Jeremiah 22

Chin SCB2 (Syin Chin Bible)

← Chapter 21 Jump to: Chapter 23 →

1Topa in David suan, Judah kumpipa inn ah va pai ta'n a, tua munah a kumpipa, a khutnuai a uliante le Jerusalem mite kungah Topa thusonte ngai tu in son ta'n, ci in kei hong sawl hi:

3Topa in, “Keima, Topa in thumaan le thutang na vawt vun ci in no thu kong pia hi. Theamna a thuak pa sia a theam pa ii khut sung panin dal vun. Ngamdangmite, tangate ahibuale meingongte vawtsia heak vun; hi a thiangtho munah a mawbaang ngawl mihingte that heak vun.

4Kong thupiak sa bangin na seam takpi uh le, David ii suan le paalte sia kumpi suak tawntung tu uh hi. Tuaciang amate sia, a khutnuai a uliante le a mite taw in, siphu ngalleang le siphu tungah to in hi kumpi inn kongpite pan kaantan tawntung tu uh hi.

5Ahihang kong thu piakte nong ni bua uh le, hi kumpi inn sia siacip tu hi ci in ka kiciam hi. Keima, Topa in ka ci zo hi.

6“Kei atu in, Judah ii kumpi inn sia Gilead ngam le Lebanon Mualte bangin hoi hi; ahihang kuama ii ten ngawlna a ngamkhing mun kolh khat ka suaksak tu hi.

7Tua kumpi inn a susia tu in mihingte ka puak tu hi. Amate in a hei uh tek hong keng tu uh a, cedar thing khuam phate phukin meikhuk sung denna in nei tu uh hi.

8“Tua zawkciang ngamdangmite tam mama in kaantan tu uh a, tuaciang keima, Topa in banghangin hi khuapi lian tungah hi bangin vawt ziam ci in khat le khat kidongh tu uh hi.

9Tuasia ciang na Pathian, keima taw na kiciamna uh nusia in pathian dangte bia in a na na sepsak uh hang hi, ci in amate in zo tu uh hi,” ci hi.

10Judah mite awng, Josiah kumpipa kaa heak vun; ama ii a thi hangin khuangai in kap heak vun. Ahihang a tapa Joahaz atu in nasia takin kap vun; ama sia hong heak kik nawn ngawl tu le a pianna ngam mu kik ngei nawn ngawl tu in amate in paipui uh hi.

11Judah kumpipa ahi a pa ii za a lai Josiah ii tapa Joahaz taw kisai in Topa in hi bangin ci hi, “Ama in hi mun panin pai zo a, hong heak kik nawn ngawl tu hi.

12Ama sia a paipuina ngam ah thi tu a, hi ngam mu kik ngei nawn ngawl tu hi.”

13Thumaan ngawlna taw a inn a sa pa, a inn a peam pa; a ngammite a thawthong in a na seamsak a, a thaman a pia ngawl pa in siatna thuak ahi hi.

14“Inndawl tungnung ah a inndoi zaite taw inn khat keima ma in ka sa tu hi,” a ci pa sia siatna thuak ahi hi. Tua hi a, ama in a inn sungah khelkite thua a, a zepna in cedar thingpheak siikli neite belh thua in a san in zut hi.

15Midangte inn sangin a phazaw cedar thing taw innte na sak ciang in kumpi phazaw khat hong suaksak ziam? Na pa sia a khan zo in nuamsa hi. Ama sia a tawntung maan a pha hi, a sepna theampo ah a maapai hi.

16Ama in mizawngte tungah a pha in thukhen a, tuaciang ama atu in na theampo a pha suak hi. Tuabang ahi theina in Topa a heak hang ahi hi.

17Ahihang nang sia nangma kaangsung tu bek na mu thei hi; a mawbaang ngawlte na thatlum a na mite nasia takin na zawthawk vawt hi. Topa in ci zo hi.

18Tua ahikom, Topa in Judah kumpipa, Josiah ii tapa Jehoiakim thu taw kisai in hi bangin ci hi, “Ama thi hu in kuama khuangai ngawl tu hi, ahibuale ‘Bangza lauhuai ziam, ka lawm awng! Bangza lauhuai ziam!’ ci ngawl tu hi. ‘Ka topa! ka kumpipa awng!’ ci in kuama thitui taakin kap ngawl tu hi.

19Laa khat a thi ciang a kiphum bangin ama luang kikaikeak in Jerusalem ii kongpite pua sangah kivawk tu hi.”

20Jerusalem mihingte awng, Lebanon ngam ah pai vun a au vun, Bashan ngam ah pai vun a kap vun; Moab mualtung panin au vun banghang ziam cile na pawlpuite theampo kizo siat zo hi.

21Na nopsak uh laitakin Topa in no hong paupui hi, ahihang na ngai bua uh hi. Na nuntak uh sung theampo tuabang vive hi nu hi; Topa thu na ni ngei bua uh hi.

22Na lampuite uh sia vui in seamkeak tu a, na pawlpuite uh sia ngalmat thongtaakte suak in, na khuapi sia a min kidaisak in kimaizumsak tu hi, banghang ziam cile a sia teng na vawt uh hang ahi hi.

23Lebanon pan a na laak uh cedar thingtaam sungah thin muangin om nu hi; ahihang numei khat nau a tut ciangin na a sak bangin natna ngimna na thuak uh ciang bangzata in hesuakhuai tu nu ziam?

24Topa in Judah kumpi Jehoiakim ii tapa Jehoiachin kumpipa tungah, “A nungta Pathian ka hi bangma in, nang sia ka ziatsang khut tungah min tupna khutzungbu na hi hial zongh in, kong suut keak tu a,

25na kiitak mihingte le nang hong thatlum nuam mihingte tungah kong aap tu hi. Babylon kumpipa Nebuchadnezzar le a ngalkapte tungah kong aap tu hi.

26Saltaang tu in nangma le na nu kong not tu hi. Na pianna uh ahi ngawlna ngam ah na pai tu uh a, tua munah na thi khawm tu uh hi.

27Hi ngam sia na mu kik nuam tu uh hi, ahihang na heak kik ngei nawn buatu uh hi,” ci hi.

28Keima in, “Jehoiachin kumpipa sia kuama ii a dei ngawl, a kivawksa thambeal tamh khat bang suak zo ziam? Tua hu in ama le a tate sia amate heak ngeingawlna ngam ah saltaang tu in kipaipui ahi ziam?” ka ci hi.

29Aw ka ngam, ka ngam, ka ngam ka lei awng! Topa sonna sia ngai vun:

30“Hisia pa sia ma a tun ngeingawl tu le, a tate a khuaisua tu in a kiningkhiin sa hi. Ama in David ii za laihte bangin, Judah ngam a uk tu in suan le paal nei ngawl tu hi. Keima Topa in ka son zo hi,” ci hi.

← Chapter 21 Jump to: Chapter 23 →