Numbers 8

Chin TB77 (Tedim Bible)

← Chapter 7 Jump to: Chapter 9 →

1Tu-in Topa in Moses kiangah,

2“Aaron tungah hih bangin gen in. Meivakte na koih ciangin, meivak sagihte in meivakkhuam mai teng a taan dingin koih-in, ci-in gen in,” a ci hi.

3Aaron in tua mah bangin hih hi; Topa in Moses a thupiak bangin, meivakkhuam mai teng a taan’ dingin meivakte a koih hi.

4Hih in meivakkhuam a kibawlna zia hi a, kham a kiseek ahi hi; a bul akipan a pakte dongin a kiseek ahi hi; Topa in Moses tungah a lahsa lim tawh kizui-in amah in meivakkhuam bawl hi.

5Topa in Moses kiangah,

6“Israel mite panin Levi mite la khia in la, amaute siangsak in.

7Amaute sian’sak nadingin hih bangin na hih ding hi: sian’suahna tui amaute tungah theh in la, a pumpi khempeuh mulkiatna tawh amau mah kiat sak in la, a puante uh sawpin amau mah na kisiang tawm sak ding hi.

8Tua ciangin bawngtalno khat leh sathau leh annel a kibawl an tawh biakna amaute na la sak ding a, nangmah in khialhna hanga biak nadingin bawngtalno adang khat na la ding hi.

9Kikhopna buk mai-ah Levi mite paipihin, Israel mihon buppi na khawm ding hi.

10Topa mai-ah Levi mite na paipih ciangin, Israel mite in Levi mite tungah a khut uh nga ding uh a,

11amaute in Topa ’ na a sep theih nadingun Aaron in Israel mite sung panin Levi mite Topa mai-ah veii-a biakna-in a pia ding hi.

12Tua ciangin Levi mite in bawngtalte lu tungah a khut uh nga ding uh hi; Levi mite’ ading kilemna bawlsakna dingin khialhna hanga biakna-in khat, meihal biakna-in a khat, Topa tungah na pia ding hi.

13Aaron leh a tapate’ mai-ah Levi mite na koih ding a, Topa tungah amaute veii-a biakna-in na pia ding hi.

14“Tua ciangin Israel mite lak panin Levi mite na khenkhia ding a Levi mite in keima’ aa hi ding hi.

15Amaute siangsakin veii-a biakna-in na piak khit ciangin kikhopna bukah nasem dingin Levi mite pai ding uh hi.

16Bang hang hiam cih leh Israel mite’ lak panin kei tungah amaute hong kipia khin hi; naubu a hong, Israel mite tacil khempeuh tangdingin keima adingin amaute ka la khin hi.

17Bang hang hiam cih leh Israel mite lakah tacil khempeuh, mihing hita leh ganhing hita leh keima’ aa ahi hi; Izipt gam sungah tacil khempeuh ka thah ni-in keima adingin amaute ka tuam koih a,

18Israel mite lak panin tacil khempeuh tangdingin Levi mite ka la khin hi.

19Kikhopna bukah Israel mite adingin na a sem ding leh, biakinn nai-ah Israel mite a paikhak ciangin Israel mite lakah gimna a tun’ loh nadingin Israel mite’ adingin kilemna a bawl dingin Israel mite’ lak panin Aaron leh a tapate tungah letsong-in Levi mite ka pia khin hi,” a ci hi.

20Tua bangin Moses leh Aaron leh Israel mi honpite khempeuh in Levi mite tungah hih uh hi; Topa in Levi mite tawh kisai-in Moses tungah a thupiak khempeuh tawh kizui-in Israel mite in amaute tungah hih uh hi.

21Levi mite in khialhna panin amaute kisiangthosak tawm uh a, a puante uh sawp uh hi; Aaron in veii-a biakna-in Topa ’ mai-ah amaute pia a, amaute sian’sak nadingin Aaron in amau’ ading kilemna bawlsak hi.

22Tua khit ciangin Aaron leh a tapate omna kikhopna buk sungah nasem dingin Levi mite pai uh hi; Topa in Levi mite tawh kisai-in Moses a thupiak bangin amaute in Levi mite tungah a hih uh hi.

23Topa in Moses kiangah,

24“Hih in Levi mite tawh a kisai thu ahi hi; kum sawmnih leh kumnga pan a tungsiah a phate in kikhopna buk nasepna sungah na a sem dingin pai ding uh hi;

25kum sawmnga a phak uh cianga kipan nasepna panin amau kihemkhia-in na sem nawn lo ding uh hi;

26ahih hangin kikhopna buk sungah a sanggamte huh ding uh a, amaute in a na taktak sem lo ding uh hi. Tua bangin Levi mite’ nasep ding na seh ding hi,” a ci hi.

← Chapter 7 Jump to: Chapter 9 →