Philippians 1

Chin (Mara Bible RV (BSI))

Jump to: Chapter 2 →

1Pawla nata Timawthy, Krista Zisu chakaotuhpazy ta Philipi khih liata a ypa Krista Zisu liata mopathaihpazy, Awnanopa chhituhpazy nata chakaotuhpazy eima châ naoh.

2Khazohpa eima Paw nata Abeipa Zisu Krista tawhta ngiachhiena nata thlalôhna nama hnohta y mawh sy.

3Ei châ theina maih ei ta ei Khazohpa hnohta alyna bie ei reih tyh.

4Nama zydua châta thlah ei chhâna maihta, thapha ngaitapa ta ei chhâ tyh.

5Thâtihpha raihria liata, noh khana noh tawhta tahmâ taihta eina hrialâh lymâ ei chi.

6Nâmo liata raihria phapa a pathaotuhpa khata, Zisu Krista noh liata a pangoh aw tahpa ei ngiapâ.

7Bâlia ei kypa liata nata thâtihpha a duakheipa ta ei pa-ina kyhzy liata Khazohpa ngiachhiena ei tolâhpazy nama châpa vâta, ei palôh liata khâ nama y. Chavâta nama zydua chô liata cha hawhpa palôh ei phaopa cha, kei châta tao awpa dopa a châ.

8Zisu Krista liata atlaichhaina ta nama zydua ei cha vânazie ei cha, Khazohpa ta eina pahnokhei.

9Nama kyhpachâna pôh via rili sala, novâhna nata pahnona zydua liata nama laiseih thei nawpa ta thlah ei chhâ tyh.

10Chatanachata hmo pha chaipa pahnopa ta, Krista noh châta pathaihpa nata seina hnei leipa ta y aw ei chi ta,

11Khazohpa rônah nawpa nata reithai nawpa ta, Zisu Krista zawhzi ta a patheipa siana thei ta pabiepa nama châ aw.

12Unawh saih u, ei chô liata hmo a vaw tlôpazy kha, thâtihpha râh pakawh nawpa a châ tahpa nama pahno awpa ei khoh.

13Bâlia ei kypa he Krista vâta a châ tahpa abei o vaituhpa pheisaihzy nata chyhsa hropazy chhao ta ama pahno.

14Bâlia ei kypa heta unawh hluhpi Abeipa liata ama riah paphasa ta, chi khao leipa ta, riahpha viapa ta Khazohpa bie ama chho lymâ.

15Thokha cha hiatliana nata aiehkhyhna vâta Krista bie chho ei ta, thokha deikua cha thapasana vâta Krista bie ama chho.

16Thapasana vâta Krista bie a chhopazy cha, thâtihpha ei duakheipa vâta patâhpa ei châzie pahnopa ta, kyhpachâna ta Krista bie ama chho lymâ.

17Hiatliana nata a iehkhyhna vâta Krista thâtihpha a chhopazy deikua cha, ei tâhna liata pasana baichha a chhuahpa ta, palôh hmeiseihpa ta châ leipa ta, aiehkhyhna vâta Krista bie ama chho.

18A peina a y ma? A pakheipa rai châ sala, a hmeiseihpa rai châ sala, a peimawhpa cha, kyh to ta Krista bie chhopa he a châ. Cha vâna chata a ly na ta, ei ly lymâ aw.

19Nama thlahchhâna vâta nata Zisu Krista Thlahpa baona vâta, cha hmo cha papuapa ei châ nawpa a châ aw tahpa ei pahno.

20Maophyuhpa ta y leipa aw na ta, ei pôhpa liata Krista palyupalihpa ta a y tyhpa hawhta, thina ta tlyma, hrona ta tlyma, Krista cha ei pôhpa liata palyupalihpa ta a y aw tahpa cha, tahmâ chhao riahpha ngaitapa ta ei saduthliepa nata ei hnabeiseihpa a châ.

21Kei châta la hro he Krista châ ta, thi chhao athôhna a châ.

22Ei hroh chy khiahta cha, chakaona theilâpa hmô awpa ta a hrohpa ei châ. Kheihawhpa ma ei tlyh aw tahpa pahno va na.

23A likah liata pachâna pahno leipa ta ei y. Kei la sie ta, Krista hnohta y bâ awpa ei khoh. Cha cha kei châta a pha via syulyu.

24Châhrasala ei hroh chy awpa he nâmo châta byuh viapa a châ.

25Cha cha ei ngiapâpa vâta, ei hroh chy aw tahpa ei pahno. Ngiapâna liata laiseih u la, namâ ly nawpa ta, nama hnohta ei y chy aw.

26Nâmo lâ ei vy heih awpa vâta, Krista Zisu liata namâ lyna keima vâta a pôh rili aw.

27Khâpa rai châ sala, nama hro cha Krista thâtihpha nata a hmie tua mawh sy. Chatanachata nâmo ei châ vaw hmô ei tlyma, hmô vei ei tlyma, thlahpa miakha liata â ipa ta a duahpa ta, palôh miakha phaopa ta thâtihpha ngiapâna bie a châhkhei ei chi ta, nama tei lymâ tahpa ei vaw pahno aw.

28Khâpa kyh liata hmah châ dyuhtuhpazy chi veih ei chi tahpa chhao ei vaw pahno aw. Cha cha pahleipadia awpa ama châpa ngiana châ ta, nâmo châta deikua cha, pachha awpa nama châpa ngiana a châ. Cha pachhana cha Khazohpa tawhta a châ.

29Krista namâ ngiapâpa dei châ leipa ta, ano vâta pasa nama tao awpa chhao pasaipa châ tlôh ta.

30Keima liata adyuhna nama hmô tyhpa, tahmâ chhao ei tyh haipa nama theipa, cha adyuhna tlai cha nâmo chhao namâ tyh hra hih.

Jump to: Chapter 2 →