2 Timothy 1

Chin TBR17 (Tedim Bible Revision 2017)

Jump to: Chapter 2 →

1Khris Jesu tawh i kipawlna hangin hong kipia ding nuntakna thu a gen dingin Pasianʼ deihna tawh Khris Jesuʼ sawltak nasep a sem dingin a hong kisawl keimah Paul in

2Ka it ka ta Timoti tungah lai ka hong khak hi. Pa Pasian le i Topa Khris Jesu in dikna, hehpihna le nopsakna thupha nang tungah hong tungsak tahen.

3A sun a zanin ka thungetna ah nang ka hong phawk tawntung a, ka pu ka pateʼ sep mah bangin kisuanna lungsim om het loin a na ka sep Pasian tungah ka lungdamna ka ko hi.

4Na khitui luannate phawk ka hih manin ka lung a dam theih nadingin nang tawh kimu nuamin a sun a zanin ka ngaihsun tawntung hi.

5Na pi Lois le na nu Eunis in a neih upna bangte pawl mah, lungsim takpi tawh na upna thu ka phawk a, tu-in zong nang sungah tua bang upna om hi, ci-in ka ngaihsun hi.

6Tua ahih manin nang tungah ka khut nga-in thu ka hong ngetsak lai-in nangma tungah Pasian in hong piak siamna na sosuah nadingin ka hong phawksak hi.

7Bang hang hiam cih leh Pasian in eite tungah meidawina lungsim hong guan lo a, thahatna, ki-itna, pumpi ki-uk zawhna lungsim hong guan hizaw hi.

8Tua ahih manin i Topaʼ thu gen nading thu ah ahi a, ama thu hangin thong a kia keima thu ah ahi zongin maizum het kei in. Pasian in nangma tungah thahatna hong pia ahih mah bangin Lungdamna Thu hangin thuakna ah zong a thuak nuam hizaw in.

9Eiteʼ sep zawhna hang hi loin ama ngimna sa bang leh a dikna hangin Pasian in eite hong hon khia-in ama mi dingin a hong sam hi. Pasian in leitung a pianmapekin Khris Jesu tungtawnin tua dikna a hong piak hi a,

10tu hun ciangin eite hong Honpa Khris Jesu tungtawnin a dikna hong langsak ta hi. Tua Jesu in sihna beisak a, lungdamna thu hangin sih nawn lohna thu a hong kilangsak hi.

11Hih a thak Lungdamna Thu hilhin a taangko ding le sawltak na a sem dingin kei a hong kikoih ahi hi.

12Tua ahih manin hih bang teng a thuak ka hi hi. Ahi zongin ka up pa ka thei a, ama tungah ka apte tua Ni dong hong kepsak zo ding hi, ci-in thei ka hih manin ka maizum het kei hi.

13Keima tung panin na zak sa a man thute zui inla, Khris Jesu tawh i kipawlna hangin i ngah upna le itna thu ah kip takin om in.

14Eite sungah a hong teeng Kha Siangtho in a hong ap thuhoihte limtakin kem in.

15Na theih sa bangin Asia gam sunga om mi khempeuh in kei hong nusia uh a, tuate lakah Figelas le Hermogenes te zong kihel uh hi.

16Onesiforas in tam veipi kei hong lungnuamsak ahih manin Pasian in a innkuan bupun hehpihna thupha pia tahen. Ka thongkiatna hangin amah maizum lo a,

17Rom khua hong tun ciangin kei hong muh matengin hong zong pah hi.

18Topa in tua Ni ciangin ama tungah hehpihna thupha pia tahen. Efesa khua ah ka om lai-in nakpi takin kei a hong huhnate khempeuh na theih sa ahi hi.

Jump to: Chapter 2 →