Titus 1

Chin (Mara Bible RV (BSI))

Jump to: Chapter 2 →

1Kei, Pawla he Khazohpa ta â tlyhpa chyhsazy angiapâna châta nata Khazohpa pachâna lâ a chhihthapa biehmeiseihpa pahnona châta Khazohpa chakaotuhpa nata Zisu Krista lyuhchâpa ei châ.

2Haipa bie a reih beih leipa nata khizaw y hlâ tawhta chhâzaw hrona bie a vaw taih hapa Khazohpa a ngiapâtuhpa ei châ.

3A daihtita liata a vaw luahpa chhâzaw hrona bie cha, Khazohpa miah Pachhatuhpa biepiepa ta pavaosapa châ na ta, cha bie a chhotuhpa, kei, Pawla heta,

4ngiapâna miakhapa liata ei saw hmeiseihpa Titu ei châ naoh. Paw Khazohpa nata Krista Zisu miah Pachhatuhpa tawhta ngiachhiena nata thlalôhna na hnohta y mawh sy.

5Hmo pasia khai leipazy pasia awpa nata bie ei cha piepa hawhta khi to liata Awnanopa chhituhpazy rao awpa ta, Krite liahpahlô liata ei cha siesaipa kha a châ.

6Awnanopa chhituhpa châ awpa ta cha, seina hnei leipa, lapinô pakha a hneipa, a sawzy nôchhiepa nata reingiah leipa châ leipa ta, ngiapâtuhpa ama châ awpa a châ.

7Awnanopa chhituhpa cha Khazohpa sôh mokhâhtuhpa a châpa vâta, seina hnei leipa a châ awpa a châ. Chyhsa apalaipa, pathichhiepa, kresawhti pari hmâhpa, thachahra a hmâhpa nata avyuhna ta athôhna a tluapa a châ awpa châ vei.

8Khichhai a pasôpa, phana a khohpa, a sohsi theipa, chyhsa siapa, chyhsa pathaihpa, sasyh a vao pahniepa a châ awpa a châ.

9Awnanopa chhituhpa cha biezyhpa dopa a pachu thei awpa châ ta, biezyhpa dopa chakhiatuhpazy a padei thei nawpa ta, pachuna dopa â ipa ta a patu awpa a châ.

10Ryhpa a zyh khoh leipa, bie a reih chakhyhpa nata chyhsa dôvei hmâhpa hluhpi, a eih pachaipa ta, chopawtaipazy hry liata ama y.

11Cha sahlao cha ama pakah chahu awpa a châ. Avyuhna nozachhihpa ama tao thei nawpa ta, pachu lei awpazy pachu ei ta, chhôhkha zydua ama patypamâ.

12Krite chyhsa, ama hrohsopa cheingei ta, “Krite chyhsazy cha haihthaipazy, sahrâh moleipazy, thathi rikawhpa zy ama châ zôzaw,” tahpa ta reih ta.

13Cha bie cha â do. Chavâta ngiapâna liata â dopa ta ama y thei nawpa ta, a pasa kawpa ta âmo cha chhorei mah y.

14Zuzy phôhpa nata biehmeiseihpa a heisaituhpa biepiepazy cha uasa lei awpa ta âmo cha chhorei hra mah y.

15Mopathaihpazy châta ato pathaih ta, chyhsa puapa nata ngiapâleipazy châta deikua cha, khâpa hmah pathaih vei. Ama palôh phaozie nata ama chhie nata pha pahnona a pua khai haw.

16Khazohpa pahno a tah ei ta, châhrasala ama hmotaopazy ta Khazohpa cha amâ paphasai. Pasichhihpa nata reingiah leipa châ ei ta, hmopha tao awpa ta khâpa kyh liata hmahta a tlâh a châ leipazy ama châ.

Jump to: Chapter 2 →