Lamentations 1

Chin (Mara Bible RV (BSI))

Jump to: Chapter 2 →

1Chyhsa ta a bie tyhpa khihpi kha, Yrupa ta dia â tyu ha bâ! Phopizy hry liata phopi rônahpa kha, Nôhmei hawhta dia a châ ha bâ! Râhzy hry liata abei sawchanô kha, Sei lâta dia â lie haw!

2Vâsâhpa ta zâ ta cha ta, A baih liata mothlih hi vei; A khopaw zydua hry tawhna khata, A thlah a palôh awpa hnei khao vei; A viasazy ta a paphasai ei ta, A chariahpa lâta amâ lie khai haw.

3Zudâh cha seichâna lâ siepa ta pasatao ta, Hriapasa riethei taopa ta a y; Phopizy hry liata pahrâ ta, Apahâna su rai hmô vei; A chadaituhpazy ta a chadai ei ta, A nôpo lichih ta ama kei pha haw.

4Zaio kyhchhi a hlaopa ama y khao leipa vâta, Zaio lâpizy mâchhiesapa ta a y; A thokhy chhikao zydua roryhrapa ta y ta, A theihthaipazy amâ hrô; A laihsazy vâsâhpa ta y ei ta, Ano tlai chhao pasa thata a tao.

5A khakhaipazy ta luhpa châ ha ei ta, A chariahpazy vânoh topa ta ama y; A paraona hluh ngaitapazy vâta, Abeipa ta pasa a pataosa haw; Khakhaipa hmiakô liata, A sawzy seichâna lâ ama sie.

6Zaio sawchanô cha, A rônahna zydua ta a siesai khai haw. A beimachâzy chhao, Si panyuna su a hmô leipa sakhih hawhta ama châ; Âmo â chadaituhpa hmiakô liata, Thachhâpa ta amâ râ.

7Zerusale cha a viavi pasataona noh liata, Hlâno ta hmo sôhpa a hneipa zydua kha â kaw thei. A khihsawzy khakhaipa ku liata ama pao nota, A bao awpa y khao veih ei; A khakhaipazy ta moh ei ta, A paopa cha ama pahneisao.

8Zerusale cha thata molei ta, Chavâta a pualei haw; A thluahruana ama hmô hapa vâta, A za kaw tyhpazy chhao ta ama mohnao bâ; Ano chhao ta a hrô ta, Hiakha lâ tlâ â heih bâ.

9A hnorâh liata a pathaih leina a bai ta, A hmialâ daihti awpa pachâ vei; Chavâta pao chhie ta pao ta, Thlapalôhtuhpa hnei khao vei. “Hy Abeipa, ei pasataona he moh tua, Chariahpa ta pahniena a to ha hih!”

10A hmo sôhpa zydua chô liata, Chariahpa ta a ku a pazawh haw; A supathaihpa liata, Phopizy amâ ngiapa a hmô; Na pakhypi a hlao awpa na pasai leipazy ta, Supathaihpa liata amâ ngia.

11A khihsaw zydua a hrô ei ta, Viahchhâ ama tlua; Ama hro a pazao nawpa ta, Ama ryusôhpazy niedo ta ama ri. “Hy Abeipa, pachâ la, moh tua, Mohnaopa ta ei y ha hih.”

12“Zaio a chapiapa zydua saih u, pachâ u la, moh tua u, Nâmo châta khâpa tahna hmah châ vei ma? Ei chô liata a tlôpa ei pachârôhna hawhpa he, A y beih rai tlyma? A hiehâhna ru ngaitapa noh liata, Abeipa ta pasa eina pataosapa hawhpa he a y beih tlyma?

13“Chô lâ tawhta mei za tuah ta, Ei rupa chhôh liata a pangiasa haw; Ei phei châta sao parai ta, Eina pakuasa haw; Noh y ta ziahzirohpa ta na paysa ta, Panaopa ta eina paysa haw.

14“Ei paraona cha raopaky liata chahry pâpa châ ta, Abeipa ta ano ku tlai ta a chahry pâ haw; Ei rao liata pakypa châ ta, Ei tha a pazeisa khai haw; Ei pahnie thei lei awpazy ku liata, Abeipa ta eina hlâ haw.

15“Ei pasaipha zydua kha, Abeipa ta a thy khai ha ei; Nâ dyuh awpa ta pakhypi aw ta, Ei satliazy pahleipadia awpa ta pakhypi a aw; Zudâh sawchanô laihsa kôpa cha, Kre saohna liata kre thei tlypa hawhta Abeipa ta a tly haw.

16“Hezy vâna heta cha na ta, Ei mothlih ti hawhta a loh; Thlapalôhtuhpa hra cha nâ hla ha ta, Ei hro tha nâ patlô awpa y khao veih ei; Chariahpa ta pahniena to ha ta, Ei sawzy roryhrapa ta ama y.”

17Zaio cha a ku pazawh ta, Châhrasala thlah a palôh awpa y veih ei; Abeipa ta Zakaw kyh liata biepiepa papua ta, A vaihzy cha a khakhaipazy a pachâsa ha ei; Chatanachata Zerusale cha ama hry liata, Hmo puapa a vaw châ haw.

18“ Abeipa cha a siapa châ ta, A bie a zyh leipa cha keima he ei vaw châ; Chatahrasala Hy phopi zydua saih u, nathlie u la, Ei pasataona he moh tua u; Ei satlia laihsa zy Seichâna lâ ama sie khai ha hih.

19“Ei khopawzy aw ei na ta, Châhrasala einâ paphasai khai ha ei; Ei theihthaipazy nata ei machâzy chhao, Khihpi liata ama thi khai haw; Ama hro a pazao nawpa ta niedo tlua ei ta, Ama hmô leipa vâta ama thi khai haw.

20“Hy Abeipa, moh tua, nôpopa ta y na ta, Ei chhôh a zoh khai haw; Ei chhoruna vâta, Ei palôh â tymâ khai haw. Zaozi ta hawtizy khiliah liata thie ta, O chhôh liata chhao thina hawhta a châ.

21“Ei hrôpa thei ei ta, Châhrasala thlah nâ palôhtuhpa y veih ei. Ei chariahpa zydua ta ei nôpona thâtih thei ei ta, Cha hawhta eina paysapa chi cha amâ ly kaw. Noh na raopa vaw patlôsa ha chi ta, Âmo chhao kei hawhta châ hra mawh ei sy.

22“Ama paraona zydua na hmiakô liata vaw tlô sala, Âmo cha hria mah y; Ei paraona zydua vâta ei chô liata na taopa hawhna heta, Âmo chô liata chhao tao mah y; Thata a hrô na ta, Ei palôh a panao khai ha hih.”

Jump to: Chapter 2 →