Ephesians 1

Chin TBR17 (Tedim Bible Revision 2017)

Jump to: Chapter 2 →

1Pasianʼ sawlna tawh Jesu Khrisʼ sawltak ahi keimah Paul in, Efesa khua ah a om thu um mite tungah lai ka hong khak hi.

2Eiteʼ Pa Pasian le Topa Jesu Khris in note tungah dikna le nopsakna thupha hong tungsak tahen.

3Khris tawh eite i kipawlna hangin vantung gam panin kha tawh kisai letsong namkim hong pia ahih manin eiteʼ Topa Jesu Khrisʼ Pa ahi Pasian tungah i lungdamna ko ciat ni.

4Ama mai ah eite pen paubaanna a nei lo, mi siangthote ahi ding le Khris hangin ama mite ahi dingin leitung a pian mapek nangawnin Pasian in a hong teel sa ihi hi.

5Pasian in Jesu Khris hangin ama mite ahi dingin eite a hong bawl ding a seh kholh sa hi a, tua bangin a hong bawl ding pen ama tupna le a utna ahi hi.

6Ama it Tapa hangin hih bangin letsong hong pia ahih manin a vanglian ama hong hehpihna hangin Pasian phat ni.

7Khris hong sihna hangin eite in suahtakna ngahin, i mawhnate hong kimaisak ahi hi. Tua zah dongin Pasianʼ hong hehpihna thu bangzah takin lian ahi hiam?

9Pasian in a pilna le a thumuhnate zangin ama geel sa bangin hong sem a, Khris zangin a sepnop thusim teng eite tungah hong kilangsak hi.

10Tua a geel thu pen, a hunhoih a tun ciangin Khris khutnuai ah, vantung le leitungah a om khempeuh gawm ding ahi hi.

11Na khempeuh, Pasianʼ ngaihsutna le a geel sa bangin a piang hi. A cil pek a kipanin a ngaihsut sa thu tawh kizui-in Khris tawh i kipawlna hangin Pasianʼ tate ihih nadingin Pasian mah in a hong seh sa ihi hi.

12Tua ahih manin Khris a muang masa eite in Pasian phatin a minthanna vang kilangsak ni.

13Note in zong hotkhiatna a hong ngahsak thei Lungdamna Thu a man za-in Khris na up uh ciangin, Pasian in a hong ciam sa bangin ama mi na hihna uh a kilat nadingin note tungah Kha Siangtho hong piakna tawh a hong ciamteh hi.

14Tua Kha Siangtho pen, Pasian in piak dingin a hong ciam sa thu eite khempeuh in i ngah taktak ding a kician ahihna thu a hong lahna hi a, ama mi ahi taktak eite khempeuh pen a suakta takpi mite ihihna a kilat nading ahi hi. Tua ahih manin a kuamah peuh in Pasian phat ciat ni.

15Note in Topa Jesu na muanna thu uh le thu umte khempeuh na itna thu uh ka zak hun a kipanin,

16tawlnga loin noteʼ tangin Pasianʼ tungah lungdamna ka na pulak tawntung hi. Ka thungetna ah zong note ka hong phawk tawntung a,

17i Topa Jesu Khrisʼ Pasian ahi, a minthang Pa Pasian in note tungah Kha Siangtho hong pia-in, tua Kha Siangtho in note tungah lungpilna hong pia-in, note in Pasian na theih nadingun note tungah Pasian hong kilatsak nadingin thu ka hong ngetsak niloh hi.

18Note bang dingin hong sam a, a mite tungah a hong ciam thupha lamdangte bangzah takin lian a, thu um ahi eite sungah na a hong sem vangliatna bangzah takin lian ahi hiam, cih na muh theih nadingun noteʼ lungsim mit hong vaksak nadingin thu ka na ngen hi. Eite sungah na a hong sem vangliatna pen sihna panin Khris hingsakin, vantung gamah zong, ama tak lamah a tutsak nadingin a zat vangliatna mah ahi hi.

21Vantungah ukna, aana, vangliatna a neite khempeuh tungah Khris in ukna aana nei lai a, hih leitung bekah hi loin a hong tung ding leitungah zong amah a lian pen ahi hi.

22Pasian in Khrisʼ khe nuai ah na khempeuh koih a, thu khempeuh ah pawlpiʼ lutang dingin Khris a bawl hi.

23Tua pawlpi pen Khrisʼ pumpi hi a, tua pawlpi adingin a mahmah kipia-in, mun khempeuh a om pawlpite, thu khempeuh ah a cingtaaksak hi.

Jump to: Chapter 2 →