Titus 3

Bodo BDVNT (ବ୍‌ଡ଼୍ ହ୍‌ର୍‌ଜା ବାଇବଲ)

← Chapter 2 Jump to:

1ବିଶ୍‍ବାସି ଲକ୍‌ମ୍‍ନ୍‌କେ ଇରିସ୍‌ବୁ କ୍‌ଉଆ ଯେ, ସେମ୍‍ନ୍ ଅଦିକାରି ଆର୍ ସାଶନ୍‌ କ୍‌ର୍‌ତା ଲକ୍‌ମ୍‍ନ୍‌କେ ସନ୍‌ମାନ୍ ଦେଇ, ସେମ୍‍ନ୍‍କାର୍ ଆଦେଶ୍ ମାନତ୍ ଆର୍ ବିନ୍‌ଲକାର୍ ଉପ୍‌କାର୍‌କାମ୍ କ୍‌ରୁକେ ସ୍‌ବୁବ୍‌ଳ୍ ତିଆର୍ ରେଉତ୍।

2ବିନ୍‌ ଲକ୍‌ମ୍‌ନ୍‌କାର୍‌ ବିଷୟରେ କ୍‍ରାପ୍ କ୍‌ତା ନ୍‌କ୍‌ଉତ୍, ବିନ୍‌ ଲକ୍‌ମ୍‌ନ୍‌କାର୍‌ ସ୍‍ଙ୍ଗ୍‍ ଶାନ୍‍ତିରେ ରେଉତ୍, ସାସ୍ ଦ୍‌ରତ୍ ଆର୍ ସ୍‌ବୁ ଲକ୍‌ମ୍‍ନ୍‌କେ ସାଦୁ ଦ୍‍କାଇ ଅଉତ୍।

3କାଇତାକ୍ ହ୍‌ର୍‌ତୁ ଅମିମ୍‍ନ୍ ହେଁ ବକୁଆ ରିଲୁ, କ୍‌ତା ନ୍‌ମାନ୍‌ତି ରିଲୁ, ବୁଲ୍‌କାମ୍ କ୍‌ର୍‌ତି ରିଲୁ, ଅମୁକେ ସ୍‌ର୍‌ଦା ଦେତା ସ୍‌ବୁ ପର୍‌କାର୍ କ୍‍ରାପ୍ କାମାର୍ ଅଦିନେ ରେଇ ସେରି ବଗ୍‌ କ୍‌ର୍‌ତିରିଲୁ। ବିନ୍ ଲକ୍‌କେ ଅକାର୍ ଆର୍ ରିସାଅଇ ଜୀବନ୍ କାଟ୍‌ତି ରିଲୁ। ଲକ୍ ଅମୁକେ ଗୁର୍‌ଣା କ୍‍ର୍‍ତିରିଲାଇ ଆରେକ୍‌ ଅମି ହେଁ ସେମ୍‌ନ୍‌କେ ଗୁର୍‌ଣା କ୍‌ର୍‌ତି ରିଲୁ।

4ମ୍‍ତର୍ ଜ୍‌ଡେବ୍‌ଳ୍ ଅମାର୍ ଉଦାର୍‌‌କ୍‌ର୍‌ତା ଇଶ୍ଵର୍ ମାନାଇମ୍‌ନ୍‌କାର୍ ଗିନେ ଯୀଶୁ ଖ୍ରୀଷ୍ଟକେ ମାନାଇ ରୁପ୍ ଦେଇ ତାର୍ ଦୟା ଆର୍ ଲାଡ୍‌କେ ଜାଣାଇଲା,

5ସେ ଅମାର୍ ପାପାର୍ ଡ୍‌ଣ୍ଡ୍ ହାଉତା ଲ୍‌ଗେହ୍‍ଣି ଅମୁକେ ଉଦାର୍‌ କ୍‍ଲା, ଇରି ଅମି କ୍‍ଲା ବ୍‌ଲ୍‌କାମାର୍ ଗିନେ ନ୍‌ଇ। ମ୍‍ତର୍ ତାର୍ ନିଜାର୍ ଦୟାଇ ଅମୁକେ ପବିତର୍ ଆତ୍ମା ଦ୍ବାରା ଆଶିର୍‌ବାଦ୍‌‌କ୍‌ରି ନ୍‌ଉଆ ଜ୍‌ର୍‌ନ୍ ଦେଇ ନ୍‌ଉଆ ଜୀବନ୍ ଦିଲାଆଚେ।

6ଇଶ୍ଵର୍ ଅମାର୍ ବିତ୍‌ରେ ଶ୍‌କ୍‌ତିର୍ ସ୍‍ଙ୍ଗ୍‍ କାମ୍‌କ୍‌ରୁକେ ପବିତର୍ ଆତ୍ମାକେ ଇନାମେ ଦିଲାଆଚେ, କାଇତାକ୍ ଯୀଶୁ ଖ୍ରୀଷ୍ଟ ଅମାର୍ ପାପାର୍ ଗିନେ ମରି ଅମାର୍ ଉଦାର୍‌‌କ୍‌ର୍‌ତା ଅଇଆଚେ।

7ତ୍‍ବେ ଅମି ଜ୍‌ନ୍‌କ୍‌ରି ବ୍‌ର୍‌ସା ଅନୁସାରେ ନ୍‌ସେର୍‌ତା ଜୀବନ୍ ହାମ୍‌ହାରୁ, ଜୁଇରି କି ସେ ତାର୍ ହିଲା ହ୍‌ର୍ ଅମୁକେ ଦେତାର୍ ଗିନେ ଶପତ୍ କ୍‍ରିଆଚେ। ଆର୍ ଅମି ଇରି ବ୍‌ଲ୍‌କ୍‍ରି ଜାଣୁହାରୁ କାଇତାକ୍ ଇଶ୍ଵର୍ ତାର୍ ଦୟାର୍ ଦ୍ବାରା ଅମୁକେ ତାର୍ ନିଜାର୍ ସ୍‍ଙ୍ଗ୍‍ ଟିକ୍ କ୍‍ରିଆଚେ।

8ମୁଇ ଅବେ ତକେ କଇଲା ସ୍‌ବୁକ୍‍ତା ବ୍‌ର୍‌ସାର୍‌ ଜଗ୍ଯ। ତ୍‍ବେ ମୁଇ ଇଚା କ୍‌ରୁଲେ, ଇଶ୍ଵରାର୍ ଲ୍‌ଗେ ରେତା ବିଶ୍‍ବାସିମ୍‌ନ୍‌କେ ଶିକ୍ୟା ଦେତାବ୍‍ଳ୍, ଇ ବିଷୟେ ଡାଟ୍‍କ୍‍ରି କ୍ଉଆ, କି ସେମ୍‌ନ୍‌ ସ୍‌ବୁବ୍‌ଳ୍ ବ୍‌ଲ୍‌କାମ୍ କ୍‌ରୁକେ ଦିଆନ୍ ଦେଅତ୍। ଇ ଶିକ୍ୟା ସ୍‌ବୁଲକାର୍ ଗିନେ ବ୍‍ଲ୍ ଆର୍ ସାଇଜ କ୍‌ର୍‌ତା ଶିକ୍ୟା।

9ମ୍‍ତର୍ ତୁଇ ତ୍‌ନେ ତ୍‌ନେ ଟେକାଟେକି ଆର୍ ବକୁଆ କ୍‌ତା, ବଂଶାବଳିର୍ ଡେଙ୍ଗ୍ ନାଉମ୍‌ନ୍ ବିଷୟରେ ଜୁକ୍‌ତି, ଜଗ୍‍ଳା, ମୋଶାର୍ ନିୟମ୍ ଆର୍ ଶିକ୍ୟା ବିଷୟେ ମାଡ୍‌ଗ୍‌ଳ୍ ଅଉତା ତ୍‌ଇହ୍‌ଣି ଦୁରିରିଆ। ସେସ୍‌ବୁ ମୁଲ୍ଯନାଇ ଆର୍ କାର୍ ସାଇଜ ନ୍‌କେରେ।

10ଯଦି କେ ବିଶ୍‍ବାସିମ୍‌ନ୍‌କାର୍ ବିତ୍‌ରେ ଜୁକ୍‍ତା ଜୁକ୍‌ତି କ୍‍ରେଦ୍, ସେନ୍‌ଅଇଲେକ୍ ତାକେ ଜାଗ୍‌ରତ୍ କ୍‌ରାଇ ଦିଆସ୍। ସେ ଯଦି ଆରେକ୍‌ ଜୁକ୍‌ତି ଜୁକ୍‍ତା କ୍‍ରେଦ୍ ସେନ୍‌ଅଇଲେକ୍ ତାକେ ଆର୍ ଗଟେତର୍ ଜାଗ୍‌ରତ୍ କ୍‌ରାଉଆ। ଇରି ଅଇଲେକ୍ ହେଁ ଯଦି ସେ ଜୁକ୍‌ତି ଜୁକ୍‍ତା କ୍‍ରେଦ୍, ତ୍‍ବେ ତାର୍ ଲ୍‌ଗେହ୍‍ଣି ବିନେ ରିଆ

11ତୁମି ଜାଣିରିଆ ଯେ, ସେନ୍‌କା ଲକ୍ କ୍‍ରାପ୍ ଆର୍ ପାପ୍ ବାଟେ ଜ୍‍ମ୍‍ଲା। ଆର୍ ତାର୍ ନିଜାର୍ ପାପ୍ ହ୍‍ର୍‍ମାଣ୍ କ୍‍ରେଦ୍ ଯେ ସେ ଦସି।

12ମୁଇ ତୁମାର୍‌ମ୍‌ନ୍‌କାର୍ ଲ୍‌ଗେ ଆର୍ତ୍ତମ କି ତୁଖିକକେ ହ୍‌ଟାଇନ୍। ସେମ୍‌ନ୍‌କେ ହ୍‌ଟାଇଲା ହ୍‌ଚେ ତୁମି ନିକପଲି ସ୍‌ହର୍ ତ୍‌ଇ ମର୍‍ଲ୍‌ଗେ ଆସୁକେ ହାର୍‌ ନାହାର୍ ଚେଷ୍ଟାକ୍‌ରା। କାଇତାକ୍ ମୁଇ ଟିକ୍ କ୍‌ରିଆଚି ଯେ ଶୀତ୍‌ମାସ୍ ସେତି କ୍‌ଟାଇନ୍ଦ୍।

13ଜ୍‌ଡେବ୍‌ଳ୍ ମୋଶାର୍ ନିଆଇ ଶିକାଉତା ଲକ୍‌ ଜୀନା ଆର୍ ଆପୋଲ୍ଲ ସେତି ଆସୁଲାଇ। ସେମ୍‍ନ୍ ଆସ୍‌ତାର୍ ଗିନେ ତୁମି ଜାଇରି ହାରୁଲାସ୍ ସେରି ସାଇଜ କ୍‍ରା, ତୁମି ଜାଗ୍‌ରତ୍ ଅଉଆ ଯେ ସେମ୍‍ନ୍ ଆସ୍‌ତାବ୍‌ଳ୍ ବାଟେ ସେମ୍‌ନ୍‌କାର୍ କାଇରି ଅବାବ୍ ନ୍‌ଉଅ।

14ସେରି ସେ ନ୍‌ଇ, ମ୍‍ତର୍ ଦ୍‌ର୍‌କାର୍‌ରିଲା ଲକ୍‌ମ୍‌ନ୍‌କାର୍‌ ବ୍‌ଲ୍‌କାମାର୍ ଗିନେ ନିଜାର୍ ଜୀବନ୍‍କେ ଲାଗାମ୍‍କେ ବିଶ୍‍ବାସିମ୍‌ନ୍‌କେ ଶିକାଉତି ରିଆ। ଇରି ବିଶ୍‍ବାସିମ୍‌ନ୍‌କେ ତାକାର୍ ଜୀବନାର୍ ଗଟେକ୍ ଉଦେଶାର୍‌ ସ୍‌ଙ୍ଗ୍‌ ଜିଉଁକେ ସାଇଜ କ୍‍ରେଦ୍।

15ମର୍‌ସ୍‍ଙ୍ଗ୍‌ ଇତିରିଲା ସ୍‌ବୁ ବିଶ୍‍ବାସିମ୍‌ନ୍‌ ତୁମୁକେ ଜୁଆର୍ ଜାଣାମ୍‌ ଲାଇ। ଅମୁକେ ଲାଡ୍ କ୍‌ର୍‌ତା କ୍ରୀତୀଦିପେ ରିଲା ସ୍‌ବୁ ଅମାର୍‌ ସ୍‌ଙ୍ଗାର୍ ବିଶ୍‍ବାସିମ୍‌ନ୍‌କେ ଜୁଆର୍ ଜାଣାଉଆ। ମୁଇ ପାର୍‌ତେନା କ୍‌ରୁଲେ ଇଶ୍ଵର୍ ତୁମାର୍ ସ୍‌ବୁ ଲକ୍‌କେ ଦୟାକ୍‌ର।

← Chapter 2 Jump to: