3 John 1

Chin SCB2 (Syin Chin Bible)

Jump to:

1Pawlpi Upa keima in — Ka it takpi ka lawm Gaius tungah lai kong thaak hi.

2Ka it ka lawmpa awng, thaa sungah thahat ci in kong heak bangma — na theampo ah maapai daupai in na ciidam natu thu ka ngen hi.

3Thumaan thutak sungah a nungta tawntung na hi bangma — Tapidaw suapui pawlkhat hong theng a, nang sia thumaan thutak sungah takkha hi ci in hong son ciang ka lungdam mama hi.

4Ka tate thumaan thutak sungah a nuntak ka zaak sia sangin hong lungdamsak zaw thei a dang bangma a om bua hi.

5Ka it ka lawmpa awng, na Tapidaw puite khualmi ahi laitak ngawngawn zong amate a tu nasepna ah thumaan in citak ni hi.

6Amate na itna thu teng hi sung pawlpi ah hong ko uh hi. Amate khualhawna sungah Pathian lungkim zia taw a paitan thei natu in na hu in.

7Banghang ziam cile amate sia Christ ii na seamin khual a haw uh ciang, thu um ngawlte tung pan huna bangma saang ngawl uh hi.

8Tua ahikom ei Tapidawte in hi mihingte ii thumaan thutak a tu a sepna sungah a seppui ih hi thei natu in ih hu tu hi.

9Pawlpi tungah laithak tomno khat ka at hi; ahihang amate ih lampui a suak nuam Diotrephes in kei ii ci bang sia hong thupi sim bua hi.

10Tua ahikom kong pai ciangin ama ngamtatna theampo: ko thu a cizathuai a hong sonte le a leilotna teng ka pholaak tu hi! Ahihang tua teng bek hi ngawl lai hi; Tapidaw suapuite hong pai ciangin saang nuam ngawlin, tuabang a saang nuamte ngawngawn tho in, biakinn pan hawlkeak tu hanciam lai hi!

11Ka it ka lawmpa awng, a pha ngawlte zui heak vun a, a phate zui tavun. Thupha vawt peuma Pathian neisa hi a; thusia vawt peuma in Pathian a mu bua hi.

12Demetrius sia ngual theampo in phat son hi; thumaan thutak mama in ama phat son hi. Tuaciang ko zongh in tetti ka pang thua uh a, thumaan son ka hi uh sia na he uh hi.

13Kong son nop tam mama om ahihang laikung laite taw kong at nuam bua hi.

14No taw kimu pal tu in lametna ka nei a, tua hun ciangin maitang kisi in ih son tu hi.

15Thinnopna nga tavun. Na ngualtamhte theampo in nuksetna kam hong thaak hi. Ko ii lawm teng zongh maitang kisi in na nukset sak vun.

Jump to: