2 Corinthians 10

Chin (Mara Bible RV (BSI))

← Chapter 9 Jump to: Chapter 11 →

1Kei, Pawla ta Krista nôphana nata nônaina ta ei châ haw ei. Nama hnohta ei y nota a reisi kaw tyh na ta, ei sie tawhta deikua cha, nama chô liata ei riah a pha kaw tyh.

2Ei vy tita, he khizaw hrozie ta a hrohpa hawhta miah a pachâpa thokhazy chô liata riahpha awpa hawhta ei riah a pha thei awpa ei pangiasa leipa vâta, eina pachâ thai awpa ei chi ta ei châ haw ei.

3Khizaw liata y hra sih la, khizaw adyuhna hawhta a dyuh ma pi.

4Eima chariah chhaichhizy cha khizaw chariah chhaichhizy châ leipa ei ta, thokhy a i ngaitapazy parao nawpa ta Khazohpa hmotaotheina a châ.

5Aeichhiana nata pachâna sâhpa hmâpa ta Khazohpa pahnona pakhâ achhuahnazy parao pi ta, pachâna to rai Krista reingiahna lâta eimâ chhi tyh.

6Nama reingiahna pakipa a châ tita, reingiah leina zydua hrie awpa eimâ mâ thlâh haw.

7Nama mohmô liata a ypazy kha moh tua u. Ahy rai Krista eih a châpa â lôh khiahta cha, ano Krista eih a châpa hawhta, keimo chhao Krista eih eima châzie pahno chanei heih mawh sy.

8Nama rao nawpa châ leipa ta, nâmo taopathi nawpa ta Abeipa ta biehneina eina piepa he ei palaikhei pathlei hapa chhao ta, ei noza aw vei.

9Ei châpaphaopazy ta nâmo pachhiparypa hawhta a lâ awpa khoh va na.

10Thokha ta, “A châpaphaopazy a hri ta, a tha chhao tlô ta, a pôhpa deikua chiehleipa châ ta, a biereipa chhao khâpa hmah châ vei,” eina tah ei.

11Nama hnohta eima y vei nota châropa ta eima reipa cha, nama hnohta eima y nota eima hmotaopa a châzie, cha hawhpa chyhsa chata pahno mawh sy.

12Âmosasyh a rei paphapa thokhazy cha a rei pâ ngâh leipa pi ta, a pakho ngâh hra ma pi. Châhrasala a thlie raihrie ei ta, amâ pakho tyhpa deikua he cha, novâhna amâ phahlazie a palâsa.

13Keimo la eima hriana su khô lâ a palaikhei aw ma pi. Khazohpa ta chakao nawpa su miah a piepa chhôh liata a ypa deita eimâ palaikhei aw. Nama hnohta thâtihpha cha chho awpa chhao he, Khazohpa ta miah a piepa a châ.

14Keimo ta thâtihpha eima chho leina liata eima vaw pakawh laihpa châ vei. Keimo he thâtihpha chho awpa ta nâmo lâ a vaw tlô tua chaipa eima châ.

15Eima hriana su khô lâta mohropazy hriapa a palaikhei beih ma pi. Namâ ngiapâna laiseih lymâ aw ta, nama hry liata eima chakaona chhao a kawh via lymâ aw tahpa hnabeiseihna tlao eima hnei.

16Chatanachata mohropa chakaona su liata raihria chiehpa a palaikhei leipa ta, nama khô lâ râhzy liata thâtihpha eima chho thei aw.

17“A palaipa maihta Abeipa a palaikhei mawh sy.”

18Anosasyh a reipaphapa ta reithaina hlao hlei leipa ta, Abeipa ta a reipaphapa ta reithaina a hlao tyh.

← Chapter 9 Jump to: Chapter 11 →