1 Peter 5

Bodo BDVNT (ବ୍‌ଡ଼୍ ହ୍‌ର୍‌ଜା ବାଇବଲ)

← Chapter 4 Jump to:

1ତୁମାର୍ ଦ୍‌ଳେ ରେତା ପାରାଚିନ୍‌ମ୍‌ନ୍‌କେ ଅବେ ମର୍ କିଚି କ୍‌ଉତାର୍ ଆଚେ। ମୁଇ ହେଁ ଗଟେକ୍ ପାରାଚିନ୍, ମୁଇ ଖ୍ରୀଷ୍ଟର୍ କ୍‌ଷ୍ଟ୍‌ ନିଜାର୍ ଆକି ଲ୍‌ଗେ ଦ୍‌କିଆଚି। ଆମୁକେ ଜୁଇ ମଇମା ବ୍‌ବିସତ୍‌ରେ ଦ୍‍କାଇ ଦିଆଅଇଦ୍ ସେତି ହେଁ ମୁଇ ବାଗି ଅଇନ୍ଦ୍।

2ମୁଇ ତୁମୁକେ ଗ୍‌ଉଆରୁଲେ, ଇଶ୍ଵର୍ ଜୁଇ ମେଣ୍ଢାମ୍‍ନ୍‍କାର୍ ଦାଇତ୍ ତୁମାର୍ ଆତେ ସ୍‌ହ୍‌ରି ଆଚେ, ତୁମି ମେଣ୍ଢା ଗ୍‌ଉଡିଆ ହ୍‌ର୍ ଅଇ ସେ ମେଣ୍ଢାମ୍‌ନ୍‌କାର୍ ଜ୍‌ତୁନ୍ ନେତା ଦ୍‌ର୍‌କାର୍। ସେମ୍‌ନ୍ ଇଶ୍ଵରାର୍ ମେଣ୍ଢାଦ୍‌ଳ୍। ତୁମି ଜ୍‌ବର୍ ଦସ୍‌ତି ନଇ, ମ୍‌ତର୍ ନିଜାର୍ ଇଚାରେ ଜ୍‌ତୁନ୍ ନିଆ। ଇଶ୍ଵର୍ ଇରି ମ୍‌ନ୍‌କ୍‌ରେଦ୍‌। ତୁମୁକେ ସେବା କ୍‌ରୁକେ ସ୍‌ର୍‌ଦା ଲାଗୁଲି ବ୍‌ଲି ବାବି କ୍‍ରା। ଡାବୁ ହାଉତାର୍ ଲାଳ୍‌ସାରେ କ୍‍ରାନାଇ।

3ଜୁଇମ୍‌ନ୍‌କାର୍ ଦାଇତ୍ ତୁମି ନ୍‌ଇ ଆଚାସ୍, ସେମ୍‌ନ୍‌କାର୍ ଉହ୍‌ରେ ରାଜ୍ କ୍‍ରାନାଇ। ସେମ୍‌ନ୍‌କାର୍ ହାଇଁ ନିଜେ ବ୍‍ଲ୍ ଉଦାହ୍‌ର୍‌ଣ୍ ହ୍‌ର୍ ଅଇରିଆ।

4ଜ୍‌ଡେବ୍‌ଳ୍ ଯୀଶୁ ଖ୍ରୀଷ୍ଟ ବ୍‌ଡ୍ ମେଣ୍ଢା ଗ୍‌ଉଡିଆ ଲେଉଟି ଆସେଦ୍, ତୁମାର୍ ମୁଣ୍ତାର୍ ହାଇଁ ମୁକୁଟ୍ ଇନାମ୍ ଦ୍‌ଇଦ୍। ସେରି କ୍‌ବେ ତାର୍ ସୁନ୍ଦୁର୍ କମ୍ ଅଇନ୍‌କେରେ।

5ସେନ୍‌କାହ୍‌ର୍, ଏ ଦ୍‌ଙ୍ଗ୍‌ଳାମ୍‌ନ୍ ତୁମିମ୍‍ନ୍ ପାରାଚିନ୍ ଲକାର୍ କ୍‌ତା ମାନ୍‌ତା ଉଚିତ୍। ତୁମି ସ୍‌ବୁଲକ୍ ନିଜାର୍ ନିଜାର୍ ବିତ୍‌ରେ ଦ୍‌ର୍‌ମ୍ ବାବ୍‌ରେ ସାଇଜ କ୍‌ରାକ୍‌ରି ଅଉଆ। କାଇତାକ୍ ପବିତର୍‌ ଶାସ୍‌ତର୍ ତ୍‌ଇ ଲେକାଆଚେ “ଇଶ୍ଵର୍ ଆକାରିଆମ୍‌ନ୍‌କେ ତେବାଇ କ୍‍ରି ଦ୍‌ର୍‌ମ୍ ଲକ୍‌ମ୍‍ନ୍‌କେ ଦୟା କ୍‍ରେଦ୍।”

6ସେତାର୍‍ଗିନେ ଇଶ୍ଵରାର୍ ଶ୍‌କ୍‌ତିଶାଳି ଆତ୍ ତ୍‌ଳେ ନିଜ୍‍କେ ଦ୍‌ର୍‌ମ୍ କ୍‌ରାଅ। ସେନ୍‌ଅଇଲେକ୍ ଟିକ୍ ସ୍‌ମୟ୍ ଆଇଲେକ୍ ସେ ତୁମୁକେ ଉହ୍‌ରେ ଉଟାଇଦ୍।

7ତୁମାର୍ ସ୍‌ବୁ ଚିନ୍‍ତା ଇଶ୍ଵରାର୍ ଉହ୍‌ରେ ଚାଡା, କାଇତାକ୍ ସେ ତୁମାର୍ ଜ୍‌ତୁନ୍ ନ୍‌ଇଦ୍।

8ନିଜାର୍ ଆଇତେ ର୍‌ଇ ଜାଗ୍‌ରତ୍ ଅଇରିଆ। ଶଇତାନ୍‌ ଅମ୍‌ଲି ତୁମାର୍ ଶ୍‍ତ୍‍ରୁ, ସେ ଅଦାଙ୍ଗ୍ କ୍‌ର୍‌ତା ସିଂହବାଗ୍ ହ୍‌ର୍, କାକେ କ୍‌ଡେବ୍‌ଳ୍ ଚାବି କାଇନ୍ଦ୍ ବ୍‌ଲି ଚାରିବାଟ୍ କଜି ବୁଲୁଲି।

9ସଇତାନାର୍ ହ୍‌ଚେ ଜ୍‌ହାନାଇ, ନିଜାର୍ ବିଶ୍‌ବାସ୍‌ରେ ଡାଟ୍ଅଇ ରିଆ। ହୁରା ଜଗତାର୍ ତୁମାର୍ ବାଇ ଆର୍ ବେଣିମ୍‌ନ୍ ସ୍‌ମାନ୍ ବାବ୍‌ରେ ତୁମାର୍ ହ୍‌ର୍ କ୍‌ଷ୍ଟ୍‌ ହାମ୍‌ଲାଇ, ଇକ୍‍ତା ତୁମି ଜାଣାସ୍।

10ତୁମି ଅଳକ୍ ସ୍‌ମୟ୍ ହାଇଁ କ୍‌ଷ୍ଟ୍‌ ହାଉଆସ୍, ମ୍‌ତର୍ ତାର୍ ହ୍‌ଚେ ଇଶ୍ଵର୍ ସ୍‌ବୁ ଟିକ୍ କ୍‍ରି ଦ୍‌ଇଦ୍, ସେ ତୁମୁକେ ଶ୍‌କ୍‌ତିଶାଳି କ୍‍ରେଦ୍, ସେ ତୁମାର୍ ବଜ୍ ବଇଦ୍ ଆର୍ ଅଦୁର୍‌ତା ବ୍‌ଳ୍ ତୁମୁକେ ଉଟାଇଦ୍, ସେ ଇଶ୍ଵର୍ ତୁମୁକେ ସ୍‌ବୁ ଦୟାର୍ ଆଶିର୍‌ବାଦ୍‌ ଦ୍‌ଇଦ୍, ଖ୍ରୀଷ୍ଟ ଯୀଶୁର୍ ତ୍‌ଇ ନ୍‌ସେର୍‍ତା ମଇମାରେ ବାଗିଦାର୍ ଅମ୍‌କେ ସେ ତୁମୁକେ କୁଦିଆଚେ।

11ସ୍‌ବୁବ୍‌ଳ୍ ହାଇଁ ସ୍‌ବୁଶ୍‌କ୍‌ତି ଇଶ୍ଵରାର୍ ହ୍‌କା ଅଇଦ୍‌, ଆମେନ୍।

12ବାଇ ସିଲାନ୍ ସାଇଜରେ ମୁଇ ଇ ସାନ୍ ଚିଟି କ୍‍ଣ୍ଡେକ୍ ଲେକୁଲେ, ସେ ଖ୍ରୀଷ୍ଟର୍ ତ୍‌ଇ ଗଟେକ୍ ବିସାସ୍ ବାଇବ୍‌ଲି ମୁଇ ଜାଣି, ଇରି ତୁମୁକେ ଶାନ୍‌ତି ଦେମ୍‌କେ ଆର୍ ସାସ୍ କ୍‌ରାମ୍‌କେ ମୁଇ ଲେକିରିଲେ, ମୁଇ ତୁମୁକେ କ୍‍ମ୍‍କେ ମ୍‌ନ୍‌କ୍‌ର୍‌ତି ରିଲେ ଯେ ଇରି ଅମ୍‌ଲି ଇଶ୍ଵରାର୍ ଦୟା, ସେ ଦୟାରେ ଡାଟ୍ଅଇ ରିଆ।

13ତୁମାର୍‌ମ୍‌ନ୍‌କାର୍ ହ୍‌ର୍ ବାଚାଇଅଇଲା ବାବିଲୋନ୍ ସ୍‌ହ୍‌ରାର୍ ବିଶ୍‍ବାସି ଆର୍ ମର୍ ହିଲାହର୍ ମାର୍କ ହେଁ ତୁମୁକ୍‍ମ୍‌ନ୍‍କେ ଜୁଆର୍ ଜାଣାମ୍‌ଲାଇ।

14ନିଜାର୍ ନିଜାର୍ କେ ଖ୍ରୀଷ୍ଟାନ୍ ଲାଡେ ଆତ୍ ମିସାଇ ଯୁଆର୍ କ୍‍ରା। ଖ୍ରୀଷ୍ଟର୍ ଲ୍‌ଗେ ରେତା ତୁମି ସ୍‍ବୁଲକାର୍‌ ଉହ୍‌ରେ ଶାନ୍‌ତି ଅଉଅ।

← Chapter 4 Jump to: