Numbers 24

Chin SCB2 (Syin Chin Bible)

← Chapter 23 Jump to: Chapter 25 →

1Israel mite thupha pia tu in Topa ii ama a dei hunlam tu in Balaam in he ahikom, nidang a vawt ngei bangin aisaan tu in pai nawn ngawl hi. Ama sennealngam sang ngaa a,

2Israel mite anam anam in ngiaphual a saat sia mu hi. Pathian thaa in ama uk a,

3ama in hi kamsaanna pualaak hi: “Beor tapa Balaam ii thupuak, Thiang takin a mu theipa ii kammalte,

4Pathian son bang a za theipa ahi hi. Mit hak kiukiau in mangmuna khat ka mu a, Vaanglianbelpa Pathian tung pan mukholna hi.

5Israel Puanbukte et hoi a,

6A ngual sau in a kiciing palm kungte, ahibuale ngunhui ah huante taw kibang a, Topa ii a ciin aloe kungte ahibuale tui hui a po cedar kungte taw kibang hi.

7Amate in nguatui cing takin nga tu uh a, nguatui zen lote ah a thaiciite ciing tu hi. A kumpipa sia Agag kumpipa sangin lian zaw tu a, Ama ukna ngam sia zaikeak tu hi.

8Pathian in amate Egypt ngam pan pusua pui a; Ama in ngam khuital khat bangin amate ngaldo pui hi. Amate in a ngalte lopvalh a, A ngute khimtham in a thaltangte thiaktan hi.

9Tua minam sia a thahat tawpi khat taw kibang a; A mut laitakin kuama in phong ngam ngawl hi. Israel thupha a pia pawpo thupha kipia tu a, Israel a haamsiat pawpo kihaamsiat tu hi.”

10Balak thin uukin a khut tumin Balaam tungah, “Ka ngalte haamsiat tu in kong sam a, ahizong tu in amate na haamsiat sangin thumvei tak thupha na piazaw pum hi.

11Tu in, inn ah cia in! Thaman piak tu in kong kamciam a, ahizong na thaman nga tu sia Topa in hong khak hi,” ci hi.

12Balaam in, “Ka kungah kamtai nong paisakte tungah ka sonsa bangin,

13na kumpi inn sungah a om ngunn le khamh theampo nong pia zong, Topa thupiakna nialin keima thu taw bangma ka seam buatu hi. Topa in son a hong sawl teng bek ka son tu hi,” ci in zo hi.

14Balaam in Balak tungah, “Tu in ka mipuite kungah ka cia kik tu a, ahizong ka cia ma in, mailam sangah Israel mite ii na mite tungah a vawt tu teng na kidop natu in kong sonkhol tu hi.” ci hi.

15Tuaciang ama in hi kamsaanna pualaak hi: “Beor tapa Balaam ii thupuak; Thiang takin a mu thei pa ii kammalte,

16Pathian son bang a za thei pa in A Saang Belna pan hong pai thuheakna nga hi. Vaanglianbelpa Pathian tung pan mangmuna khat mit hak kiukiau in ka mu hi.

17Maisang hun tu ka en a, Israel minam ka mu hi. Tua minam sungah, Aksi taang taw kibang kumpi khat piang tu hi. Thazau bangin Israel sungah ama hong khang tu hi. Ama in Moab lampuite saat tu a, Seth mite theampo saatvawk tu hi.

18Ama in Edom ngam ah a ngalte zo tu a, A ngalte ngam le lei ama ii neisa sua tu a, Israel sia a ngualzo hi tawntung tu hi.

19Israel minam in amate tuanhcil tu a, A suakta khakbel teng mon tu hi,” ci hi.

20Tua zawkciang Balaam ii mukholna sungah Amalek te mu a, hi bangin kamsaanna pualaak hi: “Amalek sia minam theampo sung pan a thahatbel hi a, ahizong a khakbel ciang a tawntung maaimang tu hi.”

21Ama mukholna sungah Balaam in Ken te mu a, hi kamsaanna pualaak hi: “Na teenna mun muanhuai a, Suangliang saang tungah a om vacimbu bangin bit hi,

22Ahihang Assyria in note salin hong mat ciang, no, Ken te hong kilalcipsak tu hi.”

23Balaam in hi bang kamsaanna pualaak hi: “Sak sangah a kikhawm hi mihingte a kuate ziam?

24Cyprus pan ngalsim tute teambaw taw hong pai tu a; Amate in Assyria le Eber zo tu hi, Ahizong amate zongh a tawntungin lalcip tu uh hi.”

25Tua zawkciang Balaam kithoai in inn ah ciakik a, Balak sia a pai natu ah paisuak hi.

← Chapter 23 Jump to: Chapter 25 →