James 5

Bodo BDVNT (ବ୍‌ଡ଼୍ ହ୍‌ର୍‌ଜା ବାଇବଲ)

← Chapter 4 Jump to:

1ଅବେ ଦ୍‌କା, ଏ ଦନୀ ଲକ୍‍ମ୍‍ନ୍, ଶୁଣା! ତୁମିମ୍‍ନ୍ କାନ୍ଦା ଆର୍ ବେସି ଦୁକ୍ ଅଉଆ। କାଇତାକ୍ ବେସି ଦୁକ୍‍କ୍‍ଷ୍ଟ ତୁମାର୍ ଉହ୍‌ରେ ମାଡି ଆସୁଲି।

2ତୁମାର୍‌ମ୍‌ନ୍‌କାର୍ ଦ୍‍ନ୍ ସ୍‌ମ୍‍ପତି ନ୍‌ଷ୍ଟ୍‌ ଅମ୍‌ଲି ଆର୍ ସେ ଦ୍‌ନାର୍ ମୁଲିୟ ନାଇ। ତୁମାର୍‌ମ୍‌ନ୍‌କାର୍ ହ୍‌ଚିଆ କିଳା କାମ୍‌ଲାଇ।

3ଆରେକ୍‌ ତୁମାର୍‌ମ୍‌ନ୍‌କାର୍ ସନା ଆର୍ ରୁହାକେ ମାଟି କାମ୍‌ଲି। ଇରି ନ୍‌ଷ୍ଟ୍‌ ଅଇ ହ୍‍ର୍‍ମାଣ୍ କ୍‌ରୁଲେ ଯେ, ତୁମିମ୍‍ନ୍ ବୁଲ୍‌କାମ୍ କ୍‍ରୁଲାସ୍। ସେ କଳଙ୍କ ତୁମାର୍ ଗ୍‌ଗାଳ୍‌କେ ଜୟ୍‌ହର୍ କାଇ ଦ୍‌ଇଦ୍। ସ୍‌ରାସ୍‌ରି ଦିନ୍ ତୁମିମ୍‍ନ୍ ଦ୍‍ନ୍ ସ୍‌ମ୍‍ପତି ରୁଣ୍ତାମ୍‌ଲାସ୍।

4ଦ୍‌କା ତୁମାର୍‌ମ୍‌ନ୍‌କାର୍ ହ୍‌ଦାଇ କାମ୍ କ୍‌ଲାଇ, ମ୍‍ତର୍ ତୁମି ସେମ୍‌ନ୍‌କେ ସେମ୍‍ନ୍‍କାର୍ ହାଜ୍‌ରି ନ୍‍ଦିଲାସ୍। ସେମ୍‍ନ୍ ତୁମାର୍ ବିରୁଦେ କାନ୍ଦୁଲାଇ, ସେମ୍‍ନ୍ ତୁମାର୍ ଗିନେ ଦାନ୍ ରୁଣ୍ଡାଇ ଆଣ୍‌ଲାଇ। ଏବେ ସ୍‌ର୍‌ଗାର୍ ସେନା ମ୍‌ନ୍‌କାର୍ ମାପ୍‌ରୁ ସେମ୍‍ନ୍‍କାର୍ ବେଲ୍‌କି ଅଇଲାର୍ ଶୁଣିଆଚେ।

5ତୁମିମ୍‍ନ୍ ହୁର୍‌ତିବି ଲ୍‌ଗେ ତୁମାର୍ ଜୀବନେ ସୁକ୍ ହାଇଆଚାସ୍। ତୁମି ଜୁଇରି ଇଚାକ୍‌ରି ରିଲାସ୍, ସେରି ହୁରାକ୍‌ରି ନିଜ୍‍କେ ସ୍‌ର୍‌ଦା କ୍‌ଲାସ୍। ତୁମିମ୍‍ନ୍ ବଳି ହୁଜାର୍ ଦିବସ୍ ଗିନେ ତିଆର୍ ଅଇରିଲା ଗଟେକ୍ ପଶୁହର୍ ନିଜ୍‍କେ ଇଚା କ୍‌ଲାସ୍।

6ତୁମି ଦ୍‌ର୍‌ମ୍ ଲକ୍‌ମ୍‍ନ୍‌କେ କାଇ ଦୟା ଦ୍‍କାଇ ନ୍‌କେଲାସ୍। ସେମ୍‍ନ୍ ତୁମାର୍ ବିରଦି ନ୍‌ରିଲାଇ, ତୁମିମ୍‍ନ୍ ସେମ୍‌ନ୍‌କେ ମ୍‌ର୍‌ନେ ମାରି ଆଚାସ୍।

7ସେତାର୍‍ଗିନେ ବାଇ ବେଣିମ୍‌ନ୍, ସାସ୍ ଦ୍‌ରା, ମାପ୍‌ରୁ ଯୀଶୁ ହୁର୍‌ତିବି ଲ୍‌ଗେ ଆସେଦ୍। ସ୍‌ଡେବ୍‌ଳ୍ ହ୍‌ତେକ୍ ସାସ୍ ଦ୍‌ରିକ୍‌ରି ରିଆ।

8ଚାଷିମ୍‌ନ୍ ଜ୍‌ନ୍‌କ୍‌ରି ନିଜାର୍ ହ୍‌ଦାଇ ମୁଲ୍ୟବାନ୍ ଦାନ୍ ମ୍‍ଣ୍ତିଆ ଗ୍‍ଜାଅଇ ବାଡ୍‌ତା ହ୍‌ତେକ୍ ସାସାର୍ ସ୍‌ଙ୍ଗ୍ ଆଶା କ୍‌ର୍‌ତି, ହ୍‌ର୍‌ତୁ ବର୍ଷାର୍ ହାଣି ଆର୍ ସ୍‌ରାସ୍‌ରି ବର୍ଷାର୍ ହାଣି ହ୍‌ତେକ୍ ସାସ୍ ସ୍‌ଙ୍ଗ୍ ଜାଗିରିଆ, ତୁମିମ୍‍ନ୍ ସେନ୍‍କ୍‌ରି ସାସ୍ ଦ୍‍ର୍‍ତା ଦ୍‌ର୍‌କାର୍। ନିଜାର୍ ଆଶା ଚାଡାନାଇ, ମାପ୍‌ରୁ ଯୀଶୁ ବେଗି ଆସୁଲା।

9ବାଇ ବେଣିମ୍‌ନ୍ ନିଜାର୍ ନିଜାର୍ ବିରୁଦେ ଅବିଜଗ୍ କ୍‍ରାନାଇ। ତୁମିମ୍‍ନ୍ ଅବିଜଗ୍ କ୍‌ର୍‌ତାର୍ ବ୍‌ନ୍ଦ୍ ନ୍‌କେଲେକ୍, ନିଜେ ଦସି ବ୍‌ଲି ବିଚାର୍‌ ଅଉଆସ୍, ବିଚାର୍‌ କ୍‌ର୍‌ତା ଆସୁକେ ତିଆର୍ ଅଇଆଚାସ୍।

10ଏ ବାଇ ବେଣିମ୍‌ନ୍, ମାପ୍‌ରୁର୍ ଗିନେ ଜୁଇ ବାବବାଣି କ୍‌ରିରିଲା ବବିଶତ୍ କ୍‌ତା କ୍‌ଉତା ଲକ୍‌ମ୍‌ନ୍‌‍କାର୍ କ୍‌ତା ଶୁଣା। ସେମ୍‍ନ୍ ବେସି ଦୁକ୍‍କ୍‍ଷ୍ଟ ହାଇ ରିଲେକ୍ ହେଁ ସାସ୍ ଦ୍‌ର୍‌ତି ରିଲାଇ।

11ଅମିମ୍‌ନ୍ କ୍‌ମ୍‌ଲୁ ଯେ, ଜୁଇଲକ୍ ସେମ୍‍ନ୍‍କାର୍ ଅସୁବିଦାମ୍‌ନ୍ ସାସ୍‌ଦ୍‌ରି ହାଇଲାଇ, ସେମ୍‍ନ୍ ଅବେ ସ୍‌ର୍‌ଦା କ୍‍ରି ଆତ୍‍ତି। ତୁମିମ୍‍ନ୍ ଆୟୁବାର୍ ସାସାର୍ କ୍‌ତାଶୁଣି ଆଚାସ୍। ତୁମିସ୍‌ବୁ ଜାଣିଆଚାସ୍ ଯେ, ଆୟୁବ୍ ସ୍‌ବୁ ଦୁକ୍‍କ୍‍ଷ୍ଟ ହାଇ ସ୍‌ର୍‌ଲା ହ୍‌ଚେ ଇଶ୍ଵର୍ ତାକେ ସାଇଜ କ୍‌ରିରିଲା। ଇରି ଜାଣାଇଦ୍ ଯେ, ସେ ଦୟାରେ ବ୍‌ର୍‌ତି ଆର୍ ଦୟାଳୁ।

12ଏ ମର୍ ବାଇ ଆର୍ ବେଣିମ୍‌ନ୍ ଇରି ମ୍‌ନେର୍‌କା ଯେ କାଇକ୍‌ତା ହେଁ କ୍ଉତାବ୍‍ଳ୍ ହ୍‍ର୍‍ମାଣ୍ କ୍‍ରାନାଇ, ଇରି ବେସି ମୁକ୍ଯ ବିଷୟ୍, ତୁମାର୍ କ୍‌ତାକେ ସ୍‌ତ୍‌ବ୍‌ଲି କ୍‍ମ୍‍କେ ସ୍‌ର୍‌ଗାର୍ ହ୍‍ର୍‍ମାଣ୍, ହୁର୍‌ତିବିର୍ ହ୍‍ର୍‍ମାଣ୍ କି ଆର୍ କୁଇ ବିନ୍ ନାଉଁ ହେଁ ଦ୍‌ରା ନାଇ। ମ୍‍ତର୍ ତୁମାର୍ ହେଁ କ୍‌ତା ହେଁ ଅଉଅ, ନାଇ କ୍‌ତା ନାଇ ଅଉଅ, ଅନ୍‌କାର୍ କ୍‌ଲେକ୍ ତୁମି ଦସି ବ୍‌ଲି ବିଚାର୍‌ ନ୍‌ଅଉଆସ୍।

13ଯ୍‌ଦି କେ ଅସୁବିଦାୟ୍ ହ୍‌ଡିଆଚେ, ସେରି ଅଇଲେକ୍ ସେ ଲକ୍ ପାର୍‌ତେନା କ୍‌ର, ଯଦି କେ ସ୍‌ର୍‌ଦା ଆଚେ, ସେରି ଅଇଲେକ୍ ସେ ଗିତ୍ କ୍‌ଅ।

14ଯଦି ତୁମାର୍ ବିତ୍‌ରେ କେ ଏକ୍‍ଲାକେ ଜର୍‍ ଅଇଲିଆଚେ, ତ୍‍ବେ ସେ ମ୍‌ଣ୍ତଳିର୍ ପାରାଚିନ୍‍ମ୍‍ନ୍‌କେ କୁଦ୍‌ତା ଦ୍‌ର୍‌କାର୍। ସେମ୍‍ନ୍ ମାପ୍‌ରୁର୍ ନାଉଁଏ ତାକେ ଚିକାଣ୍ ଲାଗାଉତି ଆର୍ ତାର୍ ହାଇଁ ପାର୍‌ତେନା କ୍‌ର୍‌ତି।

15ବିଶ୍‍ବାସ୍ ସ୍‌ଙ୍ଗ୍‌ କ୍‍ଲା ସେ ପାର୍‌ତେନା ତାକେ ବ୍‍ଲ୍ କ୍‍ରେଦ୍। ମାପ୍‌ରୁ ତାକେ ବ୍‍ଲ୍ କ୍‍ରେଦ୍, ଯ୍‌ଦି ଇଲକ୍ ପାପ୍ କ୍‍ରି ର୍‌ଇଦ୍, ତ୍‍ବେ ଇଶ୍ଵର୍ ତାକେ କେମା କ୍‍ରେଦ୍।

16ତୁମି କ୍‌ରିରିଲା ପାପ୍‌ସ୍‌ବୁ ନିଜାର୍ ନିଜାର୍ ବିତ୍‌ରେ ମାନା, ତାର୍ ହ୍‌ଚେ ନିଜାର୍ ନିଜାର୍ ହାଇଁ ପାର୍‌ତେନା କ୍‍ରା, ଇଶ୍ଵର୍ ଜ୍‌ନ୍‌କ୍‌ରି ତୁମୁକ୍‌ମ୍‌ନ୍ ବ୍‌ଲ୍‌କ୍‍ରି ଦ୍‌ଇଦ୍। ଦ୍‌ରମି ଲକାର୍‌ ପାର୍‌ତେନା ସ୍‌ବୁ ସାଦନ୍ କ୍‍ରି ହ୍‌ରେଦ୍‌

17ବବିସ୍‌ତ୍ କ୍‌ଉତା ଏଲିୟ ଅମାର୍ ହ୍‌ର୍ ଗଟେକ୍ ସାଦାସିଦା ଲକ୍‌ରିଲା, ସେ ହାଣି ନ୍‌ଆସ ବ୍‌ଲି ପାର୍‌ତେନା କ୍‍ଲା। ତ୍‍ବେ ଦ୍‌ରତି ଉହ୍‌ରେ ତିନ୍ ବ୍‌ର୍‌ସ୍‌ ଆର୍ ଚ ମାସ୍ ହ୍‌ତେକ୍ ହାଣି ନ୍‌ମାର୍‌ଲି।

18ତାର୍ ହ୍‌ଚେ ବବିସ୍‌ତ୍ କ୍‌ଉତା ଏଲିୟ ଆର୍ ଗଟେତର୍ ହାଣି ମାରୁକେ ପାର୍‌ତେନା କ୍‍ଲା ଆକାଶେ ହ୍‍ଣି ହାଣି ମାର୍‌ଲି ଆର୍ ଦ୍‌ର୍‌ତି ଲ୍‌ଗେ ଦାନ୍ ମାଣ୍ଡିଆ ହାକ୍‌ଲି।

19ଏ ମର୍ ବାଇ ଆର୍ ବେଣିମନ୍ ତୁମାର୍‌ମ୍‌ନ୍‌କାର୍ ବିତ୍‌ରେହ୍‌ଣି ଯଦି କେ ସ୍‌ତ୍ ବାଟ୍ ଚାଡି କ୍‍ରାପ୍ ବାଟ୍ ଯାଇଦ୍, ତ୍‍ବେ ଆର୍ ଗଟେକ୍ ବାଇ ତାକେ ବ୍‍ଲ୍ ବାଟ୍ ଲେଉଟାଇ ଆଣୁକେ ସାଇଜ କ୍‌ର।

20ଇରି ମ୍‌ନେର୍‌କା, ଜୁଇ ଲକ୍ କ୍‍ରାପ୍ ବାଟେହ୍‌ଣି ଗଟେକ୍ ପାପିକେ ଲେଉଟାଇ ଆଣେଦ୍ ତ୍‍ବେ ସେ ମ୍‌ର୍‌ନେ ହ୍‍ଣି ତାର୍ ଜୀବନ୍‍କେ ଉଦାର୍‌ କ୍‍ରେଦ୍, ଇରି କ୍‌ର୍‌ତା ଦ୍ୱାରା ସେ ଲକ୍ ବେସି ପାପେହ୍‌ଣି କେମା ହାଇଦ୍‌।

← Chapter 4 Jump to: