2 Samuel 1

Chin (Mara Bible RV (BSI))

Jump to: Chapter 2 →

1Sawla a thi tawhta, Dâvi cha Amale mo a dyuh ta. Adyuhna lâ tawhta â vaw lie nahta, Zikalâ liata noh no a pahâ ta.

2A noh thôhna noh ta Sawla riehmo tawhta chyhsa pakha, a chysiazy hriepa ta nata a luh liata dohlei chhaota a vy ta. Dâvi kô a vaw tlô nahta, alei liata pao ta a naoh ta.

3Dâvi ta a hnohta, “Khataih tawhta a vypa ma na châ?” tah ta. Ano ta a hnohta, “Izarei mo riehmo tawhta ei vaw râ,” tah ta.

4Dâvi ta a hnohta, “Kheihta ma hmo yzie a châ? Na chho teh,” tah ta. Ano ta, “Adyuhna tawhta pheisaihzy a râpai ei ta, pheisaih hluhpi pao ei ta ama thi. Sawla nata a sawchapawpa Zawnathâ chhao ama thi ha hra,” tah ta.

5Dâvi ta a chhotuhpa satlia hnohta, “Kheihta ma Sawla nata a sawchapawpa Zawnathâ ama thipa cha na pahno?” tah ta.

6A chhotuhpa satlia ta, “Kheihtazie ta tlyma Kibô Tlâh liata vaw y na ta, Sawla cha asei a hniehpa ta a duah thlâh ha ta, talailihzy nata arâ pheisaihzy ta ano cha a vaw hnia via ngâ kaw ei ta.

7A hnôh lâ a vaw heih ta, na vaw hmô ta, na vaw aw ta. Kei ta, ‘He liata ei y,’ tahpa ta a chhy na ta.

8Ei hnohta, ‘Ahy ma na châ?’ na tah ta. ‘Amale chyhsa ei châ,’ tahpa ta ei chhy.

9Ano ta ei hnohta, ‘Ei kiapâh liata a vaw duah la, na vaw thie teh, hro thlâh ha tlôhpa ta, nôpona ta eina tla thlu ha hih,’ tah ta.

10Chatanachata a kiapâh liata a kei duah na ta, a pao ha tawhta cha hro thei khao aw vei tahpa ei pahnopa vâta, ei thie lâlao haw. A luh liata beilakho nata a bâh liata lâkyu la na ta, ei zibeipa châta he lâ he ei vaw chei,” tah ta.

11Dâvi cha a chysiazy hrie ta, a hnohta a ypa chyhsa zydua chhao ta ano taopa hawhta tao chyu hra ei ta.

12Sawla nata a sawchapawpa Zawnathâ nata Abeipa phopi nata Izarei pathlazy zaozi ta ama pao hapa vâta, Dâvi nata a pheisaihzy cha âmo châta mâchhiesapa ta chakhei ei ta, zâlâ taih kâhvileipa ta y ei ta.

13Dâvi ta a chhotuhpa satlia hnohta, “Khataih lâ chyhsa ma na châ?” tah ta. Ano ta, “Râh hropa Amale chyhsa sawchapawpa ei châ,” tahpa ta a chhy ta.

14Dâvi ta a hnohta, “ Abeipa sathawthupa pahleipadia awpa ta a chô liata ku na pathlapa cha kheihtazieta a chi leipa ma na châ tly?” tah ta.

15Dâvi ta satlia pakha aw ta, a hnohta, “A kei hnia la, thie teh,” tah ta. Chhawh ta, thie ha ta.

16Dâvi ta a hnohta, “Na thisaih maoh cha na luh liata y mawh sy. ‘ Abeipa sathawthupa ei thie,’ na tahpa vâta, nâma pakah tlai ta thailei a cha pachâ haw,” tah ta.

17Chatawhcha Dâvi ta Sawla nata a sawchapawpa Zawnathâ châta, he chaphôhtuna hla heta chaphôh tu ta.

18He Libaw Hla he Zudâh sawzy pachu awpa ta biepie ta, Zasâ Châbu liata ropa a châ. Dâvi ta hetana heta chaphôh a tu:

19“Hy Izarei, na rônahna cha, Na su sâhpazy liata a thi haw! Kheihtazieta ma pasaiphazy ama pao thlâh ha tly!

20Kâthâ liata chho leipa u la, Askelaw lâpizy liata phuah khuh vy; Philistinâ zuahzy a ly aw ei ta, Chopawtaileipa sawchanôzy ama thapha pathlei aw na.

21“Nâmo Kibô tlâhpizy saih u, Nama tlâhzy liata pasaipha vyhphao papuapaleipa châ ta, Sawla vyhphao sathaw thupa a châ khao leipa vâta; Nama chô liata diati tla leipa sala, Vâsua tla hra leipa sala, Lyu ta kôvei papua khao khah sy!

22“Hmaphaohpazy thisaih tawhta, Pasaiphazy thaw tawhta, Zawnathâ libaw kua beih leipa ta, Sawla zaozi chhao a ruapa ta a lie beih vei.

23“Sawla nata Zawnathâ kha, Kho a chhih ei ta amâ ngia ngaita dia! Hro chhôh ta a kao ei ta, Thina liata chhao a chhaih veih ei; Pahmôhpi hlâta chatlie via ei ta, Chakeibarôhneipa hlâta ama tha a tlô via.

24“Hy Izarei zuahzy saih u, Sawla chakhei teh u; Ano ta poh saih ngiapazy cha pabu ei ta, Nama chysiazy ngôh ta a tobi.

25“Kheihtazieta ma a dyuh lichih ta Pasaiphazy ama pao thlâh ha tly! Zawnathâ cha na su sâhpazy liata Athipa ta â zia hih!

26Ei unawhpa Zawnathâ y, Ei cha taokheizie rimâ cha! Ei chô liata pha ngaita chi ta, Kyh eina pachâna chi kha noâh a chhih ta, Chanô kyhpachâna hlâta â sâh via.

27“Kheihtazieta ma pasaiphazy pao ei ta, Chariah chhaichhizy a leidia thlâh ha tly!”

Jump to: Chapter 2 →