bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Chin
/
Chin SCB2 (Syin Chin Bible)
/
Matthew 18
Matthew 18
Chin SCB2 (Syin Chin Bible)
← Chapter 17
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 19 →
1
Tua hun laitakin a nungzuite sia Jesus kungah hong pai a, “Vantung ngam sungah akua lianbel ziam?” ci in dongh uh hi.
2
Tua ahikom Jesus in patang khat samin, amate mai ah dingsak a,
3
“A tatakin kong ci ciang kikheal in patangte bang na suak bua uh le Vantung ngam sungah na tum thei buatu uh hi.
4
Vantung ngam sungah a lianbel sia in, ama le ama kiniamkhiak a, hi patang bang ahite ahi hi.
5
Tuaciangin hi bang patang khat kei min taw a saangte in, keima hong saang ahi hi.
6
“Mihing khat po in patang khat ii kei hong upna a lalsak le, tua pa ngawng ah an ngoaina suangpheak kikhii in tuipi thukna sungah kikhiasuk le phazaw hi.
7
Mihingte upna a lalsak thei nate om ahikom, hi leitung atu bangza in kiitakhuai ziam? Tuabangte sia hong piang tawntung tu hi, ahihang tuabang a piangsakte atu in, bangza in lauhuai ziam?
8
“Na khut ahibuale na peang in, na upna hong taansak le saattan in vawk in! Tawntung meikuang sungah khutcing peangcing hong kibum sangin, nuntakna sungah khutsamh peangsamh in tum lete phazaw hi.
9
Tuaciang mittang khat in na upna hong taansak le, khelkeak in vawk in! Hell meikuang sungah mittangte ngeal taw hong kibumsuk sangin mittang langkhat sel in, nuntakna sungah tum lete nang atu in, phazaw hi.
10
“Hi patang khat po na zawnsak ngawl natu in, na kidawm vun. Amate ii vantunglalangte sia ka Pa omna munah om tek nginge hi, ci in hong son ka hi hi.
11
Banghang ziam cile Mihing Tapa sia a bote hun tu in hong pai ahi hi.
12
“Mihing khat in tuu zakhat a nei sung pan, tuu khat a bosua sia in bang law tu in na um uh ziam? Ama in a om lai tuu sawmkua le kua mual tungah taasakin nusia a, a bosua tuu sia zong tu in kuan hi.
13
Ama in tua tuu a bosua sia a mu ciangin, a bo ngawl sawmkua le kua tungah a lungdamna sangin, hi a bosua tuu khat tungtaang ah lungdam zaw tu hi.
14
Tuabang ma in vantung a na Pa in, hi patangte khat po a bo tu sia a oai bua hi.
15
“Na suapuipa in nang tungah hong khial le, va pai ta'n a, ama khialna teng lak ta'n. Noma tuamin kilemtua tavun. Na thu hong ni a ahile na suapuipa na nga kik zo hi.
16
Ahihang hong ni nuam buale, ngualdang khat le nii mai ah son pui in, tua hile laithiangtho ci bangin, ‘na mawsakna teng sia mihing nii le a tamzaw in tetti in hong pang tu hi.’
17
Tuaciangin amate zongh in, a sonpui thei bua lai le, pawlpi bup mai ah a vekpi in son siat tavun. Pawlpi thu zongh a ni nuam bua ahile, ama sia doai biate khat bang ahizong, shiadongpa bang ahizong ngaisun tavun.
18
“Tua ahikom na vekpi tungah hong ci khi hi: leitung ah na kha uhte vantung zongh ah kikhak tu hi; leitung ah na hon uhte vantung zongh ah kihon tu hi.
19
“Thudang kong son lai natu panin, mihing nii in leitung ah na khat pawpo tungtaang ah thukim in thu a ngen uh le, vantung ka Pa in hong vawtsak tu hi.
20
Banghang ziam cile ka min taw nii le thum kikhopna sungah amate taw ka omkhawm hi,” ci hi.
21
Tuaciang Peter in Jesus kungah pai a, “Topa, ka suapuipa in ka tungah hong khial kikik le bang tanvei maisak tu khi ziam? Salivei dong ziam?” ci hi.
22
“Salivei dong hi ngawlin, sali mun sawmsalivei dong, maisak in,” Jesus in ci hi.
23
“Banghang ziam cile Vantung ngam sia hi bang ahi hi. Khatvei lai in kumpipa khat in a naseamte sazian sit tu in khensat hi.
24
Hi bangin vawt tu a kipat ciangin, amate sung panin, talen awn tam mama leiba nei khat hong kipaipui hi.
25
Naseampa in a liau tu sum nei ngawl hi. Tua ahikom Kumpipa in, tua pa ii zi taw a tate taw a neisa theampo taw sila a zuak tu in thupia hi. A leiba kilo natu ahi hi.
26
Kumpipa mai ah naseampa khupdin hi. ‘Thinsau takin hong ngak lai ta'n, kong bat theampo hong lo kik tu khi zam,’ ci in ngen hi.
27
Kumpipa zongh in ama sia khuangaihuai sa in, a leiba teng maisakin ciasak hi.
28
“Tuaciangin tua naseampa pusuak in, ama tungah sum tawm a ba naseam dang khat taw kisi uh hi. Tua pa sia manin a tawlsaan a, ‘Sum nong bat teng hong lo ta'n,’ ci hi.
29
A naseppuipa in a mai ah bokin ‘Thinsau takin hong ngak lai ta'n; sum kong bat teng hong lo siat tu khi zam,’ ci hi.
30
Ahizong ama in za nuam ngawlin, a leiba a lo siat dong thong sungah khum hi.
31
Naseam dangte in, thupiang teng a mu ciangin, a thinnuam ngawlin, kumpipa kungah pai in thupiang theampo son uh hi.
32
Tua ahikom ama in naseampa sam a, ‘Nang a mannung ngawl silapa awng, ka tungah nong bat theampo hong maisak ta'n ci in nong nget hu in, hong maisak siat khi hi.
33
Nang kong hesuak bangin, na naseppuipa na hesuak tu kilawm hi ngawl ziam?’ ci hi.
34
Kumpipa thin uuk mama a, naseampa in ama tungah a bat theampo a lo siat dong thongtaak tu in puak hi,” ci hi.
35
Jesus in a thukhupna ah, “Na thin tak taw na suapuipa na maisak buale vantung ah a om ka Pa in mihing sim tungah tuabangin hong vawt tu hi,” ci hi.
← Chapter 17
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 19 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28