Amos 3

Chin (Mara Bible RV (BSI))

← Chapter 2 Jump to: Chapter 4 →

1Hy Izarei sawzy saih u, Abeipa ta nama hnohta a reipa bie he nathlie u la, Izi râh tawhta ei chhi papuapa Izarei phopi ta thei teh u:

2“Khizaw phopi zydua hry liata, Nâmo deita he ei pahnopa na châ; Chavâta nama moleina zydua vâta Ei cha hrie aw ei.”

3“Ama sie nawpa su a lyu leipa sala, Chyhsa pano ama sie khoh thei aw ma?

4Sa a taipa y leipa ta, Lyurâhpa liata chakeibarôhneipa â rôh beih ma? A lapa y leipa ta, Chakeibarôhneipa lochopa chhao, A khaoh tawhta â rôh beih ma?

5A laopatai y leipa ta, Alei khoheih liata pavaw â ao aw ma? Khoheih liata a aopa y leipa ta, Khoheih alei tawhta â pie aw ma?

6Khihpi liata chiahmie tô ei sala, Zawpi chi leipa ta ama y aw ma? Abeipa ta a patlôsa leipa ta, Khihpi liata chhiena a vaw tlô aw ma?”

7“A chakaotuhpa hrohsopazy hnohta, A bieru a phuah ha tua leipa ta cha, Abeipa Zehôvâh ta khâpa hmah tao beih vei.

8Chakeibarôhneipa a rôh ha ta, Ahy ma chi leipa ta a y aw? Abeipa Zehôvâh ta bie reih ha ta, Ahy ma phuah leipa ta a y thei aw?”

9“Asadô abei ozy liata phuah u la, Izi râh abei ozy liata phuah teh u: ‘Samâri tlâhpizy liata a hmaohpakhy u la, Cha liata tymâna rarôh ypazy moh u la, A chhôh liata tlybainazy a ypazy moh teh u.’”

10“Ama thokhy chhôh liata thachahra hmâh ei ta, Hraona a pachôpazy châta la, Â dopa ta hmo taozie pahno veih ei,” Abeipa ta a tah.

11“Chavâta Abeipa Zehôvâh ta hetana heta a tah: Khakhaipazy ta râh vaw dôh aw ei ta, Na thokhyzy parao aw ei ta, Na bei ozy ama hrao aw.”

12Abeipa ta hetana heta a tah: “Mietaku vaituhpa ta, Mietaku phei miano tlyma, A nakao chhâ tlyma, Chakeibarôhneipa tawhta a chhu tyhpa hawhta, Samâri liata Izarei sawzy chhao, Rakhô phei nata dyuchhai bâh zy chhaota, Pachhapa ama châ aw.

13Nathlie u la, Zakaw pathlazy zikyu a râ teh u,” Abeipa Zehôvâh, Pheisaihzy Khazohpa ta a tah.

14“Cha noh liata, Izarei cha a moleinazy vâta hrie aw na ta, Bethel maisâhzy ei hrie aw; Maisâh kizy chhawh pathlahpa châ aw ta, Alei liata ama pao aw.

15Chasipaw o nata nopi o zy parao khai aw na ta, Sianaoh ozy leidia aw ei ta, O rônahpazy chhâna a tlô aw,” Abeipa ta a tah.

← Chapter 2 Jump to: Chapter 4 →