2 Chronicles 35

Chin TBR17 (Tedim Bible Revision 2017)

← Chapter 34 Jump to: Chapter 36 →

1Josiah in Topa adingin Jerusalem ah Paisan Pawi bawl hi. Amaute in a kha masa a ni sawm le li ni-in Paisan Pawi tuuno go uh hi.

2Amah in siampite amauʼ panmunte ah seh a, Topaʼ biakinn sunga nasepna ah amaute hanthawn hi.

3Tua ciangin amah in Israel khempeuh hilhin Topaʼ tungah a siangtho Levi mite tungah, “Israel kumpipa, Davidʼ tapa Solomon in a lam biakinn sungah Thuciamna Singkuang siangtho koih un. Na liangko tung uh ah na puak ding uh kisam nawn lo hi. Tu-in Topa na Pasian uh le ama mi Israel-teʼ na sem un.

4Note a khenkhenin na beh uh tawh kizui-in kithawi unla, Israel kumpipa Davidʼ lamlahna le a tapa Solomonʼ lamlahna zui un.

5Tua ciangin mi nautang na sanggamte uh beh kikhenna tawh kizui-in siangtho munah ding uh henla, Levi minam beh tuamtuamte sung pan kihelkim un.

6Tua ciangin Paisan Pawi bawlna ganhing go-in nomau mah kisiansuah unla, Mosesʼ tungtawnin Topaʼ thugen bangin na sanggamte uh adingin kithawi un,” a ci hi.

7Tua ciangin Josiah in tua lai-a a om mi khempeuhte adingin Paisan Pawi piakna-in a gan hon panin mi nautangte tungah tuunote le keelnote tul sawm thum ciang dong le bawngtal tul thum a pia hi. Hihte pen kumpipaʼ neihsa sung pan a kipia ahi hi.

8Tua ciangin ama uliante in zong utna lungsim tawh mite tung, siampite tung le Levi mite tungah a pia uh hi. Pasianʼ biakinn ah ulianpite ahi Hilkiah, Zekhariah le Jehiel-te in siampite tungah Paisan Pawi bawl nadingin tuuno le keel no tul nih le za guk le bawngtal za thum a pia uh hi.

9Levi mi ukpite Konaniah, Shemaiah le a sanggam Nethanel, Hashabiah, Jeiel le Jozabad-te in Paisan Pawi piak nadingin Levi mite tungah tuuno le keel no tul nga le bawngtal za nga a pia uh hi.

10Nasep nading a kithawi khit uh ciangin, siampite amauʼ munah ding uh a, kumpipaʼ thupiakna bangin Levi mite amauʼ khen sungah om uh hi.

11Tua ciangin amaute in Paisan tuuno go uh a, Levi mite in a vun a hawk laitakun siampite in amauʼ tung panin a ngah uh sisan a theh uh hi.

12Tua ciangin amaute in, Moses laibu sungah a kigelh bangin Topaʼ tungah piak dingin mi nautang sungah a innkuan a pawlpawl tawh kizui-in a hawm theih nadingun meihal biaknate a tuam koih uh hi. Tua bangin amaute in bawngtalte zong a hih uh hi.

13Tua ciangin amaute in biakna ngeina kip tawh kizui-in Paisan tuuno sa mei ah a hang uh hi. Tua ciangin amaute in beel sung, beel pi sung le sikbeel daite sungah a siangtho piaknate huan uh a, mi nautang khempeuh kiangah tuate manlang takin a puak uh hi.

14Tua khit ciangin amau ading le siampite adingin amau mah in a sa bawl uh hi; bang hang hiam cih leh Aaronʼ suan siampite zankim ciang dong meihal biakna pia-in manlah uh hi. Tua ahih ciangin Levi mite in amau ading le Aaronʼ suan siampite adingin a sa bawl uh hi.

15Davidʼ thupiak bangin Asafʼ behte ahi lasate le Asaf le Heman le kumpipaʼ thumu pa Jeduthun-te amauʼ munah om uh hi. Kulh kongpi cingte a kulh kongpi ciatah om uh a, amauʼ sanggam Levi mite in amau adingin sa bawlsak uh ahih manin amauʼ nasepna pan amaute a paikhiat ding uh kisam lo hi.

16Tua ahih ciangin Kumpi Josiahʼ thupiakna bangin Paisan Pawi bawl nading le Topaʼ biakna tau tungah meihal biaknate piak nadingin tua ni-in Topaʼ nasep nading khempeuh a kithawi uh hi.

17Tua lai ah a om Israel mite in tua hunin Paisan Pawi le Silngo Sawh loh Anlum Pawi ni sagih sung a bawl uh hi.

18Kamsang Samuel huna kipan Israel sungah tua bang Paisan Pawi kibawl ngei lo hi. Josiah le siampite le Levi mite le tua lai ah a om Judah le Israel mi khempeuh le Jerusalem-a a teeng mite in a bawl Paisan Pawi tawh a kibang, Israel kumpite kuamah in bawl ngei lo hi.

19Josiahʼ uk a kum sawm le kum giatna kumin hih Paisan Pawi kibawl hi.

20Hih thute khempeuh khit, Josiah in biakinn a bawl khit ciangin, Eufratis gun gei Karkhemish ah galsim dingin Egypt kumpipa Neko hong kuan to a, amah a do dingin Josiah a kuan khia hi.

21Ahih hangin Neko in ama kiangah kamtaite sawlin, “Judah kumpipa aw, ei tegel khatlekhat i kihihna ding bang om ahi hiam? Tu-in nang a sim dingin hong kuan ka hi kei a, ka galte a sim dingin a hong kuan ka hi hi. Ka kinawhna ding Pasian in kei tungah thu hong pia khin hi. Kei tawh a om khawm Pasian na nialna khawl in. Tua hikeileh nang hong susia ding hi,” cisak hi.

22Ahi zongin ama kiang panin Josiah kihei khia nuam lo a, amah tawh a kido theih nadingin a mel kiseel hi. Amah in Nekoʼ kam pan a Pasianʼ thugente ngai lo a, Megiddo zanglei a gal kidona ah va pawm hi.

23Tua ciangin thaltawite in Kumpi Josiah kap hi. Tua ciangin kumpipa in a nasemte kiangah, “Nakpi takin liam ka hih manin kei hong paikhiatpih un,” a ci hi.

24Tua ahih ciangin a nasemte in leeng sung panin amah la khia-in ama leeng nihna sungah amah pua-in Jerusalem ah a paipih uh hi. Tua ciangin amah si a, a pateʼ han sungah kivui hi. Judah gam le Jerusalem khuami khempeuh Josiahʼ hangin kap uh hi.

25Jeremiah in zong Josiahʼ hangin kah la a phuak hi. Numei lasate le pasal lasate khempeuh in tu ni dongin amauʼ kahna ah Josiah tamlawh uh hi. Amaute in Israel sungah hih thu biakna ngeina kipin a bawl uh hi. Kah la sungah tuate kikhum hi.

26Tu-in Josiahʼ gamtatna a omlaite le Topaʼ thukham sungah a kigelh bangin a nasep hoihte,

27le ama gamtatna, a masa le a nunungte, Israel le Judah Kumpiteʼ Tangthu Laibu sungah kigelh hi.

← Chapter 34 Jump to: Chapter 36 →