Joel 1

Chin (Mara Bible RV (BSI))

Jump to: Chapter 2 →

1He he Pethua sawchapawpa Zôela hnohta a vaw tlôpa Abeipa bie a châ.

2Machâzy saih u, he he thei u la, Râhsaw zydua saih u, nah pachôh teh u! He hawhpa hmo he nama chhâ liata a tlô beih ma? Châ pathlatuhzy chhâ liata chhao a tlô beih ma?

3Nama sawzy chho u la, Nama sawzy ta ama sawzy chho ei sala, Ama sawzy ta chhâ hropa chho mawh ei sy.

4Khawsu nie bâhpa tykâ ta nie ta, Tykâ nie bâhpa kuri ta a nie; Kuri nie bâhpa khawthlôhraihpa ta nie ta, Khawthlôhraihpa nie bâhpa cha, Chângyu ta a nie khai haw.

5Nâmo, a paripazy saih u, Thyu u la, cha teh u; Kresawhti a dohpazy saih u, Kresawhti thlôhpa vâpa ta a hrô teh u; Nama pakah tawhta la hapa a châ hih.

6Phopi miakha ta ei râh vaw siehnao ta, Phopi thatlôpa nata maluh rei tiah leipa a châ; A hâhzy chakeibarôhneipa hâh lyu ta, Chakeibarôhneipa panô naoh a hnei.

7Ei kre zôh pamua khai ta, Ei theiku kôzy a patlaw khai haw; A hyhkuazy hlaipa ta alei lâ thy ta, A chiahzy ama raoh khai haw.

8Laihsa kôpa ta a locho no vahpa châta Chaphôh a tupa hawhta, Latho poh a bu u la, Chaphôh tu teh u.

9Niepa hlâna nata dopa hlânazy Abeipa o liata dia ha ta; Theihthaipazy mâchhiesa ei ta, Abeipa chakaotuhpazy mâchhie ama sa.

10Lyuzy rao khai ta, Sâhzy a rao khai haw; Kresawhti kua ta, Sathaw a hi haw; Chavâta chhaohlei cha mâchhiesapa ta a y.

11Hy lyutaopazy saih u, Nozapa ta y u la; Kre sadô mohôhtuhpazy saih u, A hrô teh u; Âtâ nata bâli sâhzy y khao leipa ta, Lyu kôvei a lei khai ha hih.

12Kre zôh uah ta, Theiku kô a raoh haw. Pawmikarânâ nata thiahrâ kôzy raoh ei ta, Epuh kôzy a raoh haw; Lyu liata tho zydua raoh khai ha ta, Chyhsa sawzy alyna a dia haw.

13Nâmo, theihthaipazy saih u, Latho poh a bupa ta chaphôh tu u la, Nâmo, maisâh chakaotuhpazy saih u, A hrô teh u. Hy ei Khazohpa chakaotuhpazy saih u, A vy u la, latho poh a bupa ta Azozâkhihdei a zia teh u! Niepa hlâna nata dopa hlânazy Nama Khazohpa o liata pachhâsapa a châ ha hih.

14Kâhvileipa daihti phuah u la, Pakhypi pathaihpa aw teh u. Machâzy nata râhsaw zydua Abeipa nama Khazohpa o lâ awpakhy u la, Abeipa awsao teh u.

15Abeipa Noh a hnia ha ta, Atotaotheipa tawhta chhiena a vaw tlô; Cha noh cha a rarôh y ngaita kaw dia!

16Eima mohmô lia tlai ta, Niepa pachhâsapa châ ta; Eima Khazohpa o liata Alyna nata thaphana chhâ ha vei ma?

17Chizy cha alei ry liata thu ei ta, Sawvâzy a rua; Sâh thiehpa a y leipa vâta, Apâhzy phiepa a châ.

18Sahrohzy a rôhpa pasazie rimâ cha! Sibie hrohpa a y khao leipa vâta, Viahchao hrizy ama nôpo ta, Mietaku zawzy pasa ama tao.

19Hy Abeipa, nâma tlai ei cha pado. Râhchawhpa sibiepazy cha, Mei ta a patlô khai haw; Lyu liata thozy chhao, Meipaleih ta a kâ khai haw.

20Vahtie tizy kua khai ha ta, Râhchawhpa liata sibiepazy Mei ta a kâ khai hapa vâta, Hy Abeipa, râhsazy taihta ama cha vâ.

Jump to: Chapter 2 →