Ezekiel 46

Cebuano 2011

← Chapter 45 Jump to: Chapter 47 →

1“Mao kini ang giingon sa Ginoong Dios: Ang ganghaan sa sulod nga hawanan nga nag-atubang sa silangan tak-opan sulod sa unom ka adlaw nga tingbuhat, apan sa adlawng igpapahulay kini buksan, ug sa adlaw sa bag-ong subang sa bulan kini buksan.

2Ang pangulo mosulod agi sa agianan sa ganghaan nga dapit sa gawas, ug motindog tupad sa haligi sa ganghaan. Ang mga pari maoy maghalad sa iyang halad nga sunogon, ug sa iyang mga halad sa pakigdait, ug siya magsimba didto sa tugkaran sa ganghaan. Ug siya mogula, apan ang ganghaan dili tak-opan hangtod sa gabii.

3Ug ang katawhan sa yuta magsimba didto sa pultahan sa maong ganghaan sa atubangan sa Ginoo sa mga adlawng igpapahulay ug sa mga bag-ong subang sa bulan.

4Ug ang halad nga sunogon nga ihalad sa pangulo ngadto sa Ginoo nga himoon sa adlawng igpapahulay, unom ka nating karnero nga walay tatsa ug usa ka laking karnero nga walay tatsa,

5ug ang halad nga pagkaon uban sa laking karnero, usa ka epha ug ang halad nga pagkaon uban sa mga nating karnero sumala sa mahimo niya sa paghatag, ug usa ka hin nga lana uban sa matag epha.

6Sa adlaw sa bag-ong subang sa bulan maghalad siya ug usa ka batan-ong torong baka nga walay tatsa ug unom ka nating karnero ug usa ka laking karnero, kini kinahanglan walay tatsa.

7Ingon nga halad nga pagkaon, siya magtagana ug usa ka epha uban sa torong baka ug usa ka epha uban sa laking karnero ug uban sa mga nating karnero sumala sa iyang mahimo, ug usa ka hin nga lana sa matag epha.

8Sa diha nga mosulod na ang pangulo, siya mosulod agi sa agianan sa ganghaan, ug siya mogula sa samang agianan.

9“Sa diha nga ang katawhan sa yuta moanhi sa atubangan sa Ginoo panahon sa mga tinakda nga kasaulogan, kadtong mosulod agi sa amihanang ganghaan aron sa pagsimba mogula agi sa habagatang ganghaan, ug kadtong mosulod agi sa habagatang ganghaan mogula usab agi sa amihanang ganghaan. Siya dili mobalik agi sa ganghaan diin siya misulod, kondili siya mogula lahos sa ganghaan nga atbang sa iyang gisudlan.

10Sa diha nga sila mosulod, ang pangulo mosulod uban kanila, ug sa diha nga manggula sila siya mogula usab.

11“Ug panahon sa mga kasaulogan ug sa tinakdang mga panahon, ang halad nga pagkaon usa ka epha uban sa usa ka torong baka, ug usa ka epha uban sa usa ka laking karnero, ug uban sa mga nating karnero sumala sa iyang ikahatag, ug usa ka hin nga lana uban sa matag epha.

12Sa diha nga ang pangulo mag-andam ug usa ka halad nga kinabubut-on, usa ka halad nga sunogon o mga halad sa pakigdait ingon nga usa ka halad nga kinabubut-on ngadto sa Ginoo, ang ganghaan nga nag-atubang sa silangan buksan alang kaniya, ug siya maghalad sa iyang halad nga sunogon, o sa iyang mga halad sa pakigdait, sama sa iyang buhaton panahon sa adlawng igpapahulay. Unya mogula siya, ug human sa iyang paggula tak-opan ang ganghaan.

13“Siya mag-andam ug usa ka nating karnero nga usa ka tuig ang kagulangon nga walay tatsa alang sa usa ka halad nga sunogon ngadto sa Ginoo matag adlaw, mag-andam siya niini matag buntag.

14Ug siya mag-andam ug usa ka halad nga pagkaon uban niini matag buntag, ikaunom nga bahin sa usa ka epha ug, ikatulo nga bahin sa usa ka hin nga lana aron iahog sa harina ingon nga usa ka halad nga pagkaon ngadto sa Ginoo. Mao kini ang tulumanon sa magpadayon nga halad nga sunogon.

15Busa ang nating karnero ug ang halad nga pagkaon ug ang lana andamon matag buntag alang sa magpadayon nga halad nga sunogon.

16“Mao kini ang giingon sa Ginoong Dios: Kon ang pangulo mohatag ug usa ka gasa sa bisan kinsa sa iyang mga anak nga lalaki gikan sa iyang napanunod, kini maiya sa iyang mga anak nga lalaki, kini ilang katigayonan pinaagi sa panulundon.

17Apan kon siya mohatag ug usa ka gasa gikan sa iyang panulundon ngadto sa usa sa iyang mga sulugoon, kini maiya hangtod sa tuig sa kagawasan unya kini iuli ngadto sa pangulo, apan mahitungod sa iyang panulundon, kini maiya lamang sa iyang mga anak nga lalaki.

18Ang pangulo dili makakuha gikan sa panulundon sa katawhan aron sa pagpapahawa kanila gikan sa ilang napanag-iya. Siya maghatag ug panulundon sa iyang mga anak nga lalaki gikan sa iyang kaugalingon nga katigayonan aron walay usa sa akong katawhan nga mapahawa gikan sa iyang katigayonan.”

19Unya gidala ako niya agi sa agianan nga diha sa kilid sa ganghaan, ngadto sa amihanang bahin sa mga balaang lawak alang sa mga pari. Didto akong nakita ang usa ka dapit sa kinatumyang bahin sa kasadpan.

20Ug siya miingon kanako, “Kini mao ang dapit diin pabukalan sa mga pari ang halad tungod sa paglapas ug ang halad tungod sa sala, ug diin lutoon nila ang halad nga pagkaon, aron dili nila kini dad-on ngadto sa gawas nga hawanan ug nga makatakod sa pagkabalaan ngadto sa katawhan.”

21Unya gidala niya ako ngadto sa gawas nga hawanan ug gipaagi ako niya sa upat ka suok sa hawanan, ug sa matag suok sa hawanan may hawanan.

22Sa upat ka suok sa hawanan may gagmay nga hawanan nga 40 ka maniko ang gitas-on ug 30 ka maniko ang gilapdon, kining upat managsama ug sukod.

23Diha sa sulod, libot sa matag usa sa upat ka hawanan adunay bungbong nga tisa ug mga abohan nga gibuhat diha sa ubos sa bungbong nga naglibot.

24Unya siya miingon kanako, “Mao kini ang mga lawak nga lutoanan, diin ang mga mag-alagad sa Templo magluto sa halad sa katawhan.”

← Chapter 45 Jump to: Chapter 47 →