Colossians 4

Bodo BDVNT (ବ୍‌ଡ଼୍ ହ୍‌ର୍‌ଜା ବାଇବଲ)

← Chapter 3 Jump to:

1ଏ ମାଲିକ୍ ମ୍‌ନ୍, ଜାଇରି ସୁନ୍ଦୁର୍ ଆର୍ ଜ୍‌ନ୍‌କ୍‌ରି ତୁମିମ୍‍ନ୍ ସେବାକ୍‌ର୍‌ତା ଲକ୍‌କେ ଦିଆସ୍, ମ୍‌ନେର୍‌କା ଯେ ସ୍‌ର୍‌ଗେ ହେଁ ତୁମାର୍‌ମ୍‌ନ୍‌କାର୍ ଗଟେକ୍ ମାଲିକ୍ ଆଚେ।

2ସ୍‌ବୁବ୍‌ଳ୍ ପାର୍‌ତେନା କ୍‌ର୍‌ତେରିଆ, ପାର୍‍ତେନା କ୍‌ଲାବ୍‌ଳ୍ ସ୍‌ବୁବ୍‌ଳ୍ ଇଶ୍ଵର୍‍କେ ଦନ୍ୟବାଦ୍‌ ଦିଆସ୍।

3ଅମାର୍ ଗିନେ ହେଁ ପାର୍‍ତେନା, ଇଶ୍ଵରାର୍ କ୍‌ବର୍ ଲକ୍‌ମ୍‍ନ୍‌କେ କ୍‍ମ୍‍କେ ଅମୁକେ ସୁଜଗ୍ ଦିଲେକ୍, ଇଶ୍ଵର୍‍କେ ପାର୍‌ତେନା କ୍‍ରା, ଖ୍ରୀଷ୍ଟର୍ ବିଷୟେ ଇଶ୍ଵର୍ ଜୁଇ ଲୁକିରିଲା ଶ୍‌ବ୍‌ଦ ଜାଣାଇଦ୍, ତାକେ ଜ୍‌ନ୍‌କ୍‌ରି ଅମି ପର୍‌ଚାର୍ କ୍‌ରୁନ୍ଦ୍, ସେତାର୍‍ଗିନେ ପାର୍‌ତେନା କ୍‍ରା। ଇ ଶ୍‌ବ୍‌ଦ ପର୍‌ଚାର୍ କ୍‍ରୁଲିସ୍ ବ୍‌ଲି ମୁଇ ଜେଲ୍ ଗ୍‍ରେ ବନ୍ଦି।

4ମୁଇ ଜ୍‌ନ୍‌କ୍‌ରି ଇ ସ୍‌ବ୍‌ଦ୍‌ ଲକ୍‌ମ୍‌ନ୍‌କାର୍‌ ଆଗେ ବ୍‌ଲ୍‌କ୍‍ରି କ୍‌ମ୍‌ହାରି, ସେତାର୍‍ଗିନେ ପାର୍‌ତେନା କ୍‍ରା, ମୁଇ ସେରି କ୍‌ର୍‌ତା ଦ୍‌ର୍‌କାର୍।

5ବିଶ୍‍ବାସ୍ ନ୍‌କେର୍‌ତା ଲକ୍‌ସ୍‌ଙ୍ଗ୍‌ ବ୍ଯବହାର୍ କ୍‌ଲାବ୍‌ଳ୍ ବୁଦିର୍ ସ୍‌ଙ୍ଗ୍ ବ୍ଯବହାର୍ କ୍‍ରା ଜ୍‌ତେକ୍ ବ୍‌ଲ୍‌ ବାବ୍‌ରେ ହାରାସ୍‌ ନିଜାର୍ ସମୟକେ ବ୍‌ଲ୍‌କ୍‍ରି ବିତାଉଆ।

6ତୁମିମ୍‍ନ୍ କ୍‌ତାବାର୍‍ତା କ୍‌ଲାବ୍‌ଳ୍, ସ୍‌ବୁବ୍‌ଳ୍ ମ୍‌ନେ ଦୟାକ୍‌ରା ଆର୍ ବୁଦି କ୍‌ଟାଉଆ, ତ୍‍ବେ ତୁମିମ୍‍ନ୍ ସ୍‌ବ୍‌କେ ଟିକ୍ ଉତର୍ ଦେମ୍‌କେ ହାରାସ୍‌।

7ଯୀଶୁ ଖ୍ରୀଷ୍ଟର୍ ହାଇଁ ମର୍ ଲାଡାର୍ ବାଇ ତୁଖିକ, ଗଟେକ୍ ସେବାକ୍‌ର୍‌ତା ଲକ୍ ଆର୍ ମର୍‌ସ୍‍ଙ୍ଗ୍‌ ମାପ୍‌ରୁର୍ ସେବାକ୍‌ର୍‌ତା ଗଟେକ୍ ଲକ୍ ଆଚେ, ମର୍‌ସ୍‍ଙ୍ଗ୍‌ ଜାଇରି ଗ୍‌ଟୁଲି, ସେ ସ୍‌ବୁକ୍‍ତା ସେ ତୁମୁକ୍‌ମ୍‌ନ୍ କଇଦ୍

8ସେତାର୍‍ଗିନେ ମୁଇ ତାକେ ହ୍‌ଟାମ୍‌ଲେ, ମୁଇ ମ୍‌ନ୍‌ କ୍‌ରୁଲେ ଯେ, ଅମିମ୍‌ନ୍ କ୍‍ନ୍‍କ୍‍ରି ଆଚୁ, ସେରି ତୁମିମ୍‍ନ୍ ଜାଣା।

9ସେ ତୁମୁକ୍‌ମ୍‌ନ୍ ସ୍‌ର୍‌ଦା କ୍‍ରେଦ୍, ମୁଇ ଅନୀସିମକେ ହ୍‌ଟାମ୍‌ଲେ, ଅନୀସିମ ଖ୍ରୀଷ୍ଟର୍ ତ୍‌ଇ ରେତା ଗଟେକ୍ ବିଶ୍‍ବାସି ଆର୍ ଲାଡାର୍ ଆଚେ, ସେ ତୁମାର୍‌ମ୍‌ନ୍‌କାର୍ ଦ୍‌ଳାର୍ ଆଚେ, ତୁଖିକ ଆର୍ ଅନୀସିମ, ଇତି ଗ୍‌ଟ୍‌ଲା ସ୍‌ବୁ ବିଷଇ ତୁମୁକ୍‌ମ୍‌ନ୍ କଇଦେ।

10ଆରିସ୍ତାର୍ଖକେ ଜୁଆର୍ ଜାଣାମ୍‌ଲେ, ସେ ମର୍‌ସ୍‍ଙ୍ଗ୍‌ ଏକ୍‍ଲା ବନ୍ଦି, ବର୍ଣ୍ଣବାର୍ କୁଟୁମ୍ ବାଇ ମାର୍କକେ ଜୁଆର୍ କ୍‌ରୁଲେ, (ମୁଇ ଆଗେହ୍‍ଣି ତାର୍ ବିଷୟେ କଇ ସ୍‌ରିଆଚି, ସେ ଯଦି ଆସେଦ୍, ତାକେ ସ୍‌ର୍‌ଦା କ୍‌ରାମା)।

11ଆରେକ୍‌ ଯୀଶୁ ଯାକେ ଯୂସ୍ତ ବ୍‌ଲି ହେଁ ଲକ୍ କୁଦ୍‌ତି ତୁମୁକ୍‌ମ୍‌ନ୍ ଜୁଆର୍ ଜାଣାମ୍‌ଲେ, ଯିହୁଦିମ୍‌ନ୍ ସୁନତ୍ ଅଇଲା ବିଶ୍‍ବାସିମ୍‌ନ୍‌କାର୍ ବିତ୍‌ରେ କେବଳ୍ ଏମ୍‌ନ୍ ହ୍‌କା ଇଶ୍ଵରାର୍ ରାଇଜେ ମର୍‌ସ୍‍ଙ୍ଗ୍‌ କାମ୍ କ୍‌ର୍‌ତି, ସେମ୍‍ନ୍ ଅବେହ୍‌ତେକ୍ ମର୍ ଶାନ୍‌ତିର୍ ନାଉଁର୍‌ ଅଇଆତ୍‌ତି।

12ଏପାଫ୍ରା ତୁମୁକ୍‌ମ୍‌ନ୍ ଜୁଆର୍ କ୍‌ରୁଲା, ସେ ଯୀଶୁ ଖ୍ରୀଷ୍ଟର୍ ଗଟେକ୍ ସେବାକ୍‌ରତା ଲକ୍, ସେ ତୁମାର୍‌ମ୍‌ନ୍‌କାର୍ ଦ୍‌ଳାର୍ ଲକ୍‌, ସେ ସ୍‌ବୁବ୍‌ଳ୍ ତୁମାର୍‌ମ୍‌ନ୍‌କାର୍ ଗିନେ ପାର୍‍ତେନା କ୍‌ରୁଲା, ତୁମିମ୍‍ନ୍ ଇଶ୍ଵରାର୍ ଗିଆନ୍‌କେ ଶିକା, ଆର୍ ଇଶ୍ଵର୍ ଯାଇରି ମ୍‌ନ୍‌କ୍‍ରେଦ୍, ସେରି ସେନ୍‌କାର୍ ଅଉଆ ବ୍‌ଲି ସେ ପାର୍‌ତେନା କ୍‍ରେଦ୍।

13ସେ ତୁମାର୍‌ମ୍‌ନ୍‌କାର୍ ହାଇଁ ଲାଅଦିକିଆ ଆର୍ ହିଏରାପଲିର୍ ଲକ୍‌ମ୍‌ନ୍‌କାର୍‌ ହାଇଁ ବେସି ପରିଶ୍ରମ୍ କ୍‌ର୍‌ତି ବ୍‌ଲି ମୁଇ ଜାଣି।

14ଏ ଲାଡାର୍ ଡାକ୍‍ଟର୍ ଲୁକ ଆର୍ ଦୀମା ତୁମୁକ୍‌ମ୍‌ନ୍ ଜୁଆର୍ ଜାଣାମ୍‌ଲା।

15ଲାଅଦିକିଆ ସ୍‌ହରେ ରେତା ବାଇ ଆର୍ ବେଣିମ୍‌ନ୍‌କେ ଜୁଆର୍ ଜାଣାଉଆ, ନୁମ୍‌ଫା ଆର୍ ତାର୍ ଗ୍‌ରେ ମିସିରେତା ମ୍‌ଣ୍ତଳିମ୍‌ନ୍‌କେ ନ୍‌ମସ୍‌କାର୍ ଜାଣାଉଆ।

16ଇ ଚିଟି ତୁମାର୍ ତ୍‌ଇ ହଡି ସ୍‌ର୍‌ଲେକ୍, ଲାଅଦିକିଆର୍ ମ୍‌ଣ୍ତଳିମ୍‌ନ୍‌କେ ଇ ଚିଟି ହଡୁକେ ଦିଆସ୍, ଲାଅଦିକିଆକେ ଜୁଇ ଚିଟି ଲେକୁଲେ, ତାକେ ତୁମିମ୍‍ନ୍ ହେଁ ହଡା।

17ଆର୍ଖିପକେ କ୍‌ଉଆ, ମାପ୍‌ରୁ ଜୁଇକାମ୍ ଦ୍‌ଇଆଚେ, ସେରି ପୁରା କ୍‌ରୁକେ ବାବା।

18ମୁଇ ପାଉଲ୍, ନିଜେ ଆତେ ଲେକି ତୁମୁକ୍‍ମ୍‌ନ୍‍କେ ଜୁଆର୍ ଜାଣାମ୍‌ଲେ, ମୁଇ ଜେଲ୍‌ଲ୍‌ଗେ ର୍‌ଇ ଦୁକ୍ ବଗ୍‌ଲାର୍ ଏତାଉଆ, ତୁମାର୍‌ମ୍‌ନ୍‌କାର୍ ତ୍‌ଇ ଇଶ୍ଵରାର୍ ଦୟା ରେଅ, ଆମେନ୍।

← Chapter 3 Jump to: