Psalms 78

Chin SCB2 (Syin Chin Bible)

← Chapter 77 Jump to: Chapter 79 →

1Ka mite awng, kong hilna hong ngai tavun a, ka pauna hong nadon tavun.

2Ciim kamtepteete kong zangh tu a, hun bosa sung a, a telhak thute,

3ih taanghpupite hong son, ih zaaksa ih heaksa te, kong sonthiang tu hi.

4Hi thute ih tate tungah ih iim buatu hi. Topa ii a vaangletna, a sepna liante le a vawtsa a lamdang nate sia khang kikte tungah ih son tu hi.

5Ama in Israel mite tungah thukhamte pia a, Jacob suan le paalte tungah thupiakte pia hi. Amate ii tate tungah ama ii thukhamte hil tu in ama in ih taanghpupite sawl hi.

6Tua hile khangkikte in tua thute he thei tu a, amate in a tate tungah sonsawn nanak tu uh hi.

7Hi bangin amate in zongh Pathian muang a, ama ii sepna sate mangil ngawlin, ama thupiakte ni tawntung tu uh hi.

8Amate in a langpante le thu ni ngawl, Pathian a upna uh a kho ngawl, ama tungah a thumaan top ngawl a taanghpupite bang ahi buatu uh hi.

9Ephraim mite in thal le thaltang taw kithoai napi ngal kido ni in taikeak uh hi.

10Amate in Pathian taw a thuciamna a len bua uh hi; ama thukham a zui bua uh hi.

11Ama sep sate le, nalamdang lakna a vawt a mu uhte amate in a mangil zo uh hi.

12A taanghpupite ii mu tangin Egypt ngam Zoan zaangleitam ah Pathian in nalamdang laknate vawt hi.

13Ama in tuipi kikhensakin amate kaantansak hi; tuite sia pang bangin dingtosak hi.

14Ama in sun in meeikaai taw, zankhuateakin meikuang taang taw amate lampui hi.

15Ama in senneal ngamsung suangpite khentham in lei thukna pan a piang tui sia amate pia hi.

16Ama in suangpi sung pan lui khat piangsak a, ngun bangin tui luangsak hi.

17Ahihang amate in Pathian tungah khialna vawvawt lai uh a, sennealngam sungah amate in Saangbel Pa a langpan uh hi.

18A duci ante ngetna taw Pathian ze et hamtang uh hi.

19Amate in Pathian langpanin: “Pathian in sennealngam sungah an pia thei tu ziam?

20Ama in suangpi saat in tui luangsak vahawn peu hi; ahihang ama in eite anluum zongh hong pia thei tu ziam? tuaciang ama ii mite sa pia thei tu ziam?” ci uh hi.

21Tua ahikom tuabangin amate pauna a zaak ciang Pathian a thin uuk hi; ama in a mite meikuang taw sim a, amate tungah a thin uukna sia khang seseam hi;

22banghang ziam cile amate in ama sungah upna nei ngawl a, amate hun tu in um ngawl hi.

23Ahihang ama in a tung a om van paupui a, a kongkhate a kihon natu thupia hi;

24Ama in vantung panin amate antang pia a, amate neak tu in manna khiaksuk hi.

25Tuabangin amate in vantunglalangte ii an ne uh a, Pathian in a du zaza pia hi.

26Ama in nisuana sang vui vasak si a, ama ii vaangletna taw thangsang vui hamsak hi;

27tuaciang a mite atu vacimte puaksuk a, vaalbo ah a om senneal za in tam hi;

28ngiaphual saatna laizang a buk kiimkot theampo ah tua vacimte taak hi.

29Tua ahiciang mite an ne in a lungkim uh hi; Pathian in amate a duci teng pia hi.

30Ahihang amate duna sia thai ngawl a, a neneak laitak ma in,

31Pathian sia amate tungah thin uuk a, amate sung pan a hatbel pasalte le Israel khangno sung pan a phabel teng thatlum hi.

32Hi zata hi napi mihingte in mawna vawt lalai uh hi; Ama nalamdang laknate om napi amate in ama a muang bua uh hi.

33Tua ahikom amate ii ni sia husan khat bangin ama in bosak a, a nuntakna sia thakhat thu in lalna taw bosak hi.

34Amate sung pan pawlkhat a thalup sim, a om lai teng in ama ii kung zuan a, kisiikin thin tak taw thungen uh hi.

35Amate in Pathian sia amate a hungpa hi a, amate hu tu in Vaanglianbelpa hong pai ahi hunlam phawk uh hi.

36Ahihang a pauna uhte leilot thu vive hi a, bangma ci takpi thu a om bua hi.

37Ama tungah amate in thumaan ngawl hi; ama taw a thuciamna tungah amate thumaan ngawl hi.

38Ahihang Pathian in ama mite hesuak hi. Amate mawna maisak a, a susia bua hi. Ama in tamvei mama a thin uukna iip in a thinsona vei kenkon hi.

39Amate sia a thi theite ahi lel hunlam, vuiva a, a bo kik paih bang ahi hunlam ama in phawk hi.

40Sennealngam sungah amate in ama bang tanvei langpan in, bang tanvei ama heesak ziam!

41Amate in Pathian ze et kikik uh a, Israel ii a thiangtho Pathian tungah thin natna piangsak hi.

42Amate in ama ii vaangletna lian le a ngalte khut sung pan a suataksak ni mangil uh a,

43Egypt ngam Zoan zaangleitam ah ama ii a nasia mama sepnate le nalamdang a laknate amate in mangil uh hi.

44Ama in ngunte chisan suaksak a, Egypt mite in tui neak tu a nei bua uh hi.

45Ama in tua mihingte sungah ngim pia tu in thote puak a, a leitangte lalsak tu in ulolte paisak hi.

46Ama in amate lo an a ne tu le a lote a lalsak tu in khaumawte puak hi.

47Ama in amate ii sapitkungte ngial taw, a thei kungte vuuk taw thisak hi.

48Ama in a ngante ngial taw, a tuu a keal honte keaktang taw in thatlum hi.

49Thina vantung mite bangin hong pai ama ii thin uukna le thinsona a buaksukna taw ama in nasia takin amate thinngimna pia hi.

50Ama in a thin uukna iip ngawlin amate nuntakna uh khoaikhetsak ngawlin, pul natna taw amate thatlum hi.

51Ama in Egypt ngammite innkuan theampo sung pan a tapaciil teng thatlum hi.

52Tuaciangin ama in tuucingpa bangin a mite lampui in pusuapui a, sennealngam kaantan pui hi.

53Ama in amate ngammuang takin lampui a, amate a lau bua uh hi; ahihang tuipi in a ngalte khulum hi.

54Ama in a zaw sa mualte tung, a thiangthona leitang ah amate paipui hi.

55A mite a mainaw uh ciang tua ngamah a teang mite ama in notkeak hi; tua leitang sia Israel minamte hawmsakin amate ii innte sia a mite pia hi.

56Ahihang amate in Vaanglianbelpa Pathian langpan in, a zia en uh hi. Amate in a thupiakte a zui bua uh hi,

57ahihang amate sia a taanghpupite bangma in, langpan nopna thin le thumaan nop ngawlna thin nei uh a, thaltang koai khat bangma in muanhuai ngawl hi.

58Amate in Pathian he ngawlte biakna munte taw ama thin uuksak uh a, amate ii milimte taw ama thinsosak uh hi.

59Pathian in tuate a mu ciang a thin uuk ahikom, ama mite a nial thiang hi.

60Ama in eite taw hong teenkhopna sa a inn ahi Shiloh a om ama buk sia nusia hi.

61Ama in ama ii vaangletna le minthanna lim ahi Thuciamna Thingkuang sia eima ngalte in mansak hi.

62Ama ii mite tungah ama thin uuk ahikom a ngalte in ama ii mite thatsak hi.

63Tangvalte sia ngal sungah kithatlum a, ngaknute ii a teenpui tu kuama a om bua hi.

64Thiampite ngual ii khutsa taw in thi a, amate ii zi meingongte sia a kaa tu zongh ki oai ngawl hi.

65A khakbel ciangin Topa sia a mutho bangin hong thoto hi; ama in sapittui ii a thot pasal thahat pa bang ahi hi.

66Ama in a ngalte sia a kikhomsuan tu maizumhuai lelna sungah not kik hi.

67Ahihang ama in Joseph suante a nial hi; ama in Ephraim minamte a tealtuam bua hi.

68Tuate taangin ama in Judah minam le a it mama Zion Mual teal zaw hi.

69Ama in vantung a om a inn taw a kibang Biakinn sia tua munah sa hi; A tawntung a kho tu in tuasia leitung taw ma kibangin ama in kipsak hi.

70Ama in a naseampa David teal hi;

71Ama in David sia ngantatna munte ah tuuhon a cinna pan la a, Pathian mihingte ii tuucingpa ahi Israel te ii kumpipa suaksak hi.

72David in ama ii kaang sung tu bek ngaisun ngawlin kipiakna taw amate khoi a, thiamna taw lampui hi.

← Chapter 77 Jump to: Chapter 79 →