Ezra 3

Chin TBR17 (Tedim Bible Revision 2017)

← Chapter 2 Jump to: Chapter 4 →

1A kha sagihna hong cin ciangin Israel mite amauʼ khuapi ciatah teeng khin uh ahih manin, khekhat khai bangin Jerusalem ah hong kituah diam uh hi.

2Tua ciangin Jozadakʼ tapa Jeshua le a siampipihte le Shealtielʼ tapa Zerubbabel le a behte hong kipan uh a, Pasianʼ mi Moses thukham sungah a kigelh bangin meihal biaknate piak nadingin Israel Pasian biakna tau a bawl uh hi.

3Amaute in tua gam a midang a teengte kihta uh ahih manin a mun lui mahah biakna tau phut pahin zing le nitak simin Topaʼ tungah meihal biakna a pia uh hi.

4Tua ciangin amaute in a kikipsak sa bangin buk pawi bawl uh a, nisimin zat dingin a kiseh sa zah bangin meihal biakna nisimin a pia uh hi.

5Tua ciangin hihte banah a tawntung a meihal biakna, Khadet sim a biakna le Topaʼ pawi a kiseh sa hun khempeuh le Topaʼ tungah amauʼ utthu tawh a pia mite khempeuhʼ biaknate zong a pia uh hi.

6Topaʼ biakinnpi a bul a kiphuh nai loh hangin a kha sagihna a ni masa ni a kipanin amaute in Topaʼ tungah meihal biaknate piak ding kipan uh hi.

7Tua hi a, amaute in suangseekte le khutsiamte tungah sum pia uh a, Persia kumpi Sairasʼ tung panin a thu ngahna bangun Lebanon mual tung gam panin tuipi gei Joppa khua ah taamtak singte a hong puak suk ding Sidon khua mite le Taia khua mite tungah zong an nek tui dawn le sathau a pia uh hi.

8Amaute, Jerusalem khua-a Pasianʼ biakinn ah a hong ciahkik uh a kum nihna, tua kum a kha nihna sungin Shealtielʼ tapa Zerubbabel le Jozadakʼ tapa Jeshua, nasep kipan uh a, a Israel mipihte, siampite, Levi mite le salsuahna panin Jerusalem ah a hong ciahkik mite khempeuh in zong a huh uh hi. Amaute in Levi mite kum sawm nih panin a tungsiah peuhmah Topaʼ biakinn sungah biakna nasepte a vaan dingin a seh uh hi.

9Jeshua a tapate le a behte tawh le Hodaviah-te beh Kadmiel le a tate in Henadadʼ tapate le Levi mi a tapate uh le a behte uh tawh Pasianʼ biakinn ah nasemte tungah ukna tavuan a la khawm uh hi.

10Innlamte in Topaʼ biakinn a bul a phuh uh ciangin, Israel kumpipa David in a geel kholh sa bangin Topa a phat dingin siampite in a puan uh silhin peengkul tawh, Asafʼ tapa Levi mite daltuah tawh a panmun ding uh ah hong pang uh hi.

11Tua ciangin amaute in Topa phatna le lungdamkohna a kidawngin sa uh a, “ Topa hoih hi; bang hang hiam cih leh Israel-te hong itna kip tawntung hi,” a ci uh hi. Topaʼ biakinn bulpi kiphut khin ahih manin mi khempeuh in nakpi takin Topa phat uh hi.

12Midang tampi lungdamin a aw neih zahun a kiko uh hangin a biakinn masa a mu ngeisa siampite, Levi mite le innkuan lutang, midang tampite in hih biakinn bulpi a kiphuh a muh uh ciangin kapin a thum uh hi.

13Mite nakpi takin kiko ahih manin lungdamna awging le kahna le thumna awgingte mite in khen thei lo uh hi. Gamlapi pek panin tua awgingte a kiza hi.

← Chapter 2 Jump to: Chapter 4 →