Hosea 12

Chin TBR17 (Tedim Bible Revision 2017)

← Chapter 11 Jump to: Chapter 13 →

1Israel mite, a nung kawikawi huih tawh kibang a, sunthapai a a nasepna uh a mawkna ahi hi. Zuauna le siatna lamsang bekbek khangsak uh hi. Assiria-te tawh kipawlna bawl uh a, Egypt-te tawh kizopna nei uh hi.

2Topa in Israel mite a mawhsak nading a thu om hi. Jakob a gamtatna tawh kizui-in gim pia dinga, ama gamtatna bangin thukkik ding hi.

3Jakob in a nu sung nangawn pek panin a sanggampa sawk pah a, a khangham ciangin zong Pasian tawh kilaii hi.

4Vantungmi tawh kilaii-in a zo hi. Tua ciangin Jakob zong kapin ama tung panin hehpihna a ngen hi. Pasian in Bethel munah amah mu-in a hopih hi.

5Ama min pen Topa, Vanglian Topa Pasian ahi hi.

6Pasianʼ huhna tawh note khempeuh kiheikik unla, thuman thutangin gamta un. Pasian muang tawntung un.

7Sumbukte in tawitehna man lo zang uh a, amaute in mi khem ding nuam a sa uh hi.

8Israel mite in, “Tu-in ka hau uh a, kote adingin neihsa tampi ka ngah uh hi,” ci uh hi. Ahi zongin a hauhna teng un a mawhna teng uh loh zo lo hi.

9Egypt gamah na om lai pek uh a kipanin kei pen noteʼ Topa Pasian ka hi a, ahi zongin tu-in tanglai hun bangin puanbuk sungah note kong teengsakkik ding hi.

10Kamsangte tungah thu ka gen hi. Maangmuhna a banbanin pia-in, kamsangte tungah thu gentehna tawh thu a gen pa zong keimah ka hi hi.

11Gilead gamah milim biakna om a, tuate a kimanna om lo hi. Gilgal gamah bawngtal tawh bia uh a, lokhote in a suang deih loh teng uh a phualphualin a cian kawikawi tawh kibangin, a biakna taute uh bangmahin kimang lo ding hi.

12Aram gamah Jakob tai a, Israel in tua lai ah zi khat thalawhin na sem a, zi thalawhna-in tuu a cing hi.

13Topa in kamsang khat zangin Egypt panin Israel-te paikhiatpih a, kamsang khatʼ nasepna tawh amaute suakta-in a nungta uh hi.

14Heh mahmah theih nadingin Israel mite gamta uh ahih manin amauteʼ Topa in amauʼ tung mahah a mawhna uh tungsak dinga, amauteʼ mawhna mah a thuaksak ding hi.

← Chapter 11 Jump to: Chapter 13 →