Jonah 3

Chin SCB2 (Syin Chin Bible)

← Chapter 2 Jump to: Chapter 4 →

1Topa in Jonah khatvei paupui kik hi.

2Ama in, “Tua khuapi lian Nineveh ah va pai ta'n a, a mite tungah kong thupiak sa teng thangsak ta'n,” ci hi.

3Tua ahikom Jonah in Topa thu ni in Nineveh khua ah pai a, tua khuapi lian mama ahiciang a kaantan natu in ni thum hai hi.

4Jonah sia khuapi sungah ni khat tangciing a pai zawkciang ama in, “Ni sawmli sungsang Nineveh khua kisiatham tu hi!” ci in thangsak hi.

5Nineveh khua mite in Pathian ii thupiak um uh hi. Tua ahiciang amate in mi theampo a lianbel pan a nobel dong kisiik kikna lakna in, antan tu le khau-ip puan silh tu in khensat uh hi.

6Nineveh kumpipa in hi thu a zaak ciang, a kumpi tokhum pan dingto in, a puantual suut a, khau-ip puan silhin vuttun sungah tosuk hi.

7Ama in Nineveh khua mite tungah thu thansakna khat puak a: “Hi thu in kumpipa le a uliante tung pan thu piak khat ahi hi: kuama in bangma ne ngawl tu hi; mi theampo, khuite le tuute an, ahibuale a tuidawn tu kikhaam hi.

8Mi theampo le nganhing theampo in khau-ip puan silh tu hi. Mi simin Pathian tungah nasia takin thungen tu a, ngitlo ngamtatna le a siathuai a tuk a diannate nusia tu hi.

9Pathian a thin kheal kik tha tu hi; a thin uukna thaisak tha tu a ih thi buatu hi!” ci hi.

10Pathian in amate vawt teng mu a; a ngitlo ngamtatna nusia zo hi ci in mu hi. Tua ahikom ama in a thin khealin daan pia tu a ci bangin pia ngawl hi.

← Chapter 2 Jump to: Chapter 4 →