନଃଜାଣି; ଇସ୍ୱର୍‌ ଜାଣି ଆଚେ ।

3ହେଁ, ମୁୟ୍‌ଁ ଇବାନ୍ୟା ଗଟେକ୍‌ ଲକ୍‌କେ ଜାଣିଆଚି, ତାକ୍‌ ପାରାଦେସେ ନିଆ ଗଃଲି, ସେ ଗଃଗାଳେ ରିଲା କି ଗଃଗାଳାର୍‌ ହଃଦାୟ୍‌ ରିଲା, ମୁୟ୍‌ଁ ନଃଜାଣି; ଇସ୍ୱର୍‌ ଜାଣି ଆଚେ ।

4ଆର୍‌ ଜାୟ୍‌ରି ମାନାୟ୍‌ କଃଉଁକେ ଅଃଦିକାର୍‌, ଇବାନ୍ୟା ନଃକ୍‌ଉତା କଃତା ସୁଣ୍‌ଲା ।

5ଇବାନ୍ୟା ଗଟ୍‌ ଲକାର୍‌ କଃତାୟ୍‌ ଗଃର୍ବ୍‌ କଃରିନ୍ଦ୍‌, ମଃତର୍‌ ମର୍‌ ନିଜାର୍‌ ବିସୟେ ମର୍‌ ଦୁର୍ବୁଳ୍‌କ୍‌ ଚାଡି ଆର୍‌ କୁୟ୍‌ଲଃଗେ ଗଃର୍ବ୍‌ କଃରୁ ନାହାରି ।

6ଆର୍‌ ଗଃର୍ବ୍‌ କଃରୁକେ ମଃନ୍ ଅୟ୍‌ଲେକ୍‌ ହେଁ ମୁୟ୍‌ଁ ନିର୍ବୁଦିଆ ଅଃଉଁ ନଃଚି, ଜୁୟ୍‌ତାର୍‌ ଗିନେ ମୁୟ୍‌ଁ ସଃତ୍‌ କୟ୍‌ଦ୍‌; ମଃତର୍‌ କଃନ୍‌ଅୟ୍‌ଲେକ୍‌ କୁୟ୍‌ ଲକ୍‌ ଜୁୟ୍‌ରଃକମ୍‌ ଦଃକେଦ୍‌ କି ମର୍‌ ତଃୟ୍‌ହୁଣି ଜୁୟ୍‌ ରଃକମ୍‌ ସୁଣେଦ୍‌, ମର୍‌ ହାକ୍‌ ଜାଣାୟ୍‌ ଅୟ୍‌ଲା କଃତାୟ୍‌ ଅଃଦିକ୍‌ ବଃଡ୍ ଗିନେ ଜଃନ୍‌କଃରି ମର୍‌ କଃତାୟ୍‌ ଅଃଦିକ୍‌ ବଃଲି ବାବତ୍‌ ନାୟ୍‌ ଇତାର୍‌ ଗିନେ ମୁୟ୍‌ଁ ତାକିଜଃଉଁଲେ ।

7ମୁୟ୍‌ଁ ଜଃନ୍‌କଃରି ଅଃଦିକ୍‌ ଗଃର୍ବି ନଃୟ୍‌, ଇତାର୍‌ ଗିନେ ମର୍‌ ଗଃଗାଳେ ଗଟେକ୍‌ କାଟା ଦିଆଗଃଲି, ମକ୍‌ ମାରୁକେ ସୟ୍‌ତାନ୍‌ ଦୁତ୍‌କେ ହଃଟାୟ୍‌ଲି, ହେଁ, ଜଃନ୍‌କଃରି ମୁୟ୍‌ଁ ଅଃଦିକ୍‌ ଗଃର୍ବି ନାୟ୍‌ ।

8ଜଃନ୍‌କଃରି ସେରି ମର୍‌ ତଃୟ୍‌ହୁଣି ଦୁରିକ୍‌ ଅୟ୍‌ଦ୍‌, ଇତାର୍‌ ଗିନେ ମୁୟ୍‌ଁ ମାପ୍ରୁକ୍‌ ସେ ବିସୟେ ତିନିତର୍‌ ଗଃଉଆରି କଃଲେ ।

9ଆର୍‌ ସେ ମକ୍‌ କୟ୍‌ଆଚେ, ମର୍‌ ଦଃୟା ତୁମାର୍‌ ଗିନେ ସଃରି, କାୟ୍‌ତାକ୍‌ବଃଲେକ୍‌ ଦୁର୍ବୁଳ୍‌ ତଃୟ୍‌ ମର୍‌ ସଃକ୍ତି ହୁରୁଣ୍ ଅୟ୍‌ଦ୍‌ । ତଃବେ, ଜଃନ୍‌କଃରି କ୍ରିସ୍ଟର୍‌ ସଃକ୍ତି ମର୍‌ ଉହ୍ରେ ଆସେଦ୍‌, ଇତାର୍‌ ଗିନେ ମୁୟ୍‌ଁ ବଃଡେ ସଃର୍ଦାୟ୍‌ ମଃତର୍‌ ମର୍‌ ଦୁର୍ବୁଳ୍‌ ତଃୟ୍‌ ଗଃର୍ବ୍‌ କଃରିନ୍ଦ୍‌ ।

10ତଃବାର୍‌ଗିନେ କ୍ରିସ୍ଟର୍‌ ଗିନେ ଦୁର୍ବୁଳ୍‌ ତଃୟ୍‌, ଅପ୍‌ମାନେ, ଦୁକେ, ତାଳ୍‌ନା ତଃୟ୍‌, ବିପ୍‌ତି ତଃୟ୍‌ ମୁୟ୍‌ଁ ସଃର୍ଦା ଅୟ୍‌ନ୍ଦ୍; କାୟ୍‌ତାକ୍‌ବଃଲେକ୍‌ ଜଃଡେବଃଳ୍‌ ମୁୟ୍‌ଁ ଦୁର୍ବୁଳ୍‌, ସଃଡେବଃଳ୍‌ ମୁୟ୍‌ଁ ବଃଳ୍‌ବାନ୍ ।

11ମୁୟ୍‌ଁ ନିର୍ବୁଦିଆ ହର୍‌ ବେବାର୍‌ କଃରିନ୍ଦ୍‌, ତୁମିମଃନ୍‌ ମକ୍‌ ବଃଳ୍‌ମାଡ୍ କଃଲାସ୍‌, କାୟ୍‌ତାକ୍‌ବଃଲେକ୍‌ ମର୍‌ ଗୁଣ୍‌ଗିତ୍‌ କଃଉତାର୍‌ ତୁମିମଃନାର୍‌ ବିଦିରିଲି । ଅୟ୍‌ଲେକ୍‌ ହେଁ ମୁୟ୍‌ଁ ଜଦି କାୟ୍‌ରି ନାୟ୍‌, ତଃବେ ହେଁ କାୟ୍‌ କଃତାୟ୍‌ ସେ ସଃରାସଃରି “ପେରିତ୍‌ମଃନାର୍‌” ତଃୟ୍‌ହୁଣି ଉଣା ନାୟ୍‌ ।

12ଜୁୟ୍‌ସଃବୁ ଚିନ୍ ଆର୍‌ କାବାଅଉତା କାମ୍‌ ଆରେକ୍‌ ସଃକ୍ତିର୍‌ କାମ୍‌ ପେରିତ୍‌ମଃନାର୍‌ ଚିନ୍ ହର୍‌, ସେସଃବୁ ସଃତ୍‌କଃରି ତୁମିମଃନାର୍‌ ବିତ୍ରେ ବଃଡେ ସାସେ ସାଦୁନ୍ ଅୟ୍‌ଆଚେ ।

13କାୟ୍‌ତାକ୍‌ ବଃଲେକ୍‌ ମୁୟ୍‌ ନିଜେ ଜେ ତୁମିମଃନାର୍‌ ଉହ୍ରେ ବଜ୍‌ ହର୍‌ ନଇଁ, ଇ ଗଟେକ୍‌ ବିସୟ୍‌ ଚାଡି ବାକି ମଣ୍ଡ୍‌ଳିମଃନାର୍‌ ତଃୟ୍‌ହୁଣି ତୁମିମଃନାର୍‌ ଲଃଗେ ସାନ୍‌ ଅୟ୍‌ ଆଚି? ମର୍‌ ଇ ଦସ୍‌ କେମା କଃରା ।

14ଦଃକା, ମୁୟ୍‌ଁ ତୁମିମଃନାର୍‌ ଚଃମେ ଜଃଉଁକେ ଇ ତିନିତର୍‌ ଜଃଗ୍ରାତ୍‌ ଆଚି, ଆର୍‌ ମୁୟ୍‌ଁ ତୁମିମଃନାର୍‌ ବଜ୍‌ ହର୍‌ ଅଃଉଁ ନଃଚି, କାୟ୍‌ତାକ୍‌ବଃଲେକ୍‌ ମୁୟ୍‌ଁ ତୁମିମଃନାର୍‌ ଦଃନ୍ ନଃଲଳି ତୁମିମଃନ୍‌କେ ଲଳୁଲେ । ଜୁୟ୍‌ତାର୍‌ ଗିନେ ହିଲାଟକିମଃନାର୍‌ ହୟ୍‌ସି ଉବାସିମଃନାର୍‌ ଗିନେ ଅଃର୍ଜ୍‌ତା ନିକ ନାୟ୍‌, ମଃତର୍‌ ହିଲାଟକିମଃନାର୍‌ ଗିନେ ହୟ୍‌ସି ଉବାସିମଃନାର୍‌ ଅଃର୍ଜ୍‌ତା ଦଃର୍‌କାର୍‌ ।

15ମୁୟ୍‌ଁ ତୁମିମଃନାର୍‌ ଆତ୍ମା ଗିନେ ବଃଡେ ସଃର୍ଦାୟ୍‌ ଉହ୍‌କାର୍‌ କଃରିନ୍ଦ୍‌, ହେଁ, ମର୍‌ ହଃରାଣ୍ ହଃତେକ୍‌ ହେଁ ଉହ୍‌କାର୍‌ କଃରିନ୍ଦ୍‌ । ମୁୟ୍‌ଁ ତୁମିମଃନ୍‌କେ ଅଃଦିକ୍‌ ଲାଡ୍‌ କଃରୁଲେ ବଃଲି କାୟ୍‌ ତୁମିମଃନ୍‌କେ ଉଣା ଲାଡ୍‌ କଃରାସ୍‌କି?

16ମଃତର୍‌ ଜାୟ୍‌ରି ଅଃଉଆ, ମୁୟ୍‌ଁ ନିଜେ ତୁମିମଃନ୍‌କେ ବଜ୍‌ ନଃଲାଦ୍‌ଲେ, ମଃତର୍‌ କେକେ କଃଉଁ ହାରେଦ୍‌ ଚଃତୁର୍‌ ଅୟ୍‌ ମୁୟ୍‌ଁ ତୁମିମଃନ୍‌କେ ଚଃଲାକି କଃରି ଦଃର୍ଲେ ।

17ମୁୟ୍‌ଁ ତୁମିମଃନାର୍‌ ଚଃମେ ଜୁୟ୍‌ ଲକ୍‌ମଃନ୍‌କେ ହଃଟାୟ୍‌ ଆଚି, ସେମଃନାର୍‌ ବିତ୍ରେ କାର୍‌ ତଃୟ୍‌ ହୁଣି କି ତୁମିମଃନାର୍‌ ତଃୟ୍‌ହୁଣି କାୟ୍‌ରି ଲାବ୍‌ କଃରି ଆଚି କି?

18ମୁୟ୍‌ଁ ତିତସ୍‌କେ ଜଃଉଁକ୍‌ ଗଃଉଆରି କଃରିରିଲେ, ଆରେକ୍‌ ତାର୍‌ ସଃଙ୍ଗ୍ ସେ ବାୟ୍‌କ୍‌ ହଃଟାୟ୍‌ ରିଲେ । ତିତସ୍‌ କାୟ୍‌ ତୁମିମଃନାର୍‌ ତଃୟ୍‌ହୁଣି କାୟ୍‌ରି ଲାବ୍‌ କଃରିଆଚେ? ଅଃମିମଃନ୍‌ କାୟ୍‌ ଗଟେକ୍‌ ଆତ୍ମାୟ୍‌ ଚାଲାଚାଲ୍‌ତି ନଃକେରୁ? ଅଃମିମଃନ୍‌ କାୟ୍‌ ଗଟେକ୍‌ ହାଦ୍‌ ଚିନେ ଇଣ୍ଡାବୁଲା ନଃକେରୁ?

19ଅଃବେ ହଃତେକ୍‌ ତୁମିମଃନ୍‌କେ ବାବୁଲାସ୍‌, ଅଃମିମଃନ୍‌ ତୁମିମଃନାର୍‌ ଚଃମେ ଦଃସ୍‌ ଲୁକାଉଁଲୁ । ଇସ୍ୱରାର୍‌ ମୁଏଁ କ୍ରିସ୍ଟ କୟ୍‌ଲା ବଃଲି ସେବାକାରି ବାବେ ଅଃମିମଃନ୍‌ କଃତା କଃଉଁଲୁ । ମଃତର୍‌ ଏ ଲାଡାର୍‌ମଃନ୍, ସଃବୁ କଃତା ତୁମିମଃନାର୍‌ ଉହ୍‌କାର୍‌ ଗିନେ କଃଉଁଲୁ ।

20କାୟ୍‌ତାକ୍‌ବଃଲେକ୍‌ କଃଡେବଃଳ୍‌ ମୁୟ୍‌ଁ ଆୟ୍‌ଲେକ୍‌, ତୁମିମଃନ୍‌କେ ଜଃନ୍‌କଃରି ଦଃକୁକ୍‌ ମଃନ୍ କଃରୁଲେ, ସେବାନ୍ୟା ତୁମିମଃନ୍‌କେ ନଃଦେକି, ଆର୍‌ ତୁମିମଃନ୍‌କେ ମକ୍‌ ଜଃନ୍‌କଃରି ଦଃକୁକ୍‌ ମଃନ୍ ନଃକେରାସ୍‌, ସେବାନ୍ୟା ଦଃକା, ଇତାର୍‌ ଗିନେ ମୁୟ୍‌ଁ ଡିରୁଲେ; କଃନ୍‌ସ୍‌ ଅୟ୍‌ଲେକ୍‌ ଜିକାଟାଣା, ଅଃକାର୍‌, ରିସା, ମାଡାଚଃଗା, ଲକାର୍‌ ଲିନ୍ଦା, କାନେ କଃଉଆ କଇ, କୁଟ୍‌କପଟ୍‌, ମାଡ୍‌ଗଳ୍‌ ଅୟ୍‌ଦ୍‌;

21କଃନ୍‌ସ୍‌ ଅୟ୍‌ଲେକ୍‌ ମୁୟ୍‌ଁ ଆରେକ୍‌ ଗଟ୍‌ତର୍‌ ଆୟ୍‌ଲେକ୍‌, ମର୍‌ ଇସ୍ୱର୍‌ ତୁମିମଃନାର୍‌ ବିସୟେ ମକ୍‌ ଆରେକ୍‌ ଗଟ୍‌ତର୍‌ ସାନ୍ କଃରେଦ୍‌, ଆରେକ୍‌ ଜୁୟ୍‌ ଲକ୍‌ମଃନ୍ ହୁର୍ବେ ହାହ୍‌ କଃରି ଆଚ୍‌ତି, ଆର୍‌ ଅଃହ୍‌ଣା ଅଃହ୍‌ଣା କଃଲା ବିଟାଳ୍‌, ଦାରି ଆର୍‌ କଃରାବ୍‌ ଇଚା ଗିନେ ମଃନ୍ ନଃବାଦ୍‌ଲାଉତି, ଇବାନ୍ୟା ଗାଦେକ୍‌ ଲକାର୍‌ ଗିନେ ମୁୟ୍‌ଁ କାନ୍ଦିନ୍ଦ୍‌ ।

← Chapter 11 Jump to: Chapter 13 →