Song of Solomon 6

Chin (Mara Bible RV (BSI))

← Chapter 5 Jump to: Chapter 7 →

1Hy chanôzy hry liata chhithai chainô, Na lôhdupaw cha khataih lâ a sie haw? Na lôhdupaw cha khataih lâ ma sihnôh a kua haw? Eima cha vaw tluakhei aw hih.

2Ei lôhdupaw cha a sadô lâ sie ta, Ropahâhpa rakhôzy yna lâ a sie haw. A sadô liata a mietaku zaw patlaihsa awpa ta sie ta, Lilipawzy lyu awpa ta a sie haw.

3Ei lôhdupaw eih châ na ta, Ei lôhdupaw chhao kei eih a châ; Ei lôhdupaw cha lilipawzy hry liata A mietaku zawzy a patlaihsa tyh.

4Hy ei lôhdunô, Tizah hawhta a ngiapa ta, Zerusale hawhta kho a chhih chi ta, Pohraipazy a chaluahpa pheisaih hri hawhta, Hihâ na hnei ngaita.

5Na mozy ta na pahnie tu ha ei ta, Rie na moh khao khah y; Na sâ chhao mie hri lyu ta, Kilia tlâhpi tawhta a zâ chôpa mie hri tlai a lyu.

6Na hâhzy cha ti pasi khai tawhta a vaw puapa, Hmi ngyu duapa mietaku panô zawzy lyu ta, Ama zydua ta maphieh taw pataw chyu ei ta, Ama taw ama pahlei tlâ leipa hawhta a châ.

7Nâ khuna poh ry liata na ôkhaihzy cha, Pawmikarânâ patlawpazy a lyu.

8Beinô sycharu nata nôtho sycharie y ei ta, Laihsa kôpa rei tiah lei ama y.

9Ei vachhuh, keima phapakinô deikua cha, Pakha deita a y; A nô sawchanô hnei chhôhpa châ ta, Ano a satuhpa a nô mody chaipa a châ. Chanôzy ta ano cha hmô ei ta, Nohlao ama tah. Beinôzy nata nôthozy chhao ta ano cha hmô ei ta, Hetana heta ama reithai:

10“My khihdei hawhta pavâpa ta, Chôthlapi hawhta panyu ta; Noh lynô hawhta khaihpa ta, Pohraipazy a chaluahpa pheisaih hri hawhta Hihâ a hneipa cha ahy ma a châ tly?”

11Saikao liata pawpi a pawhpazy sai ta, Kre zôhzy ama paw ama pabyuh mâh ma tahpa mopa ta, Pawmikarânâzy ama paw ama pakai mâh ma tahpa moh awpa ta, Thei hyh châpa sadô lâ zu na ta.

12Ei vaw pahno hmâ hlâta, Ei khona ta ei chiheih talailihzy liata na sopa ta, Bei talailihzy liata na vaw soh thlâh ha ta.

13Hy Sulâ zuahnô, Vaw kua teh, vaw kua teh; Eima mo eima cha tawpâna hâh ta, Vaw kua la, vaw kua ha mah y. Khazia Mahânai lâ mopa hawhta, Sulâ zuahnô cha nama mo nama tawpâ thlâh ha aw tly?

← Chapter 5 Jump to: Chapter 7 →