Revelation 15

Chin 2010

← Chapter 14 Jump to: Chapter 16 →

1Mataico vaicung lekhei khuarawha a chuipaw paching pakhanah alaipaw ahringpaw khah ka hmuh. Ahning caipaw ruhanah rawrungpaw sangsarih khatei a cangpaw vaiming pasarih khah hmuh he neh ka, ma heh a hningcaipaw cawh a cang, zecawtamaw tatah aaning khahei Khazing thingaenah cawh a tling thah.

2Taico me khatei pahlawhpaw thlalang rili a lopaw khah hmuh neh ka, sawhrang le ama a lingthlaw le a ming nambar cung letah tenah a hnuitu sahlo khah Khazing tei a pehpaw he tingtang khah a tle he ka, ma rili cung lekhei a daw thlang he.

3Khazing saecapaw Moses a hlaw le Tuu teitei a hlaw khah aa sah. “Abuipaw Khazing Zezong Tuatu, na hming tuapaw cawh rungnaw ka, ningang a chui, mingphing vytei aa Siangpahrang na langpui cawh a dingpaw le a hmuisuipaw a cang.

4Vy Abuipaw, nama a ca ci lypaw le na ming rungnawnah a ca pei lypaw cawh ahomaw a cang? Zecawtamaw tatah a pathaipaw cawh nama suitei na cang. Mingphing vytei a vong he ka, na hme letah aa khuh aa panai a, zecawtamaw tatah na raihrenah a dingpaw cawh a lang myca,” tatah aa tah.

5Ma khy taico a hui neh ka, vaicung letei behnah ing, biatainah thingkawng chianahpaw thlangda a cangpaw cawh a honghlypaw khah ka hmuh.

6Ruhanah rawrungpaw sangsarih khatei a cangpaw vaiming pasarih cawh behnah ing taico a ka pia he. Aaning sahlo cawh a pathaipaw pai le a tlypaw a hrei he ka, aa cacanghnaw letah sui cacanghnaw a tongchainah khah a pazai he.

7Mataico hminghring sangpali letei pakheh takhei chaizaw tah chaizaw tai ahringpaw Khazing thingaená tah a chihpaw sui kaity sangsarih cawh vaiming pasarih khah a peh he.

8Taico, behnah ing cawh Khazing rungnawnah mekhu le a hmingtuakhynah mekhu khei chih ka, vaiming pasarih tah ruhanah rawrungpaw sangsarih aa tlung sahpaw a chang hlai vytei cawh behnah ing chunglang ahohmai a nae khy bei he.

← Chapter 14 Jump to: Chapter 16 →