Haggai 1

Chin (Mara Bible RV (BSI))

Jump to: Chapter 2 →

1Bei Dâria abeina kô nona, thla charuna, noh khana noh ta, hrohsopa Hâkai hmâpa ta Siati sawchapawpa Zudâh râh ryureituhpa Zerubâbe nata Zehôzadâ sawchapawpa theihthai beichaipa Zawsua hnohta Abeipa bie vaw tlô ta.

2Pheisaihzy Abeipa ta hetana heta a tah: “He chyhsazy heta, ‘A daihti tlô mâh vei, Abeipa o sa pathi nawpa daihti châ mâh vei’ tah ei ta.”

3Hrohsopa Hâkai hmâpa ta Abeipa bie vaw tlô heih ta,

4“He o a rao khai ha nota, nâmo deikua nama o pha ngaitapazy liata nama pahrâpa cha a daihti a châ ma?

5Chavâta Pheisaihzy Abeipa ta hetana heta a tah: Nama lâpizy pakhâta ta moh teh u.

6A hluhpi tu ei chi ta, a chyhta dei nama hria. Nie ei chi ta, nama lôhrâ tlô hlei vei. Doh ei chi ta, nama dâhphi pai hlei vei. A bu ei chi ta, lalôh hlei veih ei chi. Hria hlao la ei chi ta, sahria pyupa liata khô awpa châ deita ta a hlaopa nama châ.

7“Pheisaihzy Abeipa ta hetana heta a tah: Nama lâpizy pakhâta ta moh teh u.

8Tlâh lâ kiah u la, tho za phaoh u la, o cha sa teh u. Cha cha a ly aw na ta, palyupalihpa ta ei y aw,” Abeipa ta a tah.

9“Kôvei pha awpa hnabeiseih ei chi ta, moh teh u, a chyhta dei nama hria. O lâ phaoh ei chi ta, châhrasala ei hmô pathlah khai haw. Khâpa vâta ma a châ? Pheisaihzy Abeipa ta a tah. Ei o vâta a châ. Nâmo nama o chyu nama sa hôlô nota, keima o deikua cha araopa ta khâ a y.

10Chavâta nama chô lâta avâ ta diati pakhâ ta, alei ta kôvei a pakhâ haw.

11Alei chô liata zy, tlâh chô liata zy, sâh thiehpa chô liata zy, kresawhti thiehpa chô liata zy, sathaw thiehpa nata chhaohlei thei a pathei awpa zydua chô liata zy, chyhsapa nata sahroh zydua chô liata nata hriapasana theilâpa zydua chô liata noh ei pakâhsa khai haw,” tah ta.

12Siati sawchapawpa Zerubâbe nata Zehôzadâ sawchapawpa theihthai beichaipa Zawsua nata phopi laibâhpa zydua ta Abeipa ama Khazohpa ao cha thei ei ta, hrohsopa Hâkai chhao cha, Abeipa ama Khazohpa tuapa a châpa hawhta, a bie nathlie ei ta. Chyhsazy ta Abeipa ama hnohta a ypa cha chi ngaita ei ta.

13Abeipa lyuhchâpa Hâkai ta, “ Abeipa ta, ‘Nama hnohta ei y,’ a tah” tahpa ta Abeipa bietapa cha zawpi hnohta phuah ta.

14Abeipa ta Siati sawchapawpa Zudâh râh ryureituhpa Zerubâbe palôh nata Zehôzadâ sawchapawpa theihthai beichaipa Zawsua palôh nata phopi laibâhpa zydua palôh cha pathyu ta. Chatanachata pua ei ta, Pheisaihzy Abeipa ama Khazohpa o cha,

15Bei Dâria abeina kô nona, thla charuna, noh kih nata noh palih noh ta sa pathao ei ta.

Jump to: Chapter 2 →