Galatians 5

Chin (Mara Bible RV (BSI))

← Chapter 4 Jump to: Chapter 6 →

1Khotalaipa ta y awpa ta Krista ta miah papua ha ta, chavâta â ipa ta a duah u la, sei raopaky a ky heih awpa ta a pasaih khao khuh vy.

2Pachâ teh u, kei, Pawla heta ei cha chho ei. Chopawtaipa namâ pyh khiahta cha, Krista cha nama châta phahnaina hnei aw vei.

3Ahy rai chopawtaipa a pyhpa maih cha, ryhpa bie zydua a zyh paki awpa a châ tahpa ei duakhei heih.

4Nâmo, ryhpa ta thaichâ a chhuahpazy saih u, Krista nata a chhaih ha ei chi ta, ngiachhiena nama paosai haw.

5Keimo deikua la, Thlahpa zawhzi ta, ngiapâna vâta siana to awpa hnabeiseihpa ta, a ngiatiah leipa ta eima hâ.

6Krista Zisu liata la, chopawtaipa tlyma, chopawtaileipa tlyma, phahnaina hnei veih ei. Kyhpachâna ta rai a hriapa ngiapâna dei he a phahnai.

7Arâpasuana liata namâ râ pha tyh thlâ bao na ta, biehmeiseihpa zyh lei awpa ta, ahyzy ma châ pakhâ ha ei tly?

8Cha pasyuna cha nâmo châ awtuhpa tawhta châ vei.

9Thinô chyhta ta viahdie zydua a pathyu tyh.

10Saizie nanopa a pyh aw veih ei chi tahpa Abeipa liata ei lôh. Châ patypamâtuhpa cha, ahy rai châ sala, hriena â tyh aw.

11Unawh saih u, kei he chopawtaipa aduakheina bie a chhopa cha vaw châ ha sah la, khazia taolapa ta ei y pyly? Cha hawhta châ sala, kraws vâta tymâna he a y lei awpa tlai.

12Châ patypamâtuhpazy cha âmosasyh ta a chhawh pathlah lâlao ei sala ei khoh.

13Unawh saih u, khotalaina hnei awpa ta awpa nama châ. Châhrasala nama khotalaina cha sapa ryhpaohna châta hmâh leipa u la, kyhpachâna ta tlao a chakao raihrie teh u.

14“Nâma kyh nâ pachâpa hawhta, na vaih kyh na pachâ awpa a châ,” tahpa bie miakha liana heta ryhpa zydua â ki.

15Nâmo nata nâmo a siepa ta, namâ nie khiahta deikua cha, a vaih teh u. Chataleipatala nâmo nata nâmo ta namâ pahleipadia pathlei aw.

16Chavâta he bie he rei awpa ei khoh, Thlahpa liata y teh u. Chatanachata sapa aohraohna cha pipatlohsa aw veih ei chi.

17Sapa khona ta Thlahpa a dyuh ta, Thlahpa khona ta sapa â dyuh. Nama tao khohpa hmozy nama tao thei lei nawpa ta, sapa nata Thlahpa cha amâ dyuh tyh.

18Thlahpa chhihthapa ta nama y khiah deikua cha, ryhpa ry liata y veih ei chi.

19Sapa hmotaopazy cha a lâ thlâh ha ta, hezy he a châ: Apatlana, palôh pathaih leina, parâna,

20nothlahpa achhyna, dyuthaina, ahaona, ahryuna, hiatliana, pathichhiena, ateina, apananona, achhaihna,

21uahvana, sahma parina, niedona nata cha hawhpa lâchhâh hmozy cha, sapa hmotaopazy a châ. Zikyu ei châ râ hapa hawhna ei khata, zikyu ei châ râ heih ei. Cha hawhpa hmo a taotuhpazy cha Khazohpa khinarâh to aw veih ei.

22Thlahpa theilâpa deikua cha, kyhpachâna, thaphana, thlalôhna, daotheina, nôphana, phana, ngâchhihna,

23areisina nata asohsina zy a châ. Thlahpa theilâpazy chakhianazie ta ryhpa biepiepa rai y vei.

24Krista Zisu liata a ypazy ta sapa cha a aohraohna nata a khonazy chhaota ama khaipâ haw.

25Thlahpa ta a hrohpa eima châ khiahta cha, Thlahpa liata y ei suh u.

26Keimo nata keimo a pahao leipa ta, keimo nata keimo a uahva hra leipa ta, a pasâhsapa ta y khah suh u.

← Chapter 4 Jump to: Chapter 6 →