1 Timothy 2

Chin SCB2 (Syin Chin Bible)

← Chapter 1 Jump to: Chapter 3 →

1Tuaciang a masa phitbel kong hanthot nopna panin, maangkaana, thungetna, hu ngetna le lungdamkona sia mihing theampo atu Pathian tungah na vawt vun;

2eite nuam takin kilem vadiam in om thei a, Pathian thasia in a kilawm ngamtatna taw ih nuntak thei natu in kumpite le a dang thu nei uliante atu zongh tuabangin na vawtsak natu kong thawn hi.

3Hi bangin a pha ih vawtte in Pathian ih Ngumpa lungkimsak hi,

4mihing khat sim ngupna nga a, thumaan thutak a heak tu sia Pathian in dei hi.

5Banghang ziam cile Pathian khat bek om a, Pathian le mihing hong kilemsak kik, mihing ahi Jesus Christ khat bek om hi.

6Ama in mihing nam theampo tat natu in, a nuntakna pia hi. Tua in a hun a cin ciang Pathian ii mihing khat sim ngupna a piak nopna thu a lakna hi a,

7tua thu hu in upna le thumaan thutak thangsak tu in, Gentile te ii sawltak khat le sya khat bangin hong kipuak hi. A leilot ka hi bua a; thumaan thutak son ka hi hi!

8Pawlpi sungah biakpiak simin, thin uukna le kinialna om ngawlin, a khut laamin thungen thei a, Pathian tungah a kipumpiak pasalte ii thu a nget tu ka dei hi.

9Numeite zongh a kiniamkhiak ngamtatna le puansilh kizepna ah a etlawm, a hoi ciaciangin khua ngaisutna a nei tu ka dei hi; sam khawng a lamdadang in vawtna taw ahizong, khamhte, keptangte le a manham nikteen puansilhte taw ahizong kizeam ngawlin,

10biakna kin numeite atu taw a kilawm ngamtat phate taw om tahen.

11Numeite in thim khipkhep in om thei in, kiniam khiakna theampo sin tahen.

12Amate in pasalte tungah a hilcian tu ahizong, thu a nei natu ahizong, ka oai bua hi; amate thim khipkhep in om tahen.

13Banghang ziam cile Adam kibitphua masa a, tua zawkciang Eve kibitphua hi.

14Tuaciangin theam a thuak sia in Adam hi ngawl hi; theam thuak a, Pathian thukham a paltan sia in numei ahi hi.

15Ahihang, ama in upna, ki itna le thianthona sungah omdan thiamna taw zom suak pole numei sia ta a neina tungtawnin kingum tu hi.

← Chapter 1 Jump to: Chapter 3 →