1 Timothy 1

Chin TB77 (Tedim Bible)

Jump to: Chapter 2 →

1Eite Honpa Pasian leh i lametna Khazih Zeisu thupiakna tawh Khazih Zeisu sawltak keimah Paul in:

2Upna sungah ka ta taktak ahi Timoti kiangah kong zasak hi. Pa Pasian leh Khazih Zeisu i Topa’ hehpihna thupha, hehpihna leh nopna nangma tungah om ta hen.

3Thu hilhna tuamdang hilh lo ding ci-in ahi zongin, upna hangah a om Pasian ngeina kipsak loin khat leh khat kinialna a bawl thei tanglai thu leh khang ciamtehna mang lo ding ci-in ahi zongin, mi kimkhat na kham nadingin Efesa khua-ah na om nadingin, Makedonia gamah ka pai laitakin ka hong thuum bangin om lai in, kong ci kik hi.

5Hih thupiakna’ deihna bulpi in, lungsim siangtho, lungsim kisuan’na om lohna leh thuman upna tawh a kipawl itna ahi hi.

6Tua gamtatnate mi kimkhatte in zui tawntung loin, a mawkna kampauna lamah a pialkhia uh hi.

7Tuate in Thukham hilhna a sep nop uh hangin amau kampau ahi zongin, bang ci thu lamah amaute in a kiptakin ahilh uh ahi zongin a thei kei uh hi.

8Thukham pen midik mi ading kikoih hi lo hi: midik lo mi, ukna thu ngai lo mi, Pasian bia lo leh mawhnei mi, a siangtho lo leh pausia a gen thei mi, a nu leh a pa a bawlsia thei mi, midang a that mi, numei tawh a khial mi, pasal leh pasal tawh a mawh mi, mi a gu thei mi, zuauthu a gen thei mi, hi lopi-a kiciam thei mite-a kipan thuhilh pha tawh a kilem lo khempeuhte adingin a kikoih hi ci-in thei-in tua thu a pha-a zang mi ading Thukham in phattuamna hong pia thei hi ci-in eite in i thei hi.

11Tua bang i cih ciangin thupha a ngah a vanglian Pasian in kei hong kepsak Lungdamna Thu tawh a kituak hi.

12Tua thu kei hong keemsak ahih ciangin tha hong dimsak i Topa Khazih Zeisu’ hehpihna ka phat hi.

13Bang hang hiam cih leh, keimah in Pasian a kosia ngei mi, a bawlsia ngei mi, a khialtat ngei mi ka hih hangin thudik mi ci-in Topa in hong ciamteh a, thuhilh za-ah hong koih hi. Bang hang hiam cih leh, upna nei lo, thu thei loin ka bawlna hang hi.

14Eite Topa’ hehpihna thupha in zong Khazih Zeisu sungah a om upna leh itna tawh, a kigen khin zo loin tamin a om hi.

15Zeisu Khazih in mawhneite gum dingin leitungah hong paisuk hi, a cihna thu in thuman thutak hi a, a vekpi-in san’ ding a kilawm hi. Tua mawhnei mite lakah keimah in a mawhnei bel mi ka hi hi.

16Ahih hangin nuntak tawntungna ngah ding, a nung ciangin a um ding mite’ zuih ding lim ka hih nadingin mawhna a lianbel a nei keima tungah, Khazih in ama thuakzawhna lungsim khempeuh hong lah nadingin kei hong hehpih zo hi.

17A om tawntung Kumpipa ahi, a si thei lo, mit in a muh theih loh, khat bek a om Pasian in a tawntungin pahtawina leh minthan’na ngah ta hen. Amen.

18Ka ta Timoti aw, nangmah hong ngaihsunin a kigensa thu genkholhna kam bangin nang in upna leh theihna lungsim siangtho suangin, a pha galdona na do nadingin, a tungah ka hong gensa thupiakna kikoihna thu, nang ka hong pia hi.

19Mi kimkhat in tua upna a nial uh a, amau upna teembaw a siasak uh hi.

20Tua mite lakah Himenaius leh Alekzander a om uh hi. Tuate in thu gensiatna kam a gen nawn loh nading uh a kisin nadingun Satan ka keemsak zo hi.

Jump to: Chapter 2 →