Zephaniah 1

Chin (Mara Bible RV (BSI))

Jump to: Chapter 2 →

1He bie he Amawna sawchapawpa, Zudâh bei Zôsia â bei nota, Hezekia sawchapawpa Amaria, Amaria sawchapawpa Kedaliah, Kedaliah sawchapawpa Kusi, Kusi sawchapawpa Zephania hnohta Abeipa bie a vaw tlôpa a châ:.

2“Hmo zydua alei chô tawhta Ei pahleipadia khai aw,” Abeipa ta a tah.

3“Chyhsa nata sazy pahleipadia aw na ta, Avâ pavawzy nata tilaipi ngazy ei pahleipadia khai aw. Moleipazy papao aw na ta, Alei chô tawhta chyhsa ei pamua ha aw,” Abeipa ta a tah.

4“Zudâh chô liata ei ku hy aw na ta, Zerusale khihsawzy chô liata ei ku ei hy aw. Bâlâ laibâhpazy cha, He su tawhta chhawh pathlah aw ei na ta, Nothlahpa theihthaipa mohzy chhao, A theihthaipazy chhaota ei chhawh pathlah khai aw ei.

5Avâ liata hmozy vâphuh tawhta a chhy tyhpazy Chhawh pathlah aw ei na ta, Abeipa lâta a bôhpa ta bie a taih ha tlô ta, Môleka lâta bie a taih heihpazy Ei chhawh pathlah aw ei.

6Abeipa pazi ha tlôh ta a kuasai heihpazy Chhawh pathlah aw ei na ta, Abeipa tlua leipa ta, ano a saohiah leipa maih cha, He su tawhta ei chhawh pathlah khai aw ei,” Abeipa ta a tah.

7Zehôvâh Khazohpa hmiakô liata a chalih teh u, Abeipa noh â hnia haw; Abeipa ta atheihna a chhuanoh ha ta, A hruapazy a pathaisa haw.

8Abeipa atheihna hlâna noh liata, “Beimachâzy nata abei sawchapawzy hrie aw ei na ta, Chihropa chysia a tobipa zydua ei hrie aw ei.

9Cha noh liata, Panana châkeih a zawpakhô tyhpa zydua hrie aw ei na ta, Thachahra hmâna nata dôveina ta ama khazoh o a pabiepazy ei hrie aw ei.

10“Cha noh liata, Nga Chhikao tawhta chana ao a pua aw; Vaih Thieh tawhta pachârohna ao pua aw ta, Tlâhthlôhzy tawhta raona pyu paro ngaitapazy a pua aw.

11Nâmo, sôdaohna su liata a pahrâpazy saih u, A rôh teh u; Sôhpaliepa zydua y khao leipa ei ta, Tâkâ a pathliahpa zydua ama leidia khai haw.

12Cha daihti liata, Meiôh ta Zerusale ei tlua aw; Nyu chaopahrâ liata Kresawhti didâh hawhta Chhôhmohpa ta y ei ta, Ama palôh liata, ‘ Abeipa ta hmo phapa tao leipa aw ta, Hmo chhiepa chhao tao hlei aw vei,’ A tahtuhpazy ei hrie aw ei.

13Ama hmozy hraopa châ aw ta, Ama ozy a rua aw. Ozy sa hra ei sala, Cha liata pahrâ aw veih ei; Kre sadôzy tao hra ei sala, A kresawhti doh aw veih ei,” Abeipa ta a tah.

14Abeipa noh rônahpa cha â hnia haw, A hnia ha ta, a vaw tlô daihmâ. Abeipa noh pyu rarôh yzie awpa cha, Pasaipha hmahta thata a sâh aw.

15Cha noh cha hiehâhna noh châ aw ta, Nôpona nata pachârôhna noh a châ aw; Raona nata roryhrana noh châ aw ta, Zohna nata thohna noh a châ aw; Meihdo achhohna noh châ aw ta, Zoh kaluhna noh a châ aw.

16Thokhy khihpizy nata o sâhpazy a dyuh awpa ta, Chiahmie tôna noh châ aw ta, Hladyuh pathluahna noh a châ aw.

17Abeipa chô liata ama moleipa vâta, Chyhsapa chô liata nôpona patlôsa aw na ta, Mochaopazy hawhta ama sie aw. Ama thisaih dohlei hawhta leithapa châ aw ta, Ama sapa ie hawhta thypa a châ aw.

18Abeipa hiehâhna noh liata cha, Ama tâkâ ta âmo pachha thei leipa aw ta, Ama ngôh ta âmo pachha thei aw vei; A hiatliana mei ta râh zydua kâ khai aw ta, Alei liata a pahrâpa zydua chô liata Eikhapi ta chhâna noh a patlôsa aw.

Jump to: Chapter 2 →