1 Corinthians 13

Chin SCB2 (Syin Chin Bible)

← Chapter 12 Jump to: Chapter 14 →

1Mihingte ii kampaute le vantunglalangte ii kampau ngawngawn ka pau thei hial hangin, itna ka nei buale ka paute sia zam nging daak nging bang bek ahi hi.

2Pathian ii hu mop thuhil theina nei a; heakna theampo le thuku theampo telna nei a, mualte khiin zawk natu a kisamh upna teng ka nei hangin — itna ka nei buale kei sia bangma ka hi bua hi.

3Ka neisa na theampo pia siatin, ka pumpi ngawngawn a kihallum tu dongin, ka piak hial hangin, itna ka nei buale, hite in kei atu bangma phatna hong pia bua hi.

4Itna in thin uai a, dik hi; itna in ki eenna nei ngawl a, kisathei ngawl, kiphasak ngawl hi;

5itna in philphit ngawl, duhop ngawl, thintom ngawl hi; itna in ngual khialnate ciamtee ngawl hi.

6Itna in ngitlona thu ah lungdam ngawl hi, thumaan thutak ah lungdam hi.

7Itna in thinkiam ngeingawl a; a upna, a lametna le a thinsauna bo ngeingawl hi.

8Itna in a tawntungin kip hi. Kamsaannate om ahihang tawmvei atu bek ahi hi; kam tumdangte pau theina letsongte om ahihang bo tu hi; heakna letsong om ahihang bo tu hi.

9Banghang ziam cile eite heakna le kamsaanna letsongte sia a cingtaak hi ngawl hi;

10ahihang a kicing sia hong thet ciangin a cingtaak ngawl teng bo tu hi.

11Patang ka hi lai in ka pauna, ka phawna, ka khua ngaisutte in patang bang ahi hi; tu in pasal khat ka hi ciangin patang vai teng ka nusia hi.

12Tu in ih muna in, limlangh sungah a kimu thiang ngawl lim le meal bang ahi hi; tua hun ciangin maitang kisi in ih kimu tu hi. Tu a ka heak sia kicing tak ngawl lai hi; tua zawkciang Pathian in kei hong heakna bangma in, a kicingin ka he tu hi.

13Tu laitakin a taanglai thu thum teng sia: upna, lametna le itna hi a; hi teng sung pan a lianbel sia in itna ahi hi.

← Chapter 12 Jump to: Chapter 14 →