bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Chin
/
Chin SCB2 (Syin Chin Bible)
/
Genesis 26
Genesis 26
Chin SCB2 (Syin Chin Bible)
← Chapter 25
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 41
Chapter 42
Chapter 43
Chapter 44
Chapter 45
Chapter 46
Chapter 47
Chapter 48
Chapter 49
Chapter 50
Chapter 27 →
1
Abraham hun lai in kialpi masa a tun bek dom ngawlin tua ngam sungah kialpi dangkhat tung hi. Philistine kumpi Abimelech kung Gerar ah Isaac pai hi.
2
Isaac kungah Topa kilangh a, “Egypt ah pai heak in; om a kong sonna mun hi ngam sungah om po in.
3
Hi lai ah teang in, nang taw kong omkhawm tu a, thupha kong pia tu hi. Nang le na suan na paalte tungah hi ngam theampo kong pia tu hi. Na pa Abraham tungah ka kamciam ka kholet tu hi.
4
Na suan na paalte van ah aksi za in, ka tamsak tu a, amate tungah hi ngam theampo ka pia tu hi. Na suan na paalte thupha ka piak bangin leitung minam theampo in thupha ka piak natu kei tungah hong ngen tu uh hi.
5
Abraham in ka thu ni a, ka thukhamte le ka thupiakte theampo kholet ahikom, nangma thupha kong pia tu hi,” ci hi.
6
Tua ahiciang Isaac sia Gerar ah teang hi.
7
Tua munah om mite in a zi taw kisai thu a dok ciang, ka suapuinu hi, ci hi. Ama in ka zi ci ngam ngawl hi, banghang ziam cile Rebecca sia a mealpha mama a, tua mite in Rebecca a nga nop manin, ama a thalup tu lau hi.
8
Tualai ah Isaac tawmvei sung a om zawkciang Abimelech kumpipa in a khelki pan khua a etsuk le, Isaac le Rebecca a kino laitak mu hi.
9
Abimelech in Isaac samsak a, “Rebecca sia na zi hi! Banghangin ka suapuinu hi ci ni ziam?” ci hi. Ama in, “Ama ka zi hi ci leng kei hong kithatlum tu ci in ka ngaisun hi,” ci in zo hi.
10
Abimelech in, “Ko tungah banghang hi bang hong vawt ni ziam? Ka mite khat in olno takin na zi luppui thong le ko mawna sia nangma hang ahi hi,” ci hi.
11
Abimelech in mihingte theampo kidop natu thupia a: “Hisia pa ahizong, a zi ahizong a vawtsia peuma, kithatlum tu hi,” ci hi.
12
Isaac in tua leitang ah thaicii poai a, tua kum in a thaicii poai za sangin a za zakhat in an a tamzaw la hi, banghang ziam cile Topa in ama thupha pia hi.
13
Ama nuamsa paisuak a, mihau mama khat suak hi.
14
Banghang ziam cile ama in tuuhon, khuihon le naseam tam mama nei ahikom Philistine te in ama eang uh hi.
15
Tua ahikom a pa Abraham nuntak lai a, a naseamte ii a tawsa tuikhuk theampo Philistine te in lei huk siat hi.
16
Tuasia zawkciang Abimelech in Isaac tungah, “Ko ngam pan tai vun. Ko sangin thahat zaw zo nu hi,” ci hi.
17
Tua ahiciang Isaac in tua mun nusia in Gerar Kuam ah ngiaphual saatin, tua munah tawmvei sung om hi.
18
Abraham hun lai a, a taw, Abraham thi zawkciang Philistine te ii lei a huk siat tuikhukte ama in khatvei to kik hi. Tuate a pa ii min a phua sa bangin Isaac in min vaw hi.
19
Isaac ii naseamte in tua kuam ah tuikhuk khat to in tui mu hi.
20
Gerar tuucingte in Isaac tuucingte taw kihau uh a, “Hi tui koma aa hi,” ci uh hi. Tua ahikom Isaac in tua tuikhuk, “Kihauna” ci in min phua hi.
21
Isaac ii naseamte in tuikhuk dangkhat to a, kihauna om kik leleau ahikom ama in, “Kingal vawtna” ci in minphua hi.
22
Tua mun pan kiinin tuikhuk dangkhat to hi. Tua tungtaang ah kikamtamna om ngawl ahikom ama in, “Suatakna” ci in min phuak hi. Ama in, “Tu in hi leitang ah teen thei natu in, Topa in suatakna hong pia zo ahiciang hi munah eite ih nuamsa tu hi,” ci hi.
23
Isaac in tua mun nusia in, Beersheba zuan hi.
24
Tua zanin Topa ama tungah kilangh a, “Keima in na pa Abraham ii Pathian ka hi hi. Lau heak in; nang taw kong omkhawm hi. Nang thupha kong pia tu a, suan le paal tam mama kong pia tu hi, banghang ziam cile ka naseampa Abraham tungah ka kamciamna hang ahi hi,” ci hi.
25
Isaac in biaknatau khat tua munah vawtin Topa bia hi. Tua zawkciang tualai ah a ngiaphual saatin, a naseamte in tuikhuk dang khat to hi.
26
Isaac taw kimu tu in Gerar pan Abimelech sia a thudokpa Ahuzzath le a ngalkaphonpi ukpa Phicol taw pai hi.
27
Tua ahikom Isaac in amate tungah, “Kei taw kisi tu in banghang hong pai nu ziam, tu masia in nong pawl vawt peuma bua a, na ngam pan hong not hi ngawl nu ziam?” ci in dongh hi.
28
Amate in, “Nang taw Topa a om hunlam tu in ka he uh a, eite kilaklaw ah thukimna pha khat nei tu in ka ngaisun uh hi. Ko deina ah,
29
kote in nang kong natsak ngawl bangma in, nang zongh in kote nong natsak ngawl natuin kamciam nong piak natu ahi hi. Na tungah kong thuthiam uh a, nuam takin kong paisak uh hi. Topa in nang thupha hong piak sia tu in kitelthiang hi,” ci in zo hi.
30
Isaac in amate atu in anneakpoai khat vawtsak a, amate anne in tuidawn uh hi.
31
A zing ciang zingtuung in mi simin kiciamna nei a, kipsak uh hi. Isaac in amate mangpha thaakin pawl le lawm khat bangin kikhen uh hi.
32
Tua ni in, Isaac ii naseamte hong pai in amate tawsa, tuikhuk thu ama tungah son hi. Amate in, “Tui ka mu zo uh hi,” ci hi.
33
Ama in tuikhuk sia, “Kiciamna” ci in minphua hi. Tuabangin Beersheba khuapi in a min nga hi.
34
Esau kum sawmli a phak ciang, Hit te numei te nii Beeri ii tanu Judith le Elon ii tanu Basemath teenpui hi.
35
Amate in Isaac le Rebecca nuntak sung in thinngim pia uh hi.
← Chapter 25
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 41
Chapter 42
Chapter 43
Chapter 44
Chapter 45
Chapter 46
Chapter 47
Chapter 48
Chapter 49
Chapter 50
Chapter 27 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40
41
42
43
44
45
46
47
48
49
50