Jonah 2

Chin (Matu Bible)

← Chapter 1 Jump to: Chapter 3 →

1Jonah tah nga bung khui lamloh a Pathen BOEIPA taengah thangthui.

2Te vaengah, “BOEIPA te kamah kah citcai lamloh ka khue tih kai n'doo coeng. Saelkhui bung khui lamloh bomnah kam bih vaengah ka ol na yaak coeng.

3Kai he tuipuei tuilung neh tuiva laedil la nan voeih. Kai he na tuiphu boeih loh m'vael tih na lungkuk loh kai soah n'thing.

4Tedae, “Kai tah na mikhmuh lamloh kai n'haek cakhaw, na hmuencim bawkim te paelki ham ni ka koei,' ka ti.

5Kai he tui loh ka hinglu duela a li tih, tuidung loh kai m'vael. Carhaek loh ka lu a bol.

6Tlang yung duela ka suntla tih diklai loh a thohkalh te kai ham kumhal duela a kalh. Tedae ka Pathen BOEIPA loh ka hingnah he vaam lamloh na doek.

7Kai lamkah ka rhae vaengah BOEIPA te ka hinglu neh ka poek. Namah kah hmuencim bawkim ah ka thangthuinah te namah taengla ham pha.

8A honghi aka ngaithuen rhoek loh a poeyoek la a sitlohnah a hnawt uh.

9Tedae kai tah namah taengah uemonah ol neh kan nawn vetih ka caeng bangla BOEIPA lamkah khangnah te ka thuung ni,” a ti.

10Te phoeiah BOEIPA loh nga te a uen tih Jonah te laiphuei dongah a tha.

← Chapter 1 Jump to: Chapter 3 →