Hebrews 5

Chin TBR17 (Tedim Bible Revision 2017)

← Chapter 4 Jump to: Chapter 6 →

1Siampi lianpen ahi peuhpeuh mipa pen a miteʼ mawhna hangin Pasianʼ tungah biakna le letsong a piaksak dingin ama mipihte lak panin kiteelin nasep a kiguan ahi hi.

2Amah zong lam tampi ah a gina lo thei mi mah ahih manin thu thei lo mite le a khial mite tungah lungnem takin na sem thei hi.

3Amah zong mi ginalo mi mah ahih manin miteʼ mawhna hangin biakna a pia hi bek loin ama mawhna mahmah hangin zong biakna a pia ahi hi.

4Tua bangin pahtawina a nei siampi lianpen nasep pen a sem dingte amau utthu tawh a kisehtawm mawk hi lo hi; siampi lianpen a sem dingin a mahmah a kisehtawm hi lo a, Aaron a kisap mah bangin Pasian in amah a seh ahi hi.

5Tua mah bangin Khris zong, a mahmah in siampi lianpen nasep a sem tawm mawk hi loin Pasian in ama kiangah, “Nang, ka Tapa na hi hi. Tu ni-in na Pa ka suak hi,” na ci hi.

6Mun dang khat ah zong, “Melkhizedek siampi gui zui-in a tawntungin siampi na hi ding hi,” na ci lai hi.

7Leitungah mihingin Jesu a om lai-in sihna panin amah a hon khia thei ding Pasian tungah thu ngenin khitui naptui tawh thumin na kiko hi.

8Amah, Pasianʼ Tapa hi napi-in a thuakna tawh thumang ahih theih nading a na kisin hi.

9Tua bangin a cingtaak mi a suah khit ciangin ama thu a mang mite khempeuh adingin tawntung hotkhiatna a kipatna hong suak a,

10Melkhizedek gui zui-in siampi lianpen dingin Pasian in a bawl hi.

11Hih thu tawh kisai-in i gen ding tampi a om hangin note in thu thei hak mahmah na hih manun i gen tel theih nading haksa hi.

12Tu-in note pen midang a hilh dingin sia na suah theih ding uh hun hi khin napi-in note mahmah pen Pasianʼ thu a bulpite hilh ding na kisam lai uh hi. Antak ne thei nai loin nawi bek a ne thei lai na hi uh hi.

13Nawi bek a ne laite pen naungek ahih manin a man le a man lo thu bangmah phawk thei nai lo uh hi.

14Ahi zongin antak i cih pen a sia le a pha a khen thei, a lim le a lim lo a khen thei ta, a khangham khin sa mite ading ahi hi.

← Chapter 4 Jump to: Chapter 6 →