2 John 1

Bodo BDVNT (ବ୍‌ଡ଼୍ ହ୍‌ର୍‌ଜା ବାଇବଲ)

Jump to:

1ମୁଇ ଯୋହନ୍ ପାରାଚିନ୍, ଇଶ୍ୱରାର୍‌ ତ୍ଇହ୍‍ଣି ବାଚ୍‌ଲା ମାଇଜି ଟକି ଆର୍ ତାର୍ ହିଲାମ୍‌ନ୍‌କାର୍ ଲ୍‌ଗେ ଇ ଚିଟି ଲେକୁଲେ। ସେମ୍‌ନ୍‌କେ ମୁଇ ଇଶ୍ୱରାର୍‌ ସ୍‌ତ୍‌କ୍‌ରି ଲାଡ୍ କ୍‌ରୁଲେ, ଚୁଚାଇ ମୁଇ ସେ ନଇ ମ୍‌ତର୍ ସ୍‌ତ୍ ଜାଣିରିଲା ସ୍‌ବୁଲକ୍ ହେଁ ଲାଡ୍ କ୍‌ରୁଲାଇ।

2ଅମାର୍ ଜୀବନେ ଜୁଇ ସ୍‌ତ୍ ଆଚେ, ସେତାର୍‍ଗିନେ ଅମି ତୁମୁକ୍‌ମ୍‌ନ୍ ଲାଡ୍ କ୍‌ରୁଲୁ ଇସ୍‌ତ୍ ଅମାର୍‌ମ୍‍ନ୍‍କାର୍ ତ୍‌ଇ ସ୍‌ବୁଦିନାର୍ ଲାଗି ର୍‌ଇଦ୍।

3ଉବା ଇଶ୍ଵର୍ ଆର୍ ତାର୍ ହଇସି ଯୀଶୁ ଖ୍ରୀଷ୍ଟର୍ ତ୍ଇହ୍‍ଣି ଦୟା, କ୍ରୁପା ଆର୍ ଶାନ୍‌ତି ଅମାର୍ ସ୍‌ଙ୍ଗ୍ ସ୍‌ତ୍‌କ୍‌ରି ଆର୍ ଲାଡାର୍ ସ୍‌ଙ୍ଗ୍ ରେଇଦ୍।

4ମୁଇ ତୁମୁକ୍‌ମ୍‌ନ୍ କ୍‍ତେକ୍ ହିଲାମ୍‌ନ୍‌କାର୍ ବିଷୟେ ଶୁଣି ସ୍‌ର୍‌ଦା ଅଇଲେ। ମୁଇ ବେସି ସ୍‌ର୍‌ଦା ଯେ, ଉବାର୍ ଆଦେଶ୍ ଅନୁସାରେ ସେମ୍‍ନ୍ ସ୍‌ତ୍ ବାଟ୍ ଇଣ୍ଡୁଲାଇ।

5ଏ ମର୍ ଲାଡାର୍ ବେଣି ମୁଇ ତୁମୁକ୍‌ମ୍‌ନ୍ କ୍‌ମ୍‌ଲେ ଅମିସ୍‌ବୁ ଲକ୍‌କେ ଲାଡ୍ କ୍‌ର୍‌ତା ଦ୍‌ର୍‌କାର୍, ଇରି ଗଟେକ୍ ନ୍‌ଉଆ ଆଦେଶ୍ ନ୍‌ଇ, ଇରି ସେ ଆଦେଶ୍ ଜୁଇରି ଅମାର୍‌ମ୍‌ନ୍‌କାର୍‌ ଲ୍‌ଗେ ଆଗେହ୍‍ଣି ଆଚେ।

6ଆରେକ୍‌ ଲାଡାର୍ ଅର୍‌ତ ଅମ୍‌ଲି ତାର୍ ଆଦେଶ୍ ଅନୁସାରେ ଜୀବନ୍ କାଟୁମା। ଇଶ୍ୱରାର୍‌ ଆଦେଶ୍ ଇରି ତୁମି ନିଜାର୍ ନିଜାର୍ ଲାଡ୍‌ କ୍‌ରାକ୍‌ରି ଅଉଆ। ତୁମି ଇ ଆଦେଶ୍ ଆଗେହ୍‍ଣି ଶୁଣିଆଚାସ୍।

7ଇ ଜ୍‍ଗତେ ଅବେ ବେସି ମିଚ୍ ଶିକ୍ୟା ଦେତା ଗୁରୁମ୍‌ନ୍ ବାର୍‌ଲାଇନି, ଯୀଶୁ ଖ୍ରୀଷ୍ଟ ଇ ଜ୍‍ଗତ୍‍ ତ୍‌ଇ ମାନାଇର୍ ଗ୍‌ଗାଳ୍ ଦ୍‍ରି ଆସିଆଚେ, ଇରି ସେମ୍‍ନ୍ ନ୍‌ମାନ୍‌ତି। ଇ ସ୍‌ତ୍‌କେ ନ୍‌ମାନ୍‌ତା ସ୍‌ବୁ ଲକ୍ ଏକ୍‍ଲା ଏକ୍‍ଲା ମିଚ୍ ଶିକ୍ୟା ଦ୍‌ଇ ଟକ୍‍ତା ଗୁରୁମ୍‌ନ୍ ଖ୍ରୀଷ୍ଟର୍ ବିରଦି।

8ଜାଗ୍‌ରତ୍ ଅଇରିଆ, ଜ୍‌ନ୍‌କ୍‌ରି ତୁମି କ୍‍ଲା କାମାର୍ ପୁରୁସ୍‌କାର୍ ଆରାଉଆ ନାଇ, ଜ୍‌ନ୍‌କ୍‌ରି ତୁମି ତୁମାର୍ ପୁରୁସ୍‌କାର୍ ହାଉଆସ୍ ସେତାର୍‌ଲାଗି ତୁମି ଜ୍‌ତୁନ୍ ଅଇରିଆ।

9ସ୍‌ବୁ ଲକ୍ ଖ୍ରୀଷ୍ଟର୍ ଶିକ୍ଷାକେ ମାନି ଚାଲ୍‌ତା ଉଚିତ୍। ଯ୍‌ଦି କେ ଖ୍ରୀଷ୍ଟର୍ ଶିକ୍ଷାକେ ବାଦ୍‌ଲାଇଦ୍ ତ୍‍ବେ ସେ ଲକାର୍ ଲ୍‌ଗେ ଇଶ୍ଵର୍ ସ୍‌ଙ୍ଗ୍ ସ୍‌ମ୍‌ପର୍‌କ ନାଇ। ଯ୍‌ଦି କୁଇଲକ୍ ଖ୍ରୀଷ୍ଟର୍ ଶିକ୍ୟା ମାନି ଚାଲେଦ୍ ତ୍‍ବେ ସେ ଲକାର୍ ଲ୍‌ଗେ ଉବା ଇଶ୍ଵର୍ ଆର୍ ତାର୍ ହଇସି ସ୍‌ଙ୍ଗ୍ ସ୍‌ମ୍‌ପର୍‌କ ଆତ୍‍ତି।

10ଯ୍‌ଦି ତୁମାର୍ ଲ୍‌ଗେ କେ ଆସେଦ୍ ମ୍‍ତର୍ ଇ ଶିକ୍ୟା ଦ୍‌ଇନ୍‌କେରେ, ତ୍‍ବେ ତାକେ ଗ୍‍ରେ ହୁରାଉଆ ନାଇ ଆର୍ ଜୁଆର୍ କ୍‍ରାନାଇ।

11ଯ୍‌ଦି ତୁମି ତାକେ ଗ୍‌ରେ ହୁରାଉଆସ୍ ତ୍‍ବେ ତାକେ କ୍‍ରାପ୍ କ୍‌ରୁକେ ବାଗିଦାର୍ ଅମ୍‍ଲାସ୍।

12ତୁମୁକେ ମୁଇ କ୍ଉତାର୍ ବେସି ବିଷୟ୍ ଆଚେ ମ୍‍ତର୍ ମୁଇ କାଗଜେ ଆର୍ ସିରା କି ପେନେ ସେରି ଲେକି ନ୍‌କେରି, ସେତାର୍ ବାଦୁଲେ ମୁଇ ତୁମୁକ୍‌ମ୍‌ନ୍ ବେଟ୍‌ ଅମ୍‌ନ୍ଦ୍‌ ବ୍‌ଲି ଆଶା କ୍‌ରୁଲେ, ତ୍‍ବେ ଅମି ସାମ୍‌ନା ସାମ୍‌ନି ଅଇ କ୍‌ତାବାର୍‍ତା କ୍‍ରୁମା, ସେରି ଅମୁକେ ବେସି ସ୍‌ର୍‌ଦା କ୍‍ରେଦ୍।

13ଇଶ୍ୱରାର୍‌ ଦ୍ବାରା ବାଚ୍‌ଲା ତୁମାର୍ ବେଣ୍‌ଦିର୍ ହଇସିମ୍‌ନ୍ ତୁମୁକ୍ ସେମ୍‍ନ୍‍କାର୍ ଯୁଆର୍ ଜାଣାମ୍‌ଲେ।

Jump to: