Amos 9

Chin SCB2 (Syin Chin Bible)

← Chapter 8 Jump to:

1Biaknatau hui ah Topa a din ka mu hi. Ama in thupia a: “Biakinn bangkua tung buppi a ngawk natu in a khuam dawnte nasia takin saat vun. Tuate taltansak vun a, mite lu tungah taaksak vun. A taanglai mite ngal sungah ka thatlum tu hi. Kuama puapial ngawl tu a; khat zongh suakta ngawl tu hi.

2Mithi khua dong lam a vawtsuk hial zong, amate ka man tu hi. Vantung keak ah a kaato zong ka kaisuk tu hi.

3Carmel mualdawn ah a buu hial uh zong amate ka zong tu a, ka man tu hi. Kei kung pan tuipi taw ah a buu hial uh zong tuipi nganhingpui in ka petsak tu hi.

4A ngalte in manin luangtasak kale amate a thalup natu thu ka pia tu hi. Amate ka suksiat tu le ka hu ngawl tu sia khensat zo khi hi,” ci hi.

5Vaanglianpipa Topa Vaanglianbelpa in leitung tham a, leitung liing hi; tua munah a teang theampo khuangai uh hi. Leitung buppi Nile ngun bangin khang tuak, kiam tuak hi.

6Topa in vantungte ah a inn sa a, leitung ii tungah van ii khuvum koi hi. Ama in tuipi tuite samin leitung ah buak hi. Ama min in Topa ahi hi!

7Topa in, “Israel mite awng, note kong ngaisut bangza ma in Ethiopia mite ka ngaisun hi. Note Egypt pan kong paipui bangma in, Philistine te Crete pan, Syria te Kir pan ka paipui hi.

8Keima, Vaanglianpipa Topa in, hi a maw a khial Israel kumpi ngam ka encik nginge a, lei mai panin ka susia tu hi. Ahihang Jacob suan le paalte theampo ka susia buatu hi.

9“Keima in thu ka pia tu a, ciang sungah an a kisak bangin Israel mite ka lok tu hi. A mannung ngawl theampo ka hep natu in minam tuatuamte sung pan amate ka lok tu hi.

10‘Pathian in eite kungah natna satna hong naisak bua in teh a ci theampo — ka mite sung a mawneite ngal sungah kithatlum tu hi,” ci hi.

11Topa in, “Inn zaancip sa khat taw a kibang David kumpi ngam ka puuaphat kik tu ni khat hong theng tu hi. A luphung pangte pua kikin ka phasak kik tu hi. Tuasia ka sa kik tu a, nidang tawngh lai bang ka hisak kik tu hi.

12Tuabangin Israel mite in Edom ngam sungah a om lai sun teng le keima ngam ahi ngei theampo zothal tu hi,” ci a, Topa in hi thu a piangsak tu hi.

13Topa in, “Lo ante kila man ngawl liangin a khan tu hun, sapitngate sapittui in kivawt man ngawl liangin a khan tu hun le a tun tu nite hong theng tu hi. Mualpite tung pan sapittui thum taak vakeu tu a, mualnote ah sapittui luang tu hi.

14Ka mite a ngam a lei ah ka paipui kik tu hi. A khuapi zaancip sate, sa kikin, tua munah amate teang tu uh hi; Amate in sapithuan vawtin sapittui ne tu uh hi. Amate in huan vawt tu a, a ciinte ne tu uh hi.

15Ka mite ka piaksa ngam sungah ka teangsak tu hi, tuaciang amate kila keak kik ngawl tu hi,” ci hi. Topa na Pathian pau zo hi.

← Chapter 8 Jump to: