Ezra 1

Chin (Mara Bible RV (BSI))

Jump to: Chapter 2 →

1Persia bei Kôresâ â beina kô khana liata, Zeremiah pakah tawhta a puapa Abeipa bie a vaw tlôpaki thei nawpa ta, Abeipa ta Persia bei Kôresâ palôh pathyu ta. Chatanachata a khinarâh zydua liata biephuahpa tao ta, hetana heta ropa ta a papua:

2“Persia bei Kôresâ ta hetana heta a tah: Abeipa, avâ Khazohpa ta khizaw khinarâh zydua na pie ha ta, Zudâh râh Zerusale khihpi liata ano châta o sapa awpa ta bi eina pie.

3Nama hry liata ano phopi a châpa maih chô liata a Khazohpa cha a hnohta y sala, Zudâh râh liata Zerusale lâ khy sala, Abeipa, Izarei Khazohpa o cha kaw sa mawh sy. Abeipa cha Zerusale liata a ypa Khazohpa a châ.

4Laibâhpazy cha khataih su liata ama ypa chhao ta, ama yna su liata chyhsazy ta tâkâzy, ngôhzy, hmobaohzy nata sahrohzy ta ama bao chyu awpa a châ. Hezy he Zerusale liata Khazohpa o châta lôhthai sôh ama thyupazy hleikhô ta ama thyu via awpazy a châ,” tah ta.

5Chatanachata Zudâh nata Benzami pho pawhrâhpazy, theihthaipazy, Livai pathlazy nata Zerusale liata Abeipa o paduapathi awpa ta Khazohpa ta a palôh a pathyupa zydua thyu ei ta.

6Chyhsazy ta lôhthai sôh ama thyupazy hleikhô ta, ama chheipâh liata chyhsa zydua ta tâkâ hmobaohzy, ngôhzy, hmozy, sahrohzy nata hmo sôhpazy piepa ta, ama ku tha patlô ei ta.

7Bei Kôresâ chhao ta, Nebukaneza ta Abeipa o liata hmobaohzy Zerusale tawhta phaoh ta a khazohzy o liata a sopazy thaoh papua hra ta.

8Chazy cha Persia bei Kôresâ ta sôh avaotuhpa Mitharedâ mohôhna ry liata thaoh papua ta, Mitharedâ ta sôh cha reih ta, Zudâh pawhrâhpa Sebâza hlâ ta.

9A ziepa cha, ngôh rahô 30, tâkâ rahô 1,000, chaizôh 29,

10ngôh biebuh 30, tâkâ biebuh 410 nata hmobaoh hropa 1,000 châ ta,

11ngôh nata tâkâ hmobaohzy cha a zydua ta 5,400 a châ. Babylaw liata sei ta a tâhpazy Zerusale lâ a chhipa ama châ nota, Sebâza ta cha hmobaoh zydua cha Zerusale lâ a phaoh khai haw.

Jump to: Chapter 2 →