2 Chronicles 9

Cebuano RCPV 1999 (Ang Bag-ong Maayong Balita Biblia)

← Chapter 8 Jump to: Chapter 10 →

1Sa pagkabalita sa rayna sa Sheba sa kabantog ni Solomon, miadto siya sa Jerusalem aron iyang sulayan si Solomon pinaagi sa lisod nga mga pangutana. Gikuyogan ang rayna sa daghan niyang mga opisyal ug nagdala silag mga kamelyo nga gikargahag daghang pahumot, bulawan ug mga mahalong bato. Sa ilang panagkita, gipangutana niya si Solomon sa tanang mga pangutana nga iyang nahunahunaan.

2Gitubag ni Solomon ang tanan niyang mga pangutana ug wala gayoy lisod tubagon alang kang Solomon.

3Nasuta sa rayna ang kaalam ni Solomon ug ang palasyo nga iyang natukod.

4Nakita usab niya ang matang sa pagkaon diha sa lamisa sa hari, ang pagkapahimutang sa iyang mga opisyal, ug giunsa siya pag-alagad sa iyang mga sulugoon, lakip sa mga tigtagay sa iyang bino ug ang ilang pamisti, ingon man ang iyang mga halad nga gisunog didto sa Templo sa Ginoo. Ug nahingangha siya pag-ayo niining tanan.

5Miingon siya kang Hari Solomon, “Tinuod gayod diay ang akong nabalitaan didto sa akong nasod bahin sa imong mga nahimo ug pagkamaalamon.

6Apan wala ako motuo sa maong balita hangtod nga nasuta ko gayod kining tanan. Wala ra gani diay sa katunga ang akong nabalitaan bahin sa imong kaalam. Labaw ka sa tanan nga akong nabalitaan bahin kanimo.

7Bulahan ang imong mga tawo ug ang imong mga sulugoon nga kanunay anaa duol kanimo ug kanunay makabati sa imong maalamong mga pulong.

8Dalaygon ang Ginoo nga imong Dios! Ang Israel gihigugma sa imong Dios ug lig-onon niya sila hangtod sa hangtod ug ikaw gihimo niya nga ilang hari aron mapatunhay nimo ang balaod ug ang hustisya.”

9Unya gihatagan niya ang hari ug kapin sa upat ka toniladang bulawan ug daghan kaayong pahumot ug mahalong mga bato. Walay sama sa pahumot nga gihatag sa rayna sa Sheba kang Solomon.

10Dugang pa niini, ang mga sulugoon ni Hari Hiram ug ni Solomon nga nagdala sa mga bulawan gikan sa Ofir, nagdala usab ug mga kahoyng algum ug mahalong mga bato.

11Ang mga kahoy gihimo niyang hagdanan sa iyang palasyo ug sa Templo sa Ginoo. Nagbuhat usab siyag mga lira ug mga alpa alang sa mga mag-aawit. Walay sama niini sa tibuok Juda.

12Gihatagan ni Hari Solomon ang rayna sa Sheba sa tanan nga iyang nagustohan. Dugang kini sa iyang nahatag ngadto sa rayna tumbas sa mga gasa nga gihatag sa rayna ngadto kaniya. Unya mipauli ang rayna uban sa iyang mga opisyal.

13Ang gibug-aton sa bulawan nga madawat ni Solomon sa usa ka tuig mokabat ug hapit sa 23 ka tonilada

14wala pay labot niadtong dala sa mga negosyante. Ang tanan usab nga mga hari sa Arabia ug mga gobernador sa nasod nagdala ug mga bulawan ug plata ngadto kang Solomon.

15Naghimo siyag 200 ka dagkong taming gikan sa bulawan. Ang gibug-aton sa matag taming pito ka kilo.

16Naghimo usab siyag 300 ka taming gikan sa bulawan nga ang gibug-aton sa matag usa tulo ug tunga ka kilo. Iya kining gibutang didto sa balay nga ginganlag Balay sa Lasang sa Lebanon.

17Nagbuhat usab ang hari ug trono gikan sa mga tango sa elepante ug gihal-opan kini niyag lunsayng bulawan.

18Ang trono may unom ka ang-ang ug may bulawan nga tungtonganan sa tiil. Sa isigkakilid sa trono may tungtonganan sa bukton ug sa matagkilid niini may tagsa ka kinulit nga liyon nga nagtindog.

19Sa unom ka ang-ang sa trono may nag-atbang nga 12 ka kinulit nga liyon—tagurha sa matag ang-ang. Walay gingharian nga may trono nga sama niini.

20Ang tanan nga imnanan ni Solomon hinimo gikan sa bulawan ug ang tanang galamiton didto sa Balay sa Lasang sa Lebanon pulos lunsayng bulawan. Ang plata ingon sa wala lamay bili sa panahon ni Hari Solomon.

21May mga barko siya nga magpanawan sa dagkong kadagatan uban sa mga barko ni Hari Hiram. Kausa sa tulo ka tuig ang mga barko modunggo nga magdalag bulawan, plata, mga tango sa elepante, mga aliwas ug mga onggoy.

22Busa sa kadato ug sa kamaalamon, labaw si Solomon sa tanang hari sa kalibotan.

23Ang tanang hari makigkita gayod kang Solomon aron sa pagpamati sa kaalam nga gihatag sa Dios kaniya.

24Ang tagsatagsa kanila magdalag mga gasa kada tuig: mga butang nga hinimo gikan sa plata ug bulawan, mga bisti, mira, mga pahumot, mga kabayo ug mga mula nga daghan kaayo.

25Si Solomon may 4,000 ka kuwadra sa kabayo ug mga karwahi, 12,000 ka kabalyero nga iyang gibutang sa mga siyudad nga butanganan sa mga karwahi ug didto usab sa Jerusalem diin siya magpuyo.

26Siya maoy nagmando sa tanang hari gikan sa Suba sa Eufrates hangtod sa nasod sa Filistia ug ngadto sa utlanan sa Ehipto.

27Ang plata gihimo ni Solomon nga ordinaryo na lamang daw bato didto sa Jerusalem ug ang kahoyng sidro ingon kadaghan sa kahoyng sikomoro sa Sefela.

28Ang mga kabayo ni Solomon pinalit gikan sa Musri ug sa ubang nasod.

29Ang ubang nahimo ni Solomon sukad sa sinugdan nahipatik sa Kasaysayan nga Sinulat ni Natan nga Propeta ug sa Mga Panagna ni Ahias nga Taga-Silo ug sa Panan-awon ni Iddo, ang Mananagna, nga naghisgot usab sa iyang nakita bahin kang Jeroboam nga anak ni Nebat.

30Naghari si Solomon sa tibuok Israel didto sa Jerusalem sulod sa 40 ka tuig.

31Unya namatay si Solomon ug gilubong tipon sa iyang katigulangan didto sa siyudad ni David ug si Rehoboam nga iyang anak maoy mipuli kaniya paghari.

← Chapter 8 Jump to: Chapter 10 →