Ezekiel 32

Chin TBR17 (Tedim Bible Revision 2017)

← Chapter 31 Jump to: Chapter 33 →

1Zedekiah in a uk a kum sawm le kum nih kum, a kha sawm le nih a ni masa ni-in Topa in kei kiangah thu hong gen a,

2“Mihing ahi Ezekiel aw, Egypt kumpipa Faro tamlawh inla, hih bangin ci in: “Minam dangte lakah, humpinelkai bangin na kingaihsun hi. Ahi zongin nang pen gun sung tok gawpin a ninsak, Awle tawh na kibang zaw hi.

3Topa Pasian ahi keimah in kong cih in ah: Minam tampi hong kuansakin, ka ngen kong khuhsak dinga, tui gei ah kong kaisak ding hi.

4Leilak ah nang hong kai khia-in, leilak kong denna dinga, vasate le ganhingte, a kham takun kong nesak ding hi.

5Mual teng guam teng, na sa ka dimsak ding hi.

6Na sisan tawh leitung khempeuh ka kawtsak dinga, mual teng guam teng na sisan tawh kidim ding hi.

7Nang kong suksiat ni ciangin vanpi ka khuhcip dinga, aksi ka mialsak ding hi. Ni, meiipi ka liahsak dinga, kha, ka mialsak ding hi.

8Vantung khuavak khempeuh ka mialsak dinga, na gam khempeuh khim zing ding hi, ci-in Topa Pasian in ka gen khin hi.

9“Na theih ngei loh gamdangte ah salin kong omsak ciangin minam tampite lunggim ding hi.

10Nang tunga kong bawlna thu minam tampite in lamdang sa ding uh hi. Ka namsau ka vik ciangin kumpite lau-in kigaih ding uh hi. Nang na puk ni ciangin a sih khak ding uh lau-in mi khempeuh liing kelkel ding uh hi.

11“Bang hang hiam cih leh Topa Pasian in hih bangin ka ci hi: Babylon kumpipaʼ namsau na thuak ding hi.

12Minam dang a gilo pente sung panin a galkapte uh a namsau uh doksakin, na mihonpite ka thatsak ding hi. “Na kisaktheih pih teng vatmai ding uh a, na minam khempeuh that mang ding uh hi.

13A tui nekna mun a omna khempeuh uh ah, na gan khawite ka that khin ding hi. Tui a siknin ding mihing ganhing khat zong om nawn lo ding hi.

14Bangmah in su nawn lo ding ahih manin, tuite ciim sitset dinga, gunte zong dum dide ding hi, ci-in Topa Pasian in ka gen khin hi.

15Egypt gam gamkhing suaksakin, a gam sunga om teng ka suksiat ciangin Topa ka hihna thu hong thei ding uh hi.

16“Hih pen kah la-in a kisa ding tamlawhna hi a, Egypt le a mite tamlawhna-in minam dang numeite in nei ding uh hi. Topa Pasian in hih thu ka gen khin hi,” hong ci hi.

17Zedekiah in a uk a kum sawm le kum nih kum, a kha masa a ni sawm le nga ni-in Topa in kei tungah thu hong gen a,

18“Mihing ahi Ezekiel aw, Egypt mi tampiteʼ hangin kapin thum in. Misiteʼ omna Leinuai gamah a vanglian minam dangte tawh amaute paisak in. Amaute kiangah hih bangin ci in:

19“Midang khempeuh sangin melhoih zaw hi lo na hi uh hiam? Ahi zongin pai unla, Pasian a thei lo miteʼ han sungah va lum un, ci-in gen in.

20“Gal sung a a kithatte tawh si khawm ding uh hi. Egypt gam sunga om mi khempeuh a vatlum dingin namsau khat a baih sa-in om hi.

21Egypt mite a panpih galhang pente in misiteʼ gam Leinuai panin amaute na dawn ding uh a, ‘Pasian a thei lo, gal sung a si mite hong pai suk uh a, hih lai ah lum ta uh hi,’ ci-in kiko ding uh hi.

22“Assiria zong, a kimkot ah a galkapteʼ han tawh, tua lai mahah om hi. Amaute khempeuh zong gal sungah a si uh hi a,

23Leinuai a thuk penna munah amauteʼ han om hi. A galkap khempeuh gal sungah a si hi a, a hante uh ama kimkot ah om hi. Ahi zongin amaute pen nidangin minam dangte a liinglawngsak zo ngeite ahi uh hi.

24“Elam zong, a kimkot ah a galkapteʼ han tawh, tua lai mahah om hi. Amaute khempeuh gal sungah a si uh hi a, misiteʼ gam Leinuai ah Pasian a thei loin pai suk uh hi. A hin lai-un mi khempeuh a lausak ngeite hi uh a, ahi zongin tu-in amaute si-in mindai-in a om uh hi.

25Gal sung a a site lak mahah Elam lum a, ama kimkot ah a galkapteʼ han om hi. Amaute, Pasian a thei loin, gal sungah si uh hi. A hin lai-un mite a lausak ngeite hi uh a, ahi zongin tu-in amaute si-in mindai-in om uh a, gal sung a site mah tawh a kibangin gimna a thuak uh hi.

26“Meshek le Tubal zong tua lai mahah om uh a, a kimkot uh ah a galkapte uhʼ han om hi. Amaute khempeuh zong Pasian a thei lo, gal sung a a si ahi uh hi. Ahi zongin a hin lai-un midangte a lausak zo ngeite ahi uh hi.

27Hih mite pen misiteʼ omna Leinuai ah a galvan teng uh tawh pai-in, a namsau uh kilukham sakin, a lum uh a awm tung uh ah a kikoihsak kawmin limtakin a kivui tanglai galkapte bangin pahtawi a vuina ngah lo uh hi. Ahi zongin hih mite pen midang a lausak zo dingin a vanglian ngeite ahi uh hi.

28Tua mah bangin nang Faro zong Pasian a thei lo, gal sung a site lakah na om ding hi.

29“Edom zong a kumpite le a gam ukte tawh tua lai mahah om hi. Amaute pen a thahat galkapte hi a, ahi zongin tu-in Pasian a thei loin gal sung a a site lak, misiteʼ gam Leinuai ah a lum uh hi.

30“Leilu lam uliante le Sidon mite zong tua lai mahah om uh hi. Amauteʼ vangliatna in midangte lausak ngei a, ahi zongin tu-in gal sung a si mite tawh mindai-in pai suk uh a, Pasian a thei loin kivui uh hi. Misiteʼ gam Leinuai-a a pai sukte tawh a mindaina uh kibang hi.

31“Egypt kumpipa Faro in hih mite khempeuh a muh ciangin ama sihna le a galkapte gal sungah a sihna thu tawh kisai-in a lung nuamtuam ding hi, Topa Pasian in ci hi.

32Bang hang hiam cih leh Faro in midangte lausak gawp ahih manin amah le a galkapte khempeuh kithatin, Pasian a thei loin gal sung a a si mite tawh kivui khawm ding hi. Topa Pasian keimah in hih thu ka gen khin hi,” hong ci hi.

← Chapter 31 Jump to: Chapter 33 →