Philemon 1

Chin (Mara Bible RV (BSI))

Jump to:

1Krista Zisu châta a tâhpa Pawla nata eima unawhpa Timawthy ta eima viasa kho ngaitapa nata eima hrialâhpa Philemaw,

2eima sietanô Aphia, eima pheisaih châ lâhpa Akhipâ nata na o liata Awnanopa a pakhypa zy eima châ naoh.

3Khazohpa eima Paw nata Abeipa Zisu Krista tawhta ngiachhiena nata thlalôhna nama hnohta y mawh sy.

4Ei thlahchhânazy liata châ thei tyh na ta, na moh reipa ta ei Khazohpa hnohta alyna bie khâ ei reih tyh.

5Abeipa Zisu nâ ngiapâna nata mopathaihpa zydua kyh na pachâzie zy vaw thei na ta,

6Krista vâta hmo pha to eima hneipa na pahno paki thei nawpa ta, nâ ngiapâna bie cha tiamapa ta chho lymâ awpa ta thlah ei cha chhâpa tyh.

7Unawh y, nâma zawhzi ta mopathaihpazy palôh pathiehpa ta y ta, na kyhpachâna ta alyna nata thlalôhna thata eina pie.

8Cha vâna chata, â ngiahpa hmo tao awpa bie cha pie awpa ta, Krista liata cha ngâh thlâh hraw sah la,

9kyhpachâna vâta, kei, Pawla, pawpipa nata tahmâ Krista Zisu vâta a tâhpa heta, â haw ta ei châ haw.

10Ei sawchapawpa Ônesimâ, bâlia ei ky chhôh ta sawchapaw ta ei hneipa châta ei châ haw.

11Kha hlâta na châta phahnai leipa ta, tahmâ deikua cha, nâ nata kei châta a phahnai haw.

12Cha chyhsa, ei palôh nâ hria chaipa cha, nâ lâ vaw kua awpa ta ei vaw pasiesa.

13Thâtihpha vâta patâhpa ei châ chhôh ta ei hnohta y sala, nâma vyuhpa ta na chakao sala tahpa ei khoh kaw.

14Châhrasala na hmo pha tao awpa cha, pataosa raruahpa châ leipa ta, nâma lôhthai tlai ta a taopa na châ awpa ei khohpa vâta, na bie leipa ta khâpa hmah tao awpa khoh va na.

15Buakhata a châ chhaihpa kha, chhâzaw ta ano na hnei palâh nawpa a châ thei mâh tâh.

16Châhrasala sei hawhta châ khao leipa ta, sei hlâta pha viapa, unawh kho ngaitapa hawhta a châ bâ aw. Keima châta unawh kho ngaitapa châ ta, nâma châ chhochhi ta cha, sapa liata nata Abeipa liata unawh kho ngaitapa a châ pachai aw.

17Chavâta na hrialâhpa ta eina pachâ khiah chi ta cha, keima einâ ly awpa hawh chi ta ano he a vaw ly mah y.

18Na chô liata hmo paraopa kheihawhpa rai a hnei khiahta tlyma, leibâh kheihawhpa rai a hnei khiahta tlyma, kei ta ei châ bâhpa hawhta rao mah y.

19He bie he kei Pawla ta, keima ku tlai ta ei ropa a châ, keima ta ei cha thô aw. Nâ ta keima liata a bâhpa na hneipa, na pôhpa tlai chhao einâ bâhpa chi, ei tahna deikua la châ vei.

20Chatatlyh, unawh y, Abeipa liata eina phahnaikhei hra awpa chi ei khoh kaw. Krista liata ei palôh na pathieh heih mah y.

21Reingiahna na hneipa liata a lôhpa ta, ei reipa hlâ chhao ta a pha viapa ta na tao aw tahpa pahnopa ta, he châpaphaopa he na hnohta ei vaw ropa a châ.

22Khâpa rai châ sala, khichhai chhôhpadâhpa nâ vaw chhuanohpa mah y. Nama thlahchhânazy vâta nâmo lâ avyna daihti piepa ei châ aw tahpa ei hnabei a seih.

23Krista Zisu vâta ei tâlâhpa Epâpharâ ta a châ naoh.

24Ei hrialâhpa Mâka, Aristaku, Demâ nata Luka zy chhao ta ama châ naoh hra.

25Eima Beipa Zisu Krista ngiachhiena cha nama thlahpa hnohta y mawh sy.

Jump to: