Joshua 14

Chin TBR17 (Tedim Bible Revision 2017)

← Chapter 13 Jump to: Chapter 15 →

1Hihte pen, siampi Eleazar, Nun tapa Joshua le Israel minam sung pan beh lutangte in amaute tungah a piak, Kanaan gam sungah Israel miteʼ ngah gamhte ahi hi.

2Minam kua le a langte adingin Topa in Moses a thupiak bangin amauʼ gamhte aisanna tawh kipia hi.

3Bang hang hiam cih leh Moses in Jordan gal khat ah minam nih le a langte tungah gamh pia khinzo hi. Ahih hangin amaute lakah Levi mite tungah bangmah pia lo hi.

4Bang hang hiam cih leh Josef mite minam nihin kikhen a, Manasseh le Efraim minamte ahi uh hi. Tua gam sungah Levi-te tungah tanh kipia lo a, ahih hangin amauʼ ten nading khuapite le a ganhingte uh adingin lo nona gamte kipia bek hi.

5Topa in Moses a thupiak bangin Israel mite gamta uh a, amaute in leitang a hawm uh hi.

6Tua ciangin Judah minamte Gilgal-a Joshua kiangah pai uh a, amaute sung panin Kenaz mi Jefunneh tapa Kaleb in ama kiangah, “ Topa in Kadesh-barnea ah Pasian mi Moses tungah nang le keiʼ thu tawh kisai a gente na thei hi.

7A gam sung thu kansim dingin Topaʼ nasem Moses in Kadesh-barnea panin kei hong sawl lai-in kum sawm li ka pha a, ka lungsim a om bangin ama kiangah thu ka tunkik hi.

8Ahih hangin kei tawh hong pai to khawm ka sanggamte in mite lungkiasak uh a, ahi zongin keimah in lungsim tak tawh Topa ka Pasian ka zui hi.

9Tua ni-in Moses kiciamin, ‘Nangmah in Topa ka Pasian, lungsim tak tawh zui na hih manin na khe in a tot sa leitang pen nang le na tate adingin gamh hi tawntung ding hi,’ hong ci hi.

10Tu-in, a cih sa bangin Topa in, Israel mite sehnel gamah a pai sung, Topa in hih thu Moses tungah a gen a kipan hih kum sawm li le nga sung kei hong nungtasak a, tu-in kei kum sawm giat le kum nga ka pha hi.

11Moses in hong sawl hun lai mah bangin tu ni-in kei ka tha hat lai a, galdo nading le kuan khiatna le ciahkik nadingin ka thatang pen tua hun lai-a ka thatang mah bang lai hi.

12Tua ahih ciangin tu-in tua ni-a Topaʼ gen hih mual tung gam kei hong pia in. Anak mite a muanhuai mahmah khuapi sungah a omna thu tua hun lai-in kong gen uh hi. Topa in kei hong ompih dinga, Topaʼ cih mah bangin amaute ka hawl khia zo kha ding hi,” a ci hi.

13Tua ciangin Joshua in amah thupha pia a, Jefunnehʼ tapa Kaleb tungah gamh-in Hebron a pia hi.

14Tua ahih ciangin amah in Topa, Israel-teʼ Pasian, lungsim tak tawh zui ahih manin tu ni dongin Hebron pen Kenaz mi Jefunnehʼ tapa Kalebʼ gamh a suak hi.

15Hih Hebron min a nidangin Kiriath-arba kici hi; Arba pen Anak mite lakah mi lianpen khat ahi hi. Tua ciangin galdona panin tua gam a tawlnga hi.

← Chapter 13 Jump to: Chapter 15 →