Deuteronomy 3

Chin TBR17 (Tedim Bible Revision 2017)

← Chapter 2 Jump to: Chapter 4 →

1“Tua ciangin eite kihei-in Bashan lamah i pai to a, Bashan kumpipa Og le ama mite khempeuh Edrei ah eite a do dingin hong kuan khia hi.

2Ahih hangin Topa in kei kiangah, ‘Amah kihta kei in; bang hang hiam cih leh amah le a mite khempeuh le a leitang nangma khut sungah kong pia khinzo hi. Heshbon ah a teeng Amor kumpipa Sihon na bawl bangin ama tungah na bawl ding hi,’ hong ci hi.

3“Tua ahih ciangin Topa i Pasian in eiteʼ khut sungah Bashan kumpipa Og le a mite khempeuh zong hong pia a, ama adingin mi khat beek a suakta nawn lo dingin i vatmai hi.

4Tua hunin a khuapite khempeuh uh i la a, amauʼ kiang pan i lak loh khuapi khat zong om lo hi. Tua banga i lakte pen Bashan gam a Og kumpi gam sung, Argob gambup, khuapi sawm gukte ahi hi.

5Kulhpi a ki-um lo khua neu tampite sim loh, hih khuapite khempeuh kulh sangpi, kongpi le sikzawlte tawh a muanhuai takin a kibawl ahi hi.

6Heshbon kumpipa Sihon i bawl bangin amaute i susia mang a, a khuapi khempeuh, papi, nupi le naupangte i susia hi.

7Ahih hangin a ganhing khempeuh le khuapi sunga van kinusiate i la hi.

8“Tua ahih ciangin tua hun laitakin, Jordan gal khat a om Amor kumpi nihteʼ khut sung pan, Arnon kuam panin Hermon Mual dong

9(Sidon mite in Hermon pen Sirion ci a, Amor mite in Senir ci uh hi),

10mualzang khuapite khempeuh le Gilead gam khempeuh le Bashan gam khempeuh, Salekah le Edrei dong, Bashan-a om Og kumpi gam khuapite i la hi.

11(Bang hang hiam cih leh Bashan kumpipa Og bek Refaim gam sungah a om lai ahi hi. Ama lupna a han pen suang han hi a, Ammon miteʼ khuapi Rabbah ah tua han om lai hi lo ahi hiam? Tua han a sauna pi sawm le li dektak hi a, a zaina pi guk ahi hi.)

12“Tua hunin hih leitang i luah ciangin, Reuben mite le Gad mite tungah Arnon kuam mong a a om Aroer pan le Gilead mual tung gam kim khat a khuapite tawh ka pia hi.

13Gilead gam a om lai teng le Argob gam khempeuh ahi, Og kumpi gam, Bashan gam khempeuh, Manasseh minam kimkhatte tungah ka pia hi. (Bashan gam buppi pen Refaim leitang kici hi.

14Manasseh mi Jair in Bashan kici Argob gam khempeuh, Geshur mite le Maakath miteʼ gamgi dong la a, tua sunga khua neu minte ama min tamsakin tu ni donga a kip Havvoth jair a phuak hi.)

15“Makhir tungah Gilead ka pia a,

16Reuben mite le Gad mite tungah Gilead panin Arnon kuam dong, gamgi dingin a kuam laita, Ammon miteʼ gamgi ahi Jabbok gun dong tawh ka pia hi.

17Arabah gam zong, a gamgi dingin Jordan tawh, Khinnereth pan nisuahna lam a om Pisgah mual pang nuai-a Ci Tuipi ahi Arabah tuipi ciang dong amaute ka pia hi.

18“Tua hunin note thu kong pia a, ‘ Topa na Pasian un na neih dingun hih leitang hong pia zo hi. Na galhang mite khempeuh uh galhiam tawh kithawi-in Israel mi na sanggamte uh mai ah va kuan ding hi.

19Ahih hangin na zite, na taneute le na ganhingte uh (ganhing tampi na neih uh ka thei hi) note kong piak sa khuapite ah om ding uh a,

20Topa in note hong piak bangin na sanggamte uh tungah lungsim tawlngakna pia-in, Topa na Pasian un Jordan gal khat ah amaute a piak leitang amaute in zong a luah matengun na huh ding uh hi. Tua ciangin note kong piak sa ahi na neihsa ciat uh ah note khempeuh na ciah ding uh hi,’ kong ci hi.

21“Tua hun laitakin Joshua thu ka pia a, ‘ Topa na Pasian in hih kumpi nihteʼ tungah a bawlte khempeuh na mit in mu khin a, na nawk lai ding kumpi gam khempeuh tungah zong Topa in tua mah bangin hih ding hi.

22Amaute na kihta kei ding hi; bang hang hiam cih leh nang aʼ dinga hong dosak pa pen Topa na Pasian ahi hi,’ ka ci hi.

23“Tua hunin keimah in Topaʼ tungah ka thum a,

24‘Topa Pasian aw, na liatna le na thahatnate na nasem paʼ tungah lah ding a hong kipan pan bek na hi hi; bang hang hiam cih leh vantung hitaleh leitungah hitaleh nangma hih bangin tua bang nasep leh a vanglian gamtatna a hih thei bang pasian om ahi hiam?

25Kei hong paisak inla, Jordan gal khat a om gam hoih, tua mual tung gam hoih le Lebanon hong musak in, ci-in kong thum hi,’ ka ci hi.

26“Ahih hangin noteʼ hangin keiʼ tungah Topa heh a, ka thunget hong pia lo hi. Topa in kei kiangah, ‘Pha zo hi; hih thu kei kiangah hong gen nawn kei in.

27Pisgah mual dawnah pai to inla, nitumna lam, leilu lam, leitaw lam le nisuahna lamah khuadak to inla, na mit tawh gal et in; bang hang hiam cih leh nangmah in hih Jordan na kantan kei ding hi.

28Ahih hangin Joshua thu pia inla, hanthawnin tha khauhsak in; bang hang hiam cih leh hih miteʼ mai ah amah pai dinga, nangmah in na muh ding leitang amaute luahsak ding hi,’ hong ci hi.

29“Tua ahih ciangin Beth-peor gal a kuam sungah i taam lai hi.

← Chapter 2 Jump to: Chapter 4 →