Ruth 1

Chin (Mara Bible RV (BSI))

Jump to: Chapter 2 →

1Ryureituhpazy ta ryu ama reina daihtizy liata, Izarei râh liata chakâhna vaw tlô ta. Zudâh râh Bethlehe chyhsa pakha cha, a lapinô nata a sawchapaw panopazy chhaota Môabâ râh liata pahrâ chy awpa ta sie ta.

2Cha chyhsa moh cha Elimele châ ta, a lapinô moh cha Naomi châ ta, a sawchapaw panozy moh cha Mâhlô nata Khilô a châ. Âmo he Zudâh râh Bethlehe khih liata a ypa Epharai chi ama châ. Môabâ râh lâ sie ei ta, cha liata y ei ta.

3Naomi vahpa Elimele cha thi ta, chavâta Naomi cha ano nata a sawchapaw panozy deita ta y ei ta.

4A sawchapawzy ta Môabâ zuahzy lapinô ta hnei ei ta, pakhanô moh cha Ôpâ châ ta, ahropa moh cha Ruthi a châ. Cha liata kô hrawh rachhôh ama y tawhta,

5Mâhlô nata Khilô chhao cha thi ha hra ei ta. Cha chanô cha a sawchapaw pano nata a vahpa y khao leipa ei ta, ano deita ta siesaipa châ ha ta.

6Abeipa ta a chyhsazy za tly ta, niepa a pie ha ei tahpa Naomi ta Môabâ râh tawhta thei ta. Chavâta Môabâ râh tawhta a lie awpa ta a myuhnôzy chhaota a thao ei ta.

7A myuhnô panozy nata ama yna su tawhta pua ei ta, Zudâh râh lâ a lie awpa ta amâ thao.

8Naomi ta a myuhnô panozy hnohta, “Sie u la, nama nô o chyu lâta kua ha muh vy, athipazy chô liata nata keima chô liata nama taopa hawhna heta, Abeipa ta nama chô liata nôpha ngaitapa ta tao hra mawh sy.

9Abeipa ta nama vahpazy o liata namâ pahâ thei nawpa ta, nama pano ta cha ngiachhie mawh ei sy!” tah ta. Chatawhcha a myuhnôzy cha a pahnâ ta, aoh tlili ta cha ei ta.

10A myuhnôzy ta a hnohta, “Kua aw ma pi, na chiheihzy lâ cha eima châ liekhei aw,” tah ei ta.

11Naomi ta, “Ei sawchanôzy saih u, kua ha muh vy. Khazia ei hnohta nama sie hra aw? Nama vahpa awpa sawchapawzy ei chhi liata ei hnei thei khao aw ma?

12Ei sawchanôzy, kua u la, nama o lâ a di ha muh vy. Vahpa hnei awpa ta ei machâ tu ha bâ hih. Hnabeiseihna hneipa ta, tazâ liana tlai heta vahpa hneipa ta sawchapawzy sa hraw sah la,

13ama pitlohna taihta nama hâ thei aw ma? Dyhchâ leipa ta ma âmo châta namâ kuh thlâh ha aw? Châ bao va, ei sawchanôzy saih u, nâmo vâna heta ei pachâ a rôh ngaita. Abeipa ta ei chô liata ku a pathla ha hih,” tah ta.

14A myuhnôzy cha aoh tlili ta cha heih ei ta. Opâ ta a nohnô cha a pahnâ ta, Ruthi deikua cha a nohnô khâchâ patu ha ta.

15Naomi ta, “Moh teh, na narônô cha a chiheihzy lâta nata a khazohzy lâta a kua ha huh, nâ chhao na narônô hao pazi la kua ha hra mah y,” tah ta.

16Ruthi ta, “Nâma cha siesai awpa tlyma, nâma ei cha pazipa tawhta kua awpa tlyma ta na reipasao khah y. Na siena lâ maih sie aw na ta, nâ riena maih liata ei rie hra aw. Na chiheihzy cha ei chiheihzy châ aw ei ta, na Khazohpa cha ei Khazohpa a châ aw.

17Na thina liata thi aw na ta, cha liata eina pabu aw ei. Nâ nata kei he, thina dei leipa ta, hmo hropa ta miah a pachhaih khiahta cha, Abeipa ta ei chô liata a kho ta tao sala, cha hlâta pasa viapa chhao ta tao mawh sy,” tah ta.

18Naomi ta Ruthi cha a hnohta sie awpa khâchâ â chhuah hapa a hmô nahta, khâpa hmah reih khao vei.

19Bethlehe ama tlô hlâlei cha ama pano ta sie lymâ ei ta. Bethlehe ama tlô nahta, âmo vâta a khihpi ta a chia ei ta, chanôzy ta, “He he Naomi kha châ vei ma?” tah ei ta.

20Naomi ta ama hnohta, “Naomi na tah khah u, Marâh na tah teh u, Atotaotheipa ta nôpo ngaitapa ta eina tao ha hih.

21Abiepa ta pua na ta, Abeipa ta aruapa ta o lâ eina vaw padisa haw. Khazia Naomi khâ eina tah ei chi, Abeipa ta thailei na pachâ ta, Atotaotheipa ta ei chô liata chhiena a patlôsa ha hih,” tah ta.

22Chatanachata Naomi cha a myuhnô Môabâ zuah Ruthi chhaota Môabâ râh tawhta a vaw lie ta, Bâli sâh hria pathao daihti liata Bethlehe kei tlô ei ta.

Jump to: Chapter 2 →