2 Timothy 1

Chin (Mara Bible RV (BSI))

Jump to: Chapter 2 →

1Pawla, Krista Zisu liata hrona a ypa bietai hawhta Khazohpa khozie ta Krista Zisu lyuhchâpa ta

2ei saw kho ngaitapa Timawthy ei châ naoh. Khazohpa Paw nata Krista Zisu eima Beipa tawhta ngiachhiena, zawngiahna nata thlalôhna na hnohta y mawh sy.

3Ei thlahchhânazy liata chhô nah zâ ta khâ châ thei tyh na ta, nâ pathlatuhpazy taozie hawhta, chhie nata pha pahnona siapa ta ei chakaopa Khazohpa hnohta nâma vâta alyna bie ei reih tyh.

4Na mothlihzy kha a thei thlâh ha na ta, alyna ta biepa ta ei y thei nawpa ta, cha hmô awpa ei khoh ngaita.

5Ngiapâna hmeiseihpa a hneipa na châzie ei pahno. Cha ngiapâna cha na manô Lôisi liata y tua ta, na nô Unisi liata y heih ta, tahmâ nâma liata chhao a y tahpa a siapa ta ei pahno.

6Cha vâna chata na chô liata ei ku pahniehpa ta Khazohpa hmopiepa nâ liata a ypa kha, pa-ia awpa ta ei cha pahnosa heih.

7Khazohpa ta china thlahpa miah pie leipa ta, hmotaotheina nata kyhpachâna nata pachâna pasohpa hneina thlahpa tlao miah a pie.

8Chavâta eima Beipa bie pahnotuhpa châpa cha zakhei khah y. Kei ano vâta atâhpa chhao he na zakhei hra leipa la, Khazohpa hmotaotheina ta thâtihpha châta pasa tlao na taokhei mah y.

9Ano cha eima hmotaopazy vâta châ leipa ta, a hmochhuahpa nata a ngiachhiena vâta miah pachha ta, awna pathaihpa ta miah awtuhpa a châ. Cha ngiachhiena cha khizaw y hlâta Krista Zisu liata miah a pie haw.

10Cha ngiachhiena cha miah Pachhatuhpa Krista Zisu â vaw luahna liata tahmâ palâsapa ta a y haw. Krista cha thina pahlei ta, thâtihpha vâta hrona nata thi thei leina a vaw tlôkheituhpa a châ.

11Cha thâtihpha châta biechhotuhpa nata lyuhchâpa nata pachutuhpa ta raopa ei châ.

12Cha vâna chata he hmozy chhao he pasa ei tao. Châhrasala ei noza vei. Ei ngiapâpa cha pahno na ta, ano ei pavaosapazy cha, cha noh châta â bohpa ta a vaih thei tahpa a siapa ta ei pahno.

13Krista Zisu liata a ypa ngiapâna nata kyhpachâna hneipa ta, siezie awpa biedopa kei tawhta na theipazy kha zi mah y.

14Keimo liata a pahrâpa Thlahpa Pathaihpa hmâpa ta, na hnohta pavaosapa hmo phapa kha vaih mah y.

15Asia râh liata a ypa zydua ta einâ heihsai ha ei tahpa pahno chi ta, ama hry liata Phukelâ nata Hamôkene zy amâ hlao hra.

16Abeipa ta Ônesiphôrâ chhôhkhazy hnohta zawngiahna pie mawh sy. Ano cha ei hro na pathieh heih tyh ta, ei bâlia a kypazy he na zakhei vei.

17Rawma khih a vaw tlô nona kha, thata na tlua ta, einâ vaw hmô.

18Ephesi khih liata kyh to liata eina chakaozie chhao kha a siapa ta nama pahno. Cha noh liata Abeipa tawhta zawngiahna hmô awpa ta, Abeipa ta ano cha pasai mawh sy!

Jump to: Chapter 2 →