Nehemiah 1

Chin (Mara Bible RV (BSI))

Jump to: Chapter 2 →

1Hezy he Hâkaliah sawchapawpa Nehemiah biezy a châ. Kô kihna, Kislev thla liata, Susâ liata abei o liata ei y nota,

2ei unawhpa Hânani nata Zudâh râh tawhta chyhsa thokhazy vaw tlô ei ta. Seichâna tawhta a puapa Zu chyhsazy nata Zerusale thâtihzy hiahri ei na ta.

3Âmo ta ei hnohta, “Seichâna tawhta a vaw kuapa, Zudâh râh liata ahrohpa ta a ypazy cha, nôpo ngaitapa nata noza hmiachhiepa ta y ei ta, Zerusale thokhy cho khai ha ta, a chhikaozy mei ta a kâ khai haw,” tahpa ta na chho ei ta.

4Cha biezy cha ei thei nahta, thlai a tyuh na ta, cha na ta, noh hluhpi mâchhiesa na ta, avâ Khazohpa hmiakô liata kâhvileipa ta thlahchhâ na ta.

5“Hy Abeipa, avâ Khazohpa, Khazohpa rônahpa nata zachhihpa, kyh cha pachâ ta, na biepiepa a zyhtuhpazy chô liata biehrai patlôpa ta, ngiachhiena a palâsatuhpa y,

6Izarei sawzy moleina, na chô liata eima moleinazy reihpha ei cheina he na nah vaw pachôh la, na mo vaw padeih la, châ chakaotuhpa, na phopi Izarei sawzy châta, châ chakaotuhpa ta chhô nah zâ ta na hmiakô liata ei thlahchhâna he rie vaw nathlie mah y. Kei nata ei chiheihzy ta eima vaw molei haw.

7Na chô liata hmo pha lei ngaitapa tao pi ta, châ chakaotuhpa Mawsi hnohta na piepa biepiepazy, bieraopazy nata ryhpazy zyh khoh ma pi.

8Châ chakaotuhpa Mawsi hnohta, ‘Ngâ namâ chhih leipa khiahta cha, phopizy hry liata cha hiepatla aw ei na ta,

9kei lâ vaw kuapa ta, ei biepiepazy zyhpa ta nama tao khiahta deikua cha, avâ chy chhâna taihta papuapa châ hra u la, cha tawhta châ chhi pakhy aw ei na ta, ei moh y nawpa ta ei tlyhpa su lâ ei châ chhi heih aw ei,’ tahpa ta bie na piepa kha, rie a thei mah y.

10He sahlao he na hmotaotheina rônahpa nata na ku thatlôpa ta na chatlaipa, châ chakaotuhpazy nata na phopi ama châ hih.

11Hy Abeipa, châ chakaotuhpa thlahchhâna lâ he na nah rie vaw pachôh mah y. Na moh china liata a lypa, châ chakaotuhpazy thlahchhâna lâ na nah vaw pachôh la, châ chakaotuhpa he tanoh hlao na patlohsa la, he chyhsa mohmô liana heta zawngiahna rie na patosa mah y,” tah na ta. Kei cha abei nyu hlâtuhpa ei châ.

Jump to: Chapter 2 →